പുതിയ സമത്വ ബിൽ പരമാധികാരത്തെയും കത്തോലിക്കാ മൂല്യങ്ങളെയും ബാധിക്കുമെന്ന് ആശങ്ക; സഭാ സ്കൂളുകൾ രംഗത്ത്
പുതിയ സമത്വ ബിൽ (Equality Bill) സഭാ സ്കൂളുകളുടെ ഭരണഘടനാപരമായ അവകാശങ്ങളെയും കത്തോലിക്കാ തനിമയെയും ബാധിക്കുമെന്ന ആശങ്കയുമായി ചർച്ച് സ്കൂൾസ് അസോസിയേഷൻ (Church Schools Association). വിഷയം വിശദമായി പഠിക്കുന്നതിനും പൊതുജനങ്ങളുമായി കൂടിയാലോചിക്കുന്നതിനും ആവശ്യത്തിന് സമയം നൽകാതെയാണ് ബിൽ പാർലമെന്റിൽ അവതരിപ്പിച്ചിരിക്കുന്നതെന്നും, അതിനാൽ ബിൽ പാസാക്കുന്നത് നീട്ടിവെക്കണമെന്നും സംഘടന സർക്കാരിനോട് ആവശ്യപ്പെട്ടു.
മനുഷ്യാവകാശ, സമത്വ കമ്മീഷൻ രൂപീകരിക്കുന്നതിനുള്ള നിയമനിർമ്മാണം പാർലമെന്റിൽ ചർച്ച ചെയ്യുന്നതിനിടയിലാണ് അസോസിയേഷൻ പ്രസ്താവനയിറക്കിയത്. വേനൽക്കാല അവധിക്ക് മുന്നോടിയായി മതിയായ ചർച്ചകളില്ലാതെ ബിൽ ധൃതിപിടിച്ച് പാസാക്കാൻ ശ്രമിക്കുകയാണെന്ന് അവർ ആരോപിച്ചു.
അന്തസ്സും സമത്വവും പ്രോത്സാഹിപ്പിക്കുന്നതിനോട് പൂർണ്ണമായും യോജിക്കുമ്പോഴും, നിർദ്ദേശിത നിയമനിർമ്മാണം സഭാ സ്കൂളുകളുടെ പരമാധികാരത്തെയും അവയുടെ സവിശേഷമായ കത്തോലിക്കാ മൂല്യങ്ങൾ നിലനിർത്താനുള്ള കഴിവിനെയും ചോദ്യം ചെയ്യുന്നതാണെന്ന് അസോസിയേഷൻ ചൂണ്ടിക്കാട്ടി. മുൻപത്തെ കൂടിയാലോചനകളിൽ ഉയർന്നുവന്ന പ്രധാന വിഷയങ്ങൾ നിലവിലെ കരട് ബില്ലിൽ ഒഴിവാക്കപ്പെട്ടിട്ടുണ്ടെന്നും അവർ വ്യക്തമാക്കി.
സ്വന്തം മതപരമായ ഐഡന്റിറ്റിക്കും മൂല്യങ്ങൾക്കും അനുസൃതമായി വിദ്യാലയങ്ങൾ സ്ഥാപിക്കാനും ഭരിക്കാനുമുള്ള അവകാശം ഭരണഘടനയും അന്താരാഷ്ട്ര മനുഷ്യാവകാശ കരാറുകളും ഉറപ്പുനൽകുന്നുണ്ടെന്ന് അസോസിയേഷൻ ഓർമ്മിപ്പിച്ചു. അതിനാൽ ഈ വിഷയത്തിൽ കൂടുതൽ കൂടിയാലോചനകൾക്ക് സമയം നൽകണമെന്നും, സമത്വ സംരക്ഷണവും സഭാ സ്കൂളുകളുടെ സ്വയംഭരണാവകാശവും തമ്മിൽ കൃത്യമായ സന്തുലിതാവസ്ഥ ഉറപ്പാക്കുന്ന തരത്തിൽ ബില്ലിൽ ആവശ്യമായ ഭേദഗതികൾ വരുത്തണമെന്നും സംഘടന കോർഡിനേറ്റർ സ്റ്റീഫൻ കാച്ചിയ (Stephen Cachia) ഒപ്പുവെച്ച പ്രസ്താവനയിൽ ആവശ്യപ്പെട്ടു.
സർക്കാരുമായും എം.പിമാരുമായും മറ്റ് ബന്ധപ്പെട്ട വിഭാഗങ്ങളുമായും നിർമ്മാണാത്മകമായ ചർച്ചകൾക്ക് തങ്ങൾ തയ്യാറാണെന്നും സംഘടന അറിയിച്ചു.
സർക്കാർ അവതരിപ്പിച്ച സമത്വ ബില്ലിന്റെ ലക്ഷ്യം സമൂഹത്തിലെ ഏറ്റവും ദുർബല വിഭാഗങ്ങൾക്ക് കൂടുതൽ ശക്തമായ നിയമപരമായ സംരക്ഷണവും ശബ്ദവും നൽകുക എന്നതാണ്.
ബിൽ നിയമമായാൽ നിലവിലുള്ള നാഷണൽ കമ്മീഷൻ ഫോർ ദ പ്രൊമോഷൻ ഓഫ് ഇക്വാളിറ്റിയ്ക്ക് പകരം നാഷണൽ കമ്മീഷൻ ഫോർ ഹ്യൂമൻ റൈറ്റ്സ് ആൻഡ് ഇക്വാളിറ്റി രൂപീകരിക്കും. മനുഷ്യാവകാശ ലംഘനങ്ങളും വിവേചന പരാതികളും അന്വേഷിക്കാനുള്ള അധികാരം ഈ പുതിയ കമ്മീഷന് ലഭിക്കും.
വ്യക്തികൾക്കും കമ്പനികൾക്കും മറ്റ് സ്ഥാപനങ്ങൾക്കും ഒരുപോലെ ബാധകമാകുന്ന നിയമം തൊഴിൽ, വിദ്യാഭ്യാസം, സാധന-സേവനങ്ങളിലേക്കുള്ള പ്രവേശനം, പരസ്യം എന്നിവയുൾപ്പെടെയുള്ള മേഖലകളിൽ ലിംഗം, പ്രായം, മതം, വൈകല്യം, വംശം, ലൈംഗിക അഭിരുചി, ലിംഗസ്വത്വം, ആരോഗ്യസ്ഥിതി തുടങ്ങിയ കാരണങ്ങളുടെ അടിസ്ഥാനത്തിലുള്ള വിവേചനം തടയാൻ ലക്ഷ്യമിടുന്നു.
സമത്വം പ്രോത്സാഹിപ്പിക്കുന്നതിനും വിവേചനങ്ങൾക്കെതിരെ പോരാടുന്നതിനും ഭരണകൂടത്തിന് ഔദ്യോഗിക ഉത്തരവാദിത്തം നൽകുന്നതാണ് ഈ നിയമമെന്ന് സമത്വ വകുപ്പ് മന്ത്രി റോസിയാൻ കുട്ടാജാർ (Rosianne Cutajar) പറഞ്ഞു. ബിൽ പാസായി ഒരു വർഷത്തിനകം സമത്വം ഉറപ്പാക്കുന്നതിനുള്ള ദേശീയ പദ്ധതി സർക്കാർ തയ്യാറാക്കുമെന്നും അവർ കൂട്ടിച്ചേർത്തു.
