ഹാൽ ഫറൂജിൽ സംരക്ഷിത കെസ്ട്രൽ പക്ഷിയെ കൊന്ന വേട്ടക്കാരൻ പിടിയിൽ

ഹാൽ ഫറൂജിൽ സംരക്ഷിത വിഭാഗത്തിൽപ്പെട്ട അപൂർവ്വ പക്ഷിയായ ‘കോമൺ കെസ്ട്രലിനെ’ (Common Kestrel) കാലിനടിയിലിട്ട് ചവിട്ടിക്കൊന്ന വേട്ടക്കാരൻ പിടിയിലായി. ഞായറാഴ്ച രാവിലെ 8 മണിയോടെ നടന്ന അതിക്രൂരമായ ഈ സംഭവം ‘ബേർഡ് ലൈഫ് മാൾട്ട’യുടെ (BirdLife Malta) നിരീക്ഷണ സംഘമാണ് ക്യാമറയിൽ പകർത്തിയത്.

ചെടികൾക്കിടയിൽ നിന്ന് പക്ഷിയെ എടുത്ത വേട്ടക്കാരൻ, അതിന് ജീവൻ പോകുന്നതുവരെ സ്വന്തം കാലിനടിയിൽ വച്ച് അമർത്തുകയായിരുന്നുവെന്ന് സംഘടന വ്യക്തമാക്കി. പക്ഷി ചത്തുവെന്ന് ഉറപ്പുവരുത്തിയ ശേഷം ഇയാൾ അതിന്റെ മൃതദേഹവുമായി നീങ്ങുന്നതും വീഡിയോയിലുണ്ട്. സംഭവം നടന്നയുടൻ വിവരമറിഞ്ഞെത്തിയ എൻവിറോൺമെന്റൽ പ്രൊട്ടക്ഷൻ യൂണിറ്റിലെ (EPU) പോലീസ് ഉദ്യോഗസ്ഥർ വേട്ടക്കാരനെ കസ്റ്റഡിയിലെടുക്കുകയും പക്ഷിയുടെ മൃതദേഹം വീണ്ടെടുക്കുകയും ചെയ്തു.

മാൾട്ടയിലെ നിയമപ്രകാരം കുറ്റക്കാരനാണെന്ന് കണ്ടെത്തിയാൽ ഇയാൾക്ക് 5,000 യൂറോ പിഴയും വേട്ടയാടൽ ലൈസൻസിന് ആയുഷ്കാല വിലക്കും നേരിടേണ്ടി വരും. ഇത്രയും ക്രൂരമായ സംഭവങ്ങൾ ആവർത്തിക്കുന്നതിനെ ബേർഡ് ലൈഫ് മാൾട്ട രൂക്ഷമായി വിമർശിച്ചു.

കഴിഞ്ഞ തിങ്കളാഴ്ചയും മാൾട്ടയിൽ അതിതീവ്ര സംരക്ഷണ പട്ടികയിലുള്ള രണ്ട് അപൂർവ്വ ‘ബ്ലാക്ക് സ്റ്റോർക്ക്’ (Black Storks) പക്ഷികളെ വെടിവെച്ചിട്ടിരുന്നു. സെപ്റ്റംബർ 1-ന് ആരംഭിച്ച ഈ വർഷത്തെ ശരത്കാല വേട്ടയാടൽ സീസൺ ജനുവരി 31 വരെ തുടരും. ഇതിനിടെ, ടർട്ടിൽ ഡോവുകളുടെ (Turtle-doves) വേട്ടയാടുന്നതിന് നിശ്ചയിച്ചിരുന്ന 500 പക്ഷികളുടെ പരിധി പൂർത്തിയായതിനെ തുടർന്ന്, സെപ്റ്റംബർ 30 വരെ ഉണ്ടാകുമായിരുന്ന ആ സീസൺ നേരത്തെ തന്നെ അധികൃതർ അവസാനിപ്പിച്ചിരുന്നു.