നിയമപരമായ കുടിയേറ്റം ജനസംഖ്യ വർധിപ്പിക്കുന്നു; ദേശീയ ജനസംഖ്യാ നയം വേണം : മൊമെന്റം

നിയമപരമായ കുടിയേറ്റത്തെ തുടർന്ന് മാൾട്ടയിലെ ജനസംഖ്യ അതിവേഗം വർധിക്കുന്ന സാഹചര്യത്തിൽ രാജ്യത്തിന്റെ ദീർഘകാല ഭാവിയെക്കുറിച്ചും ജനസംഖ്യാ വളർച്ചയെക്കുറിച്ചും ദേശീയതലത്തിൽ ചർച്ച വേണമെന്ന് മൊമെന്റം പാർട്ടി ആവശ്യപ്പെട്ടു.

നാഷണൽ സ്റ്റാറ്റിസ്റ്റിക്സ് ഓഫീസ് പുറത്തുവിട്ട പുതിയ കണക്കുകൾ പ്രകാരം 2025ൽ 32,744 നിയമപരമായ കുടിയേറ്റക്കാർ മാൾട്ടയിലെത്തി. ഇതോടെ രാജ്യത്തെ ജനസംഖ്യയിൽ 13,906 പേരുടെ അറ്റവർധന രേഖപ്പെടുത്തി.

“ഇന്ന് മാൾട്ടയിലെ താമസക്കാരിൽ മൂന്നിലൊരാൾ വിദേശിയാണ്. എല്ലാ താമസക്കാർക്കും ഗുണകരമാകുന്ന രീതിയിൽ ജനസംഖ്യാ വളർച്ച നിയന്ത്രിക്കാൻ മാൾട്ടയ്ക്ക് വ്യക്തമായ തന്ത്രം അനിവാര്യമാണ്,” മൊമെന്റം വ്യക്തമാക്കി.

ലോക ജനസംഖ്യാ ദിനത്തോടനുബന്ധിച്ച് പുറത്തിറക്കിയ പ്രസ്താവനയിൽ രാജ്യത്തെ ആരോഗ്യ സംവിധാനം, സ്കൂളുകൾ, ഗതാഗത ശൃംഖല, പൊലീസ്, കോടതികൾ തുടങ്ങിയ പൊതുസേവനങ്ങൾ ഇതിനകം തന്നെ വലിയ സമ്മർദ്ദത്തിലാണെന്ന് പാർട്ടി മുന്നറിയിപ്പ് നൽകി.

തന്ത്രപരമായ ആസൂത്രണമില്ലാത്ത ജനസംഖ്യാ വർധന അവശ്യ സേവനങ്ങളിൽ കൂടുതൽ സമ്മർദ്ദം സൃഷ്ടിക്കും. ഭവനങ്ങളുടെ വില സാധാരണക്കാർക്ക് താങ്ങാനാകാത്ത നിലയിലേക്ക് ഉയരുകയാണെന്നും ഗതാഗതക്കുരുക്ക്, മലിനീകരണം, തുറസ്സായ ഇടങ്ങളുടെ നഷ്ടം എന്നിവ ജനങ്ങളുടെ ജീവിത നിലവാരത്തെ പ്രതികൂലമായി ബാധിക്കുന്നതായും മൊമെന്റം പറഞ്ഞു.

“അടുത്ത 20 അല്ലെങ്കിൽ 30 വർഷത്തിനുള്ളിൽ മാൾട്ട എങ്ങനെയാകണമെന്നാണ് നാം ആഗ്രഹിക്കുന്നത്? ഈ വളർച്ചയ്ക്ക് ആവശ്യമായ അടിസ്ഥാന സൗകര്യങ്ങൾ, പൊതുസേവനങ്ങൾ, പരിസ്ഥിതി സംരക്ഷണം എന്നിവയ്ക്കായി നാം പദ്ധതിയിടുന്നുണ്ടോ, അതോ സംഭവങ്ങൾ ഉണ്ടായതിന് ശേഷം പ്രതികരിക്കുക മാത്രമാണോ ചെയ്യുന്നത്?” മൊമെന്റം എക്സിക്യൂട്ടീവ് അംഗം നതാഷ അസോപാർഡി ചോദിച്ചു.

വിദഗ്ധരുടെ ഉപദേശം, വിപുലമായ പൊതുജന പങ്കാളിത്തം, അളക്കാവുന്ന ദീർഘകാല ലക്ഷ്യങ്ങൾ എന്നിവയുടെ അടിസ്ഥാനത്തിൽ സമഗ്രമായ ദേശീയ ജനസംഖ്യാ തന്ത്രം സർക്കാർ രൂപീകരിക്കണമെന്ന് പാർട്ടി ആവശ്യപ്പെട്ടു.

മാൾട്ടയ്ക്ക് സുസ്ഥിരമായി ഉൾക്കൊള്ളാൻ കഴിയുന്ന ജനസംഖ്യയുടെ പരിധി വിലയിരുത്തുക, ഭാവിയിലെ വളർച്ചയ്ക്ക് ആവശ്യമായ അടിസ്ഥാന സൗകര്യങ്ങളും പൊതുസേവനങ്ങളും കണ്ടെത്തുക, സംയോജന നയങ്ങൾ ശക്തിപ്പെടുത്തുക, തൊഴിലാളികളെ ചൂഷണത്തിൽ നിന്ന് സംരക്ഷിക്കുക, നിലവിലെയും ഭാവിയിലെയും തലമുറകളുടെ ക്ഷേമത്തിന് മുൻഗണന നൽകുക എന്നിവ പുതിയ തന്ത്രത്തിന്റെ ഭാഗമാകണമെന്നും മൊമെന്റം വ്യക്തമാക്കി.

പുതുതായി രാജ്യത്തെത്തുന്നവർ മാൾട്ടയുടെ നിയമങ്ങൾ, ഭാഷ, മൂല്യങ്ങൾ, സാംസ്കാരിക സ്വത്വം എന്നിവ മാനിച്ചുകൊണ്ട് പ്രാദേശിക സമൂഹത്തിന്റെ ഭാഗമാകാൻ സഹായിക്കുന്ന ഗൗരവമായ സംയോജന നയവും വേണമെന്ന് പാർട്ടി ആവശ്യപ്പെട്ടു.

മാൾട്ടയുടെ സമ്പദ്‌വ്യവസ്ഥയ്ക്ക് സംഭാവന നൽകുന്ന ഓരോ തൊഴിലാളിക്കും മാന്യമായ പരിഗണന ഉറപ്പാക്കണമെന്നും മൊമെന്റം പറഞ്ഞു. ന്യായമായ വേതനം, മാന്യമായ താമസസൗകര്യം, സുരക്ഷിതമായ തൊഴിൽ സാഹചര്യങ്ങൾ, ചൂഷണത്തിൽ നിന്നുള്ള സംരക്ഷണം എന്നിവ എല്ലാ തൊഴിലാളികൾക്കും ലഭിക്കണം.

“ദുർബലരായ തൊഴിലാളികളെ എളുപ്പത്തിൽ ഉപേക്ഷിക്കാവുന്ന തൊഴിൽശക്തിയായി കാണുകയോ ആധുനികകാല ചൂഷണത്തിന് സമാനമായ സാഹചര്യങ്ങൾക്ക് വിധേയരാക്കുകയോ ചെയ്യുന്ന സംവിധാനം മാൾട്ടയിൽ ഉണ്ടാകരുത്,” പാർട്ടി വ്യക്തമാക്കി.