ശമ്പളം കുടിശ്ശിക : വ്യവസായ തർക്കം പ്രഖ്യാപിച്ച് മാൾട്ട സർവകലാശാല അധ്യാപക സംഘടന
പുതിയ കൂട്ടായ കരാർ പ്രകാരം ലഭിക്കേണ്ട ശമ്പള കുടിശ്ശിക നവംബറിലെ ശമ്പളത്തിലും ഉൾപ്പെടുത്താത്തതിനെ തുടർന്ന് യൂണിവേഴ്സിറ്റി ഓഫ് മാൾട്ട അക്കാദമിക് സ്റ്റാഫ് അസോസിയേഷൻ (UMASA) വ്യാവസായിക തർക്കം പ്രഖ്യാപിച്ചു. വരും ദിവസങ്ങളിൽ കൃത്യമായ തീരുമാനം ഉണ്ടായില്ലെങ്കിൽ സമരത്തിലേക്ക് കടക്കുമെന്ന് യൂണിയൻ അംഗങ്ങൾക്ക് അയച്ച ഇമെയിലിൽ മുന്നറിയിപ്പ് നൽകി.
2027 ജനുവരി 28-നകം കുടിശ്ശിക തുക പൂർണ്ണമായി നൽകുമെന്ന ഉറപ്പ് ലഭിക്കാത്ത സാഹചര്യത്തിൽ സർവകലാശാല റെക്ടറെ തർക്കവിവരം ഔദ്യോഗികമായി അറിയിച്ചതായി യൂണിയൻ വ്യക്തമാക്കി. വരുന്ന ശമ്പളത്തിൽ കുടിശ്ശിക തുക തന്നില്ലെങ്കിൽ വ്യാവസായിക സമരം ആരംഭിക്കുമെന്ന് ഒക്ടോബറിൽ യൂണിയൻ മുന്നറിയിപ്പ് നൽകിയിരുന്നു.
കഴിഞ്ഞ മേയിൽ ഒപ്പുവെക്കുകയും 95% യൂണിയൻ അംഗങ്ങൾ അംഗീകരിക്കുകയും ചെയ്ത കരാറിൻ്റെ അടിസ്ഥാനത്തിലാണ് തുക ലഭിക്കാനുള്ളത്. 2024 മുതൽ 2029 വരെയുള്ള കാലയളവിൽ അധ്യാപകരുടെ വിവിധ തസ്തികകളിലെ ശമ്പളത്തിൽ കാര്യമായ വർദ്ധനവ് വരുത്തുന്നതാണ് ഈ കരാർ.
2024 മുതൽ മുൻകാല പ്രാബല്യത്തോടെ 12% മുതൽ 13% വരെ ശമ്പള വർദ്ധനവ് കരാറിൽ ഉൾപ്പെടുത്തിയിട്ടുള്ളതിനാൽ, അധ്യാപകർക്ക് വലിയൊരു തുക കുടിശ്ശികയായി ലഭിക്കാനുണ്ട്. പ്രൊഫസർമാർക്ക് 25,000 യൂറോ മുതൽ 30,000 യൂറോ വരെയും, ലക്ചറർമാർക്കും സീനിയർ ലക്ചറർമാർക്കും 17,000 യൂറോ മുതൽ 20,000 യൂറോ വരെയുമാണ് കുടിശ്ശികയിനത്തിൽ ലഭിക്കേണ്ടത്. അസിസ്റ്റന്റ് ലക്ചറർമാർക്കും ടീച്ചിംഗ് അസോസിയേറ്റുകൾക്കും 10,000 യൂറോ മുതൽ 12,000 യൂറോ വരെ ലഭിക്കും.
കുടിശ്ശിക നൽകുന്നത് വൈകുന്ന വിഷയത്തിൽ റെക്ടർക്കും സർവകലാശാല മാനേജ്‌മെന്റിനും ഉന്നത വിദ്യാഭ്യാസ മന്ത്രിക്കും നിരന്തരം നിവേദനങ്ങൾ നൽകിയിട്ടുണ്ടെന്ന് യൂണിയൻ അറിയിച്ചു. വിഷയത്തിലെ തുടർന്നുള്ള സംഭവവികാസങ്ങൾ അംഗങ്ങളെ ഉടൻ അറിയിക്കുമെന്നും UMASA വ്യക്തമാക്കി.
