‘സ്റ്റോം ഹാരി’ : മെഡിറ്ററേനിയൻ കടലിൽ ഇതുവരെ രേഖപ്പെടുത്തിയതിൽ ഏറ്റവും ഉയരമുള്ള തിരമാല സൃഷ്ടിച്ചതായി പഠന റിപ്പോർട്ട്

മെഡിറ്ററേനിയൻ കടലിൽ നാശനഷ്ടം വിതച്ചുകൊണ്ട് ജനുവരിയിൽ മാൾട്ടയിൽ ആഞ്ഞടിച്ച ‘ഹാരി’ കൊടുങ്കാറ്റിൽ എക്കാലത്തെയും ഉയർന്ന കൂറ്റൻ തിരമാല സൃഷ്ടിച്ചതായി പുതിയ പഠന റിപ്പോർട്ട്. കഴിഞ്ഞ ആഴ്ച ‘നേച്ചർ’ (Nature) ജേണലിൽ പ്രസിദ്ധീകരിച്ച പഠനത്തിലാണ് ഇറ്റാലിയൻ, മാൾട്ടീസ് ഗവേഷകർ ഈ വിവരങ്ങൾ വെളിപ്പെടുത്തിയത്.

മാൾട്ട, സിസിലി, സർദീനിയ, കാലാബ്രിയ തുടങ്ങിയ മെഡിറ്ററേനിയൻ പ്രദേശങ്ങളിൽ കൊടുങ്കാറ്റ് ഉണ്ടാക്കിയ ആഘാതങ്ങളെക്കുറിച്ചാണ് പഠനം നടത്തിയത്. ചിലയിടങ്ങളിൽ തിരമാലകളുടെ ഉയരം 17 മീറ്റർ വരെ എത്തിയിരുന്നു. കഴിഞ്ഞ ഏതാനും പതിറ്റാണ്ടുകളായി പ്രദേശത്തുണ്ടായ മറ്റ് കടുത്ത കൊടുങ്കാറ്റുകളുമായി താരതമ്യപ്പെടുത്തുമ്പോൾ ഹാരി കൊടുങ്കാറ്റിന്റെ തീരദേശ ആഘാതം വളരെ പ്രകടമായിരുന്നുവെന്ന് ഗവേഷകർ വ്യക്തമാക്കുന്നു.

കനത്ത പ്രളയവും നാശനഷ്ടങ്ങളും

ജനുവരി 18-ന് വൈകുന്നേരത്തോടെ മാൾട്ടീസ് തീരത്ത് പതിച്ച ഹാരി കൊടുങ്കാറ്റ് ജനുവരി 20-ഓടെയാണ് ഏറ്റവും ശക്തമായ രൂപം പ്രാപിച്ചത്. വാലറ്റയുടെ തീരപ്രദേശത്ത് മണിക്കൂറിൽ 17 മില്ലീമീറ്റർ വേഗതയിൽ മഴ പെയ്യുകയും കടൽനിരപ്പ് മൂന്ന് മീറ്റർ വരെ ഉയരുകയും ചെയ്തു. ഗ്രാൻഡ് ഹാർബറിൽ മാത്രം 0.85 ചതുരശ്ര കിലോമീറ്റർ പ്രദേശം വെള്ളത്തിനടിയിലായി. സെന്റ് ജോർജ്ജ്, ബല്ലൂട്ട ബേ എന്നിവിടങ്ങളിൽ കടൽവെള്ളം 150 മീറ്ററോളം ഉള്ളിലേക്ക് കയറുകയും വെള്ളം 1.1 മീറ്റർ വരെ ഉയരുകയും ചെയ്തു. സിസിലിയുടെ തെക്കുകിഴക്കൻ പ്രദേശങ്ങളിലാണ് ഏറ്റവും കൂടുതൽ പ്രളയബാധയുണ്ടായത്. ഇവിടെ ഏഴ് കിലോമീറ്ററിലധികം ഭൂപ്രദേശം വെള്ളത്തിനടിയിലായി.

