വൻ സഹാറ മണൽക്കാറ്റ് മധ്യ മെഡിറ്ററേനിയൻ മേഖലയിലേക്ക് വ്യാപിക്കുന്നു; മാൾട്ടയിൽ അതീവ ജാഗ്രത
വടക്കേ ആഫ്രിക്കയിൽ നിന്ന് ഉയർന്നുവന്ന കൂറ്റൻ സഹാറ മണൽക്കാറ്റ് മധ്യ മെഡിറ്ററേനിയൻ കടലിന് മുകളിലൂടെ വ്യാപിക്കുന്നതായി ഉപഗ്രഹ ചിത്രങ്ങൾ വ്യക്തമാക്കുന്നു. സ്പെയിനിലെ ബലേറിക് ദ്വീപുകൾ മുതൽ ക്രീറ്റ് വരെയുള്ള വിശാലമായ പ്രദേശത്ത് ഈ മണൽക്കാറ്റ് പടർന്നുപന്തലിച്ചിരിക്കുകയാണെന്ന് യൂമെറ്റ്സാറ്റ് (EUMETSAT) പ്ലാറ്റ്ഫോമിൽ നിന്നുള്ള ദൃശ്യങ്ങൾ കാണിക്കുന്നു. മാൾട്ട, സിസിലി, ദക്ഷിണ ഇറ്റലി എന്നിവിടങ്ങളിലാണ് മണൽക്കാറ്റിന്റെ തീവ്രത ഏറ്റവും കൂടുതൽ അനുഭവപ്പെടുന്നത്.
ഇതിനൊപ്പം അതിരൂക്ഷമായ ചൂടും അനുഭവപ്പെടുന്ന പശ്ചാത്തലത്തിൽ മാൾട്ട ഇന്റർനാഷണൽ എയർപോർട്ടിലെ കാലാവസ്ഥാ നിരീക്ഷണ കേന്ദ്രം ഓറഞ്ച് മുന്നറിയിപ്പ് (Orange Warning) പുറപ്പെടുവിച്ചിട്ടുണ്ട്. ബുധനാഴ്ച മാൾട്ടയിൽ 41°C താപനില രേഖപ്പെടുത്തി, അനുഭവവേദ്യമായ ചൂട് (feels-like temperature) 42°C വരെ ഉയർന്നു.
ഓഗസ്റ്റ് 31 തിങ്കളാഴ്ച വരെ ഉയർന്ന താപനില 36°C മുതൽ 38°C വരെ തുടരാനാണ് സാധ്യത. അടുത്ത അഞ്ച് ദിവസങ്ങളിൽ അനുഭവവേദ്യമായ ചൂട് 41°C ആയിരിക്കുമെന്നും കാലാവസ്ഥാ പ്രവചനത്തിൽ പറയുന്നു. രാത്രിയിലെ കുറഞ്ഞ താപനില 27°C മുതൽ 28°C വരെയായിരിക്കും.
