റിവേഞ്ച് പോൺ ഇരകൾക്കായി പുതിയ ‘1779’ ഹെൽപ്ലൈൻ ആരംഭിച്ചു
റിവേഞ്ച് പോൺ ഉൾപ്പെടെയുള്ള ഡിജിറ്റൽ ലൈംഗിക അധിക്രമങ്ങൾക്ക് ഇരയാകുന്നവരെ സഹായിക്കുന്നതിനായി സർക്കാർ പുതിയ ‘1779’ ഹെൽപ്ലൈൻ നമ്പർ ആരംഭിച്ചു. വ്യക്തികളുടെ സമ്മതമില്ലാതെ അവരുടെ സ്വകാര്യ ചിത്രങ്ങളോ വീഡിയോകളോ പ്രചരിപ്പിക്കുന്നതും, അവ പ്രചരിപ്പിക്കുമെന്ന് ഭീഷണിപ്പെടുത്തുന്നതും തടയുന്നതിനും ഇരകൾക്ക് ആവശ്യമായ പിന്തുണ നൽകുന്നതിനുമാണ് ഈ സേവനം ലക്ഷ്യമിടുന്നത്.
ഈ വിഷമഘട്ടത്തിൽ ഇരകൾ ഒറ്റയ്ക്കല്ലെന്ന് ഉറപ്പുവരുത്താനും, അവർക്ക് മാനസിക പിന്തുണയും സുരക്ഷാ മാർഗ്ഗനിർദ്ദേശങ്ങളും ആവശ്യമായ വിവരങ്ങളും നൽകാനും ഈ ഹെൽപ്ലൈൻ വഴി സാധിക്കും. ചൊവ്വാഴ്ച രാവിലെ സോഷ്യൽ പോളിസി മിനിസ്റ്റർ മൈക്കൽ ഫാൽസൺ ആണ് പുതിയ ഹെൽപ്ലൈൻ പ്രഖ്യാപിച്ചത്.
“ചിത്രങ്ങൾ പ്രചരിപ്പിക്കാൻ ഏതാനും നിമിഷങ്ങൾ മാത്രം മതി, എന്നാൽ അതിന്റെ ആഘാതം ഇരയായ വ്യക്തിയുടെ ജീവിതകാലം മുഴുവൻ പിന്തുടരും. അതിനാൽ ഭയം വെടിഞ്ഞ് മുന്നോട്ടുവരാനും ആവശ്യമായ പിന്തുണ സ്വീകരിക്കാനും ഞാൻ അഭ്യർത്ഥിക്കുന്നു,” മൈക്കൽ ഫാൽസൺ പറഞ്ഞു.
വിളിക്കുന്നവരുടെ വിവരങ്ങൾ തികച്ചും രഹസ്യമായി സൂക്ഷിക്കുമെന്നും, കുറ്റപ്പെടുത്തലുകളില്ലാതെ കേൾക്കാനും മാനസിക പിന്തുണ നൽകാനും ജീവനക്കാർ സജ്ജരാണെന്നും ഫൗണ്ടേഷൻ ഫോർ സോഷ്യൽ വെൽഫെയർ സർവീസസ് (FSWS) സി.ഇ.ഒ ആൽഫ്രഡ് ഗ്രിക്സ്റ്റി വ്യക്തമാക്കി. ആവശ്യമായ പ്രായോഗിക നടപടികൾ സ്വീകരിക്കാനും മറ്റ് അനുബന്ധ സേവനങ്ങളിലേക്ക് വഴിതിരിച്ചുവിടാനും ഈ ഹെൽപ്ലൈൻ സഹായിക്കും.
സ്വന്തം ഭാഗത്ത് തെറ്റുണ്ടെന്ന ഭയം, മറ്റുള്ളവർ വിശ്വസിക്കില്ലെന്ന ചിന്ത, പരാതി നൽകിയാൽ ചിത്രങ്ങൾ കൂടുതൽ പ്രചരിക്കപ്പെടുമോ എന്ന ഭയം എന്നിവയാണ് പലപ്പോഴും ഇരകളെ സഹായം തേടുന്നതിൽ നിന്ന് പിന്നോട്ട് വലിക്കുന്നത്. ഇത്തരം ഭയങ്ങളെ തരണം ചെയ്യാൻ പുതിയ സംവിധാനം സഹായിക്കുമെന്ന് വാർത്താസമ്മേളനത്തിൽ വ്യക്തമാക്കി.