റെക്കോർഡ് തിരമാല

മാൾട്ടയ്ക്കും സിസിലിക്കും ഇടയിലുള്ള കടൽഭാഗത്താണ് റഡാർ ബുയികൾ 16.6 മീറ്റർ ഉയരമുള്ള കൂറ്റൻ തിരമാല രേഖപ്പെടുത്തിയത്. ഈ സമയത്തെ ശരാശരി തിരമാലകളുടെ ഉയരം 8.9 മീറ്ററായിരുന്നു. മെഡിറ്ററേനിയൻ കടലിൽ ഇതുവരെ രേഖപ്പെടുത്തിയിട്ടുള്ളതിൽ വച്ച് ഏറ്റവും വലിയ തിരമാലയാണിത്. 2020 ജനുവരിയിൽ സ്‌പാനിഷ് തീരത്ത് ഗ്ലോറിയ കൊടുങ്കാറ്റിനിടെ രേഖപ്പെടുത്തിയ 14.2 മീറ്റർ ഉയരമുള്ള തിരമാലയുടെ റെക്കോർഡാണ് ഇതോടെ വഴിമാറിയത്. ഇതിനുപുറമേ, യൂണിവേഴ്സിറ്റി ഓഫ് മാൾട്ടയിലെ കാലാവസ്ഥാ കേന്ദ്രങ്ങൾ മണിക്കൂറിൽ 95 കിലോമീറ്റർ വേഗതയുള്ള കാറ്റും രേഖപ്പെടുത്തി.

കാരണം അശാസ്ത്രീയ നിർമ്മാണങ്ങളും കാലാവസ്ഥാ വ്യതിയാനവും

അശാസ്ത്രീയമായ തീരദേശ നിർമ്മാണങ്ങൾ വെള്ളപ്പൊക്കത്തിന്റെ ആഘാതം വർദ്ധിപ്പിച്ചതായി ഗവേഷകർ ചൂണ്ടിക്കാണിക്കുന്നു. ഒപ്പം കാലാവസ്ഥാ വ്യതിയാനവും കൊടുങ്കാറ്റിന്റെ തീവ്രതയ്ക്ക് കാരണമായി. സാധാരണയേക്കാൾ 1.8 ഡിഗ്രി സെൽഷ്യസ് കടൽ ഉപരിതല താപനില ഉയർന്നത് കാറ്റിൽ ഈർപ്പത്തിന്റെ അളവ് 12-13% വരെ വർദ്ധിപ്പിക്കാൻ ഇടയാക്കി. ഇത് കൊടുങ്കാറ്റിന് കൂടുതൽ കരുത്ത് പകരുകയും മഴയുടെ ശക്തി കൂട്ടുകയും ചെയ്തു.

ആഗോള ശരാശരിയേക്കാൾ 20% വേഗതയിലാണ് മെഡിറ്ററേനിയൻ പ്രദേശം ചൂടാകുന്നത്. അതിനാൽ ഭാവിയിലും കൂടുതൽ ശക്തമായ കൊടുങ്കാറ്റുകൾക്കും കനത്ത തിരമാലകൾക്കും സാധ്യതയുണ്ടെന്ന് പഠനം മുന്നറിയിപ്പ് നൽകുന്നു. കൊടുങ്കാറ്റ് മൂലമുണ്ടായ നാശനഷ്ടങ്ങൾ പരിഹരിക്കുന്നതിനായി മാൾട്ടയ്ക്ക് കഴിഞ്ഞ മാസം യൂറോപ്യൻ യൂണിയനിൽ നിന്ന് 3.7 ദശലക്ഷം യൂറോ സഹായം ലഭിച്ചിരുന്നു. 128 ദശലക്ഷം യൂറോയുടെ നാശനഷ്ടമാണ് മാൾട്ട കണക്കാക്കിയിട്ടുള്ളത്.