‘ആകാശ ഗോപുരം താഴെ വീണതോ ?’; തലശ്ശേരി- മാഹി ബൈപ്പാസിന്റെ ചിത്രം പങ്കുവെച്ച് ആനന്ദ് മഹീന്ദ്ര
തലശ്ശേരി- മാഹി ബൈപ്പാസിന്റെ സൗന്ദര്യത്തെ പ്രകീര്‍ത്തിച്ച് പ്രമുഖ വ്യവസായി ആനന്ദ് മഹീന്ദ്ര. ബൈപ്പാസിന്റെ ചിത്രം എക്‌സില്‍ പങ്കുവെച്ചുകൊണ്ടാണ് മഹീന്ദ്രയുടെ കുറിപ്പ്. അംബരചുംബിയായ കെട്ടിടം ഭൂമിയില്‍ കിടക്കുന്നതു പോലെ എന്നാണ് ആനന്ദ് മഹീന്ദ്ര അഭിപ്രായപ്പെട്ടത്.
‘തലശ്ശേരി-മാഹി ബൈപാസ്. ഒരു അംബരചുംബി ഭൂമിയില്‍ കിടക്കുന്നത് പോലെ…
സ്വാഭാവിക ഭൂപ്രകൃതിയില്‍ കോണ്‍ക്രീറ്റ് അടിച്ചേല്‍പ്പിക്കുന്നതുപോലെയാണ് ആദ്യം അത് തോന്നിയത്.
എന്നാല്‍ അതിന് അതിന്റേതായ സൗന്ദര്യാത്മകതയുണ്ട്.
അതിലൂടെ യാത്ര ചെയ്യാനും ഇരുവശത്തുമുള്ള സൗന്ദര്യത്തെ അഭിനന്ദിക്കാനും ഉള്ള പ്രലോഭനത്തെ എനിക്ക് നിഷേധിക്കാനാവില്ല’. ആനന്ദ് മഹീന്ദ്ര എക്‌സില്‍ കുറിച്ചു.
എക്‌സില്‍ ഒരുകോടിയിലേറെ ഫോളോവേഴ്‌സുള്ള വ്യക്തിയാണ് ആനന്ദ് മഹീന്ദ്ര. ഇതുവരെ 236900 പേര്‍ ചിത്രം ഇതുവരെ കണ്ടിട്ടുണ്ട്. 5100 പേര്‍ ചിത്രം ലൈക് ചെയ്യുകയും ചെയ്തിട്ടുണ്ട്. കണ്ണൂര്‍ മുഴപ്പിലങ്ങാട് മുതല്‍ അഴിയൂര്‍ വരെ നീണ്ടു കിടക്കുന്ന തലശ്ശേരി-മാഹി ദേശീയപാത മാര്‍ച്ച് 11 നാണ് ഉദ്ഘാടനം ചെയ്തത്. കേരളത്തിൽ പ്രശസ്തമായ വയൽക്കിളി സമരം നടന്നതും കോൺഗ്രസും ബിജെപിയും അടക്കമുള്ള പ്രതിപക്ഷ കക്ഷികൾ സമരം ചെയ്തതും ഈ ബൈപ്പാസിനുള്ള ഭൂമിയേറ്റെടുക്കുന്നതിന് ഇടയിലാണ്.
