ഇംപീച്ച്മെന്റിനെക്കുറിച്ച് ആശങ്കയില്ല, അത് ഡെമക്രാറ്റിക് പാർട്ടിയുടെ തകർച്ചയ്ക്ക് വഴിവയ്ക്കും : ട്രംപ്
വാഷിങ്ടൺ ഡിസി : യു.എസ്. പ്രസിഡന്റ് ഡൊണാൾഡ് ട്രംപിന്റെ റിപ്പബ്ലിക്കൻ പാർട്ടി ഇടക്കാല തിരഞ്ഞെടുപ്പിൽ കനത്ത തിരിച്ചടി നേരിട്ടതിനു പിന്നാലെ ഇംപീച്ച്മെന്റ് ഭീഷണി തള്ളി ട്രംപ്. ഇംപീച്ച്മെന്റിനെക്കുറിച്ച് ആശങ്കയില്ലെന്നും അത്തരമൊരു നീക്കം നടത്തിയാൽ അത് ഡെമക്രാറ്റിക് പാർട്ടിയുടെ തകർച്ചയ്ക്ക് വഴിവയ്ക്കുമെന്നും ട്രംപ് പറഞ്ഞു. മാധ്യമപ്രവർത്തകരുടെ ചോദ്യങ്ങളോട് പ്രതികരിക്കുകയായിരുന്നു അദ്ദേഹം. ഇംപീച്ച്മെന്റ് ഭയപ്പെടുത്തുന്നുണ്ടോ എന്ന ചോദ്യത്തിന്, ‘ഒട്ടും ആശങ്കയില്ല. അങ്ങനെ ചെയ്താൽ ഡെമക്രാറ്റിക് പാർട്ടി തകരുമെന്നാണ് ഞാൻ കരുതുന്നത്’ എന്നായിരുന്നു മറുപടി.
ഇംപീച്ച്മെന്റിന് എന്താണ് കാരണമെന്ന ചോദ്യവും ട്രംപ് ഉയർത്തി. ‘ഒരു കാരണവുമില്ലാതെ ഇംപീച്ച്മെന്റ് ചെയ്യുകയോ? വിജയകരമായി ഒരു രാജ്യത്തെ നയിക്കുന്നതിനാണോ ഇംപീച്ച്മെന്റ്?’ എന്നായിരുന്നു പ്രതികരണം. യു.എസ്. ചരിത്രത്തിലെ ഏറ്റവും വിജയകരമായ കാലഘട്ടങ്ങളിലൊന്നിലൂടെയാണ് രാജ്യം കടന്നുപോവുന്നതെന്നും ട്രംപ് അവകാശപ്പെട്ടു. ഇടക്കാല തിരഞ്ഞെടുപ്പിൽ സെനറ്റിലും ജനപ്രതിനിധിസഭയിലും ഡെമക്രാറ്റുകൾക്ക് ആധിപത്യം ലഭിച്ചതിന് പിന്നാലെയാണ് ട്രംപിന്റെ പ്രതികരണം.
സാധാരണമായി റിപ്പബ്ലിക്കൻ പാർട്ടിക്ക് വലിയ മുൻതൂക്കമുള്ള സംസ്ഥാനങ്ങളിൽപോലും ഡെമക്രാറ്റുകൾ സീറ്റുകൾ പിടിച്ചെടുത്തു. തിരഞ്ഞെടുപ്പിലെ കനത്ത തിരിച്ചടി ട്രംപ് ഭരണകൂടത്തിന്റെ നയങ്ങളെക്കുറിച്ച് പുതിയ ചോദ്യങ്ങളുയർത്തിയിട്ടുണ്ട്. പ്രത്യേകിച്ച് ഇറാനെതിരായ യു.എസിന്റെയും ഇസ്രയേലിന്റെയും യുദ്ധം വോട്ടർമാർക്കിടയിൽ വലിയ രോഷത്തിന് വഴിവെച്ചതാണ്‌ ഭരണകൂടത്തിന് തിരിച്ചടിയായത്.
തിരഞ്ഞെടുപ്പിലെ പരാജയത്തിനു പിന്നാലെ പൊതുപരിപാടിയിൽ പങ്കെടുത്ത ട്രംപ്, തിരഞ്ഞെടുപ്പ് തിരിച്ചടിയെക്കുറിച്ച് പ്രതികരിക്കുന്നതിനു പകരം വൈറ്റ് ഹൗസിൽ നിർമിക്കുന്ന പുതിയ നിർമാണത്തെക്കുറിച്ച് പരിചയപ്പെടുത്തുന്നതിനാണ് കൂടുതൽ പ്രാധാന്യം നൽകിയത്. രാവിലെ വാർത്താസമ്മേളനങ്ങളിലോ പ്രതികരണങ്ങളിലോ പങ്കെടുക്കാതിരുന്ന ട്രംപ് പിന്നീട് മാധ്യമപ്രവർത്തകരെ പെട്ടെന്ന് നിർമാണസ്ഥലത്തേക്ക് വിളിച്ചുവരുത്തുകയായിരുന്നു. പുതിയ കെട്ടിടത്തിന്റെ അവസാന സ്റ്റീൽ ബീം ഉയർത്തുന്ന ചടങ്ങിലായിരുന്നു അദ്ദേഹം പങ്കെടുത്തത്.
