ധനക്കമ്മി 2.2 ശതമാനമായി കുറഞ്ഞു; ഇയു കമ്മീഷൻ മാൾട്ടയ്ക്കെതിരെയുള്ള അമിത ധനക്കമ്മി നടപടികൾ അവസാനിപ്പിക്കാൻ ശുപാർശ ചെയ്തേക്കും
യൂറോപ്യൻ കമ്മീഷൻ മാൾട്ടയ്ക്കെതിരെയുള്ള അമിത ധനക്കമ്മി നടപടികൾ അവസാനിപ്പിക്കാൻ ശുപാർശ ചെയ്തേക്കും. രാജ്യത്തെ ധനക്കമ്മിയിലുണ്ടായ കുറവാണ് ഇതിന് പ്രധാന കാരണം.
ധനക്കമ്മി നടപടികളിൽ നിന്ന് ഒഴിവാക്കപ്പെടുന്ന ഏക രാജ്യം മാൾട്ട ആയിരിക്കും എന്നാണ് കരുതപ്പെടുന്നത്. ജൂലൈയിൽ നടക്കുന്ന ഇക്കണോമിക് ആൻഡ് ഫിനാൻഷ്യൽ അഫയേഴ്സ് കൗൺസിൽ (ECOFIN) യോഗം ഈ ശുപാർശക്ക് അംഗീകാരം നൽകണം. ഇതൊരു ഔദ്യോഗിക നടപടി മാത്രമായിരിക്കുമെന്നാണ് സൂചനകൾ. യൂറോപ്യൻ യൂണിയൻ അംഗരാജ്യങ്ങളിലെ സാമ്പത്തിക-ധനകാര്യ മന്ത്രിമാർ ഈ യോഗത്തിൽ പങ്കെടുക്കും.
വേനൽക്കാലത്തോടെ രാജ്യം ഈ നടപടിക്രമങ്ങളിൽ നിന്ന് പുറത്തുവരുമെന്ന് 2026 ഏപ്രിലിൽ മാൾട്ടയുടെ ധനകാര്യ പ്രവചനം അവതരിപ്പിക്കവെ ധനമന്ത്രി ക്ലൈഡ് കരുവാന സൂചിപ്പിച്ചിരുന്നു. 2025 അവസാനത്തോടെ മാൾട്ടയുടെ ധനക്കമ്മി 2.2 ശതമാനമായി കുറഞ്ഞുവെന്ന് അദ്ദേഹം ഏപ്രിലിൽ പ്രഖ്യാപിച്ചിരുന്നു. ഇത് നേരത്തെ പ്രവചിച്ചിരുന്ന 3.2 ശതമാനത്തേക്കാൾ കുറവാണ് എന്ന് മാത്രമല്ല, യൂറോപ്യൻ യൂണിയൻ നിശ്ചയിച്ചിട്ടുള്ള 3 ശതമാനം എന്ന പരിധിയേക്കാൾ താഴെയുമാണ്.
കോവിഡ് പാൻഡെമിക്കിന് ശേഷം ആദ്യമായാണ് മാൾട്ടയുടെ ധനകമ്മി ഈ പരിധിക്ക് താഴെയെത്തുന്നത്. വരും വർഷങ്ങളിൽ ധനക്കമ്മി ഇനിയും കുറയുമെന്ന് അദ്ദേഹം കൂട്ടിച്ചേർത്തു. ഊർജ്ജ വില നിയന്ത്രിച്ചു നിർത്തുന്നതിനുള്ള ചിലവുകൾക്കിടയിലും, 2028 വരെ ഓരോ വർഷവും ധനക്കമ്മിയിൽ കുറവുണ്ടാകുമെന്നാണ് പ്രവചനങ്ങൾ സൂചിപ്പിക്കുന്നത്.
സാമ്പത്തിക വളർച്ച നിലനിർത്തുന്നതിനായി ധനക്കമ്മി ഘട്ടംഘട്ടമായി കുറയ്ക്കാനാണ് സർക്കാർ ലക്ഷ്യമിട്ടിരുന്നതെന്ന് കരുവാന പറഞ്ഞു. മാൾട്ടയുടെ ധനകാര്യ പ്രവചനങ്ങൾ അനുസരിച്ച്, 2029 ലും 2030 ലും രാജ്യം ബജറ്റ് മിച്ചം (Budget Surplus) രേഖപ്പെടുത്തുമെന്നാണ് പ്രതീക്ഷിക്കുന്നത്. മെയ് മാസത്തിൽ പ്രസിദ്ധീകരിച്ച യൂറോപ്യൻ കമ്മീഷന്റെ സ്പ്രിംഗ് ഫോർകാസ്റ്റ് അനുസരിച്ച്, മാൾട്ടയുടെ ധനക്കമ്മി 2027 ഓടെ 2.1 ശതമാനമായി കുറയുമെന്നും സ്ഥിരത കൈവരിക്കുമെന്നും പ്രവചിക്കുന്നു.
