ഗ്സീറയിൽ ഇരുമ്പുകടയിലുണ്ടായ വൻ തീപിടിത്തം; 18 മണിക്കൂർ നീണ്ട പ്രയത്നത്തിനൊടുവിൽ തീയണച്ചു
ഗ്സീറയിലുള്ള ഇരുമ്പുകടയിൽ വൻ തീപിടിത്തം. 18 മണിക്കൂർ നീണ്ട തീവ്രശ്രമത്തിനൊടുവിൽ അഗ്നിശമന സേന തീ നിയന്ത്രണവിധേയമാക്കി. തീയണയ്ക്കുന്നതിനായി 1.75 ലക്ഷം ലിറ്റർ വെള്ളവും 10,000 ലിറ്റർ ഫയർഫൈറ്റിംഗ് ഫോമും (Foam) ഉപയോഗിച്ചതായി സിവില് പ്രൊട്ടക്ഷൻ ഡിപ്പാർട്ട്മെന്റ് (CPD) അറിയിച്ചു.
ബുധനാഴ്ച ഉച്ചയ്ക്ക് 2:30-ഓടെ ആരംഭിച്ച രക്ഷാപ്രവർത്തനം വ്യാഴാഴ്ച രാവിലെ 9 മണിയോടെയാണ് അവസാനിച്ചത്. കെട്ടിടത്തിനുള്ളിൽ അവശേഷിച്ച ചെറിയ തീപ്പൊരികളും തീയണച്ച ഭാഗങ്ങളിലെ ചൂടും പൂർണ്ണമായി ഒഴിവാക്കുന്നതിനായി രക്ഷാപ്രവർത്തകർ രാത്രി മുഴുവൻ സ്ഥലത്ത് തുടരുകയായിരുന്നു.
സമീപകാലത്തുണ്ടായ ഏറ്റവും വലിയ രക്ഷാപ്രവർത്തനങ്ങളിലൊന്നാണിത്. ആകെ 55 അഗ്നിശമന സേനാംഗങ്ങളും 15 ഫയർ എൻജിനുകളും ദൗത്യത്തിൽ പങ്കാളികളായി.
കടയുടെ ഗ്രൗണ്ട് ഫ്ലോറിലെ വിൽപ്പന കേന്ദ്രത്തെയും ബേസ്മെന്റിലെ സ്റ്റോറേജ് സൗകര്യത്തെയുമാണ് തീപിടിത്തം ബാധിച്ചത്. വിവിധ തരത്തിലുള്ള വസ്തുക്കൾ ഉള്ളിൽ സൂക്ഷിച്ചിരുന്നതിനാൽ രക്ഷാപ്രവർത്തനം ഏറെ വെല്ലുവിളി നിറഞ്ഞതായിരുന്നു.
ആദ്യഘട്ടത്തിൽ എട്ട് ഫയർ എൻജിനുകൾ, ഒരു ഏരിയൽ ലാഡർ, ഫോം ടെൻഡർ എന്നിവ ഉപയോഗിച്ചാണ് തീ നിയന്ത്രണവിധേയമാക്കിയത്. സംഭവത്തിൽ ആർക്കും പരിക്കേറ്റതായി റിപ്പോർട്ടില്ല.
ഡിസ്ട്രിക്റ്റ് 7 പോലീസ് ഉദ്യോഗസ്ഥർ, ഡിറ്റൻഷൻ സർവീസ് ഉദ്യോഗസ്ഥർ, മാറ്റർ ഡീ ആശുപത്രിയിലെ എമർജൻസി വിഭാഗത്തിൽ നിന്നുള്ള മെഡിക്കൽ ടീം എന്നിവർ രക്ഷാപ്രവർത്തനങ്ങൾക്ക് പിന്തുണ നൽകി. ദൗത്യത്തിൽ പങ്കെടുത്ത എല്ലാ സേനാംഗങ്ങൾക്കും സഹകരിച്ച ഏജൻസികൾക്കും സി.പി.ഡി നന്ദി അറിയിച്ചു.
