എയർ മാൾട്ട മുൻ ജീവനക്കാർ കരാർ നിർദ്ദേശം തളി; ആർഎസ്എസ്എല്ലിൽ പണിമുടക്ക് മുന്നറിയിപ്പുമായി ജിഡബ്ല്യൂയു
റിസോഴ്സ് സപ്പോർട്ട് & സർവീസസ് ലിമിറ്റഡിലെ (RSSL) എയർ മാൾട്ടയിലെ മുൻ ജീവനക്കാർ പുതിയ കൂട്ടായ കരാർ (Collective Agreement) നിർദ്ദേശങ്ങൾ തള്ളിയതിനെത്തുടർന്ന് ജനറൽ വർക്കേഴ്സ് യൂണിയൻ (GWU) വ്യവസായ പ്രക്ഷോഭത്തിന് (Industrial Action) നോട്ടീസ് നൽകി.
കരാറിലെ പുതിയ വ്യവസ്ഥകളും നിബന്ധനകളും വിശദീകരിക്കുന്നതിനായി വിളിച്ചുചേർത്ത വിശദീകരണ യോഗത്തിലാണ് യൂണിയൻ അംഗങ്ങൾ തങ്ങളുടെ ശക്തമായ എതിർപ്പ് അറിയിച്ചത്. നിലവിലെ രൂപത്തിൽ നിർദ്ദിഷ്ട കരാർ അംഗീകരിക്കാൻ കഴിയില്ലെന്ന് അംഗങ്ങൾ വ്യക്തമാക്കിയതായി തിങ്കളാഴ്ച ജിഡബ്ല്യുയു അറിയിച്ചു.
ആർഎസ്എസ്എല്ലിലെ മുൻ എയർ മാൾട്ട ജീവനക്കാരുടെ മുൻകാല കരാർ കാലാവധി അവസാനിച്ചതിനെ തുടർന്നാണ് തർക്കം ഉടലെടുത്തത്. ജീവനക്കാരുടെ കുടിശ്ശിക തുകയുമായി ബന്ധപ്പെട്ട വിഷയം മൂന്നര വർഷമായി തീർപ്പാകാതെ കിടക്കുകയാണെന്നും, ഈ മുഴുവൻ കാലയളവിലെയും കുടിശ്ശിക നൽകാൻ കമ്പനി വിസമ്മതിക്കുകയാണെന്നും യൂണിയൻ പറഞ്ഞു. ചർച്ചകളിൽ തങ്ങൾ മുന്നോട്ടുവെച്ച ആവശ്യങ്ങളിൽ നിന്ന് ഏറെ അകലെയാണ് കമ്പനിയുടെ നിർദ്ദേശങ്ങളെന്നും അംഗങ്ങളുടെ ആശങ്കകൾ ന്യായമായ രീതിയിൽ പരിഹരിക്കപ്പെടണമെന്നും ജിഡബ്ല്യുയു ആവശ്യപ്പെട്ടു.
നിലവിലുള്ള കൂട്ടായ കരാർ പ്രകാരം ലഭിച്ചുകൊണ്ടിരിക്കുന്ന ആനുകൂല്യങ്ങളും സേവന വ്യവസ്ഥകളും വെട്ടിക്കുറയ്ക്കുകയോ ഒഴിവാക്കുകയോ ചെയ്യുന്ന നിർദ്ദേശങ്ങളെക്കുറിച്ചും യൂണിയൻ ആശങ്ക പ്രകടിപ്പിച്ചു. നിലവിലുള്ള സാമ്പത്തിക ആനുകൂല്യങ്ങൾ കുറയ്ക്കാനോ പിൻവലിക്കാനോ പാടില്ലെന്ന് വ്യക്തമാക്കുന്ന രേഖകൾ ചൂണ്ടിക്കാട്ടിയാണ് യൂണിയന്റെ പ്രതികരണം.
വ്യവസായ, തൊഴിൽ ബന്ധ ഡയറക്ടർക്ക് (DIER) മുന്നിലുള്ള തർക്ക പരിഹാര നടപടികൾക്കിടയിലടക്കം ഒന്നിലധികം തവണ ഈ ആശങ്കകൾ ആർഎസ്എസ്എല്ലിനെ അറിയിച്ചിട്ടുണ്ടെങ്കിലും പ്രധാന വിഷയങ്ങളിൽ തീരുമാനമായിട്ടില്ലെന്ന് യൂണിയൻ വ്യക്തമാക്കി.
ജീവനക്കാരുടെ പങ്ക് വ്യക്തമായതോടെ, തൃപ്തികരമായ മറുപടി കമ്പനിയുടെ ഭാഗത്തുനിന്ന് ഉണ്ടായില്ലെങ്കിൽ കരാറിന്റെ പരിധിയിൽ വരുന്ന എല്ലാ ജീവനക്കാരെയും ഉൾപ്പെടുത്തി വ്യവസായ പ്രക്ഷോഭം ആരംഭിക്കുമെന്ന് ജിഡബ്ല്യുയു ഔദ്യോഗികമായി ആർഎസ്എസ്എല്ലിന് മുന്നറിയിപ്പ് നൽകി. കൂടാതെ നിയമപരവും തൊഴിൽപരവുമായ തുടർനടപടികൾ സ്വീകരിക്കാനുള്ള അവകാശം നിലനിർത്തുന്നതായും യൂണിയൻ അറിയിച്ചു.
അതേസമയം, ചർച്ചകൾക്ക് ഇപ്പോഴും വാതിലുകൾ തുറന്നിട്ടിരിക്കുകയാണെന്നും ജീവനക്കാരുടെ അവകാശങ്ങളും ആനുകൂല്യങ്ങളും തൊഴിൽ സാഹചര്യങ്ങളും സംരക്ഷിക്കുന്ന ന്യായമായ ഒരു കരാറിലെത്താൻ നിരന്തരം ശ്രമിക്കുമെന്നും യൂണിയൻ വ്യക്തമാക്കി.
