ലോകത്തിലെ ഏറ്റവും വേഗതയേറിയ ട്രെയിൻ വികസിപ്പിക്കാൻ ഒരുങ്ങി ജപ്പാൻ

ടോക്കിയോ : ലോകത്തിലെ ഏറ്റവും വേഗതയേറിയ ട്രെയിൻ വികസിപ്പിക്കുന്ന തിരക്കുകളിലാണ് ജപ്പാൻ. L0 സീരീസ് എന്നറിയപ്പെടുന്ന ഈ മാഗ്‌ലെവ് ട്രെയിൻ മണിക്കൂറിൽ 603.5 കിലോമീറ്റർ വേഗത കൈവരിക്കാൻ ശേഷിയുള്ളതാണ്. നിലവിൽ ചൈനയുടെ ഷാങ്ഹായ് മാഗ്‌ലെവ് ആണ് ലോകത്തിലെ ഏറ്റവും വേഗതയേറിയ ട്രെയിൻ. മണിക്കൂറിൽ 460.2 കിലോമീറ്റർ വേഗത പടിക്കാൻ കഴിവുള്ളതാണ് ഷാങ്ഹായ് മാഗ്‌ലെവ്. ഇതിനെ മറികടക്കുക എന്നതാണ് ജപ്പാന്റെ ലക്ഷ്യം.യൂറോപ്പിലെ ഏറ്റവും വേഗതയേറിയ ട്രെയിനുകൾ ഫ്രഞ്ച് ടിജിവിയും, ഇറ്റാലിയൻ എജിവി ഇറ്റാലോയുമാണ്. ഇവ മണിക്കൂറിൽ യഥാക്രമം 306 കിലോമീറ്ററും 354 കിലോമീറ്ററും വേഗതയാണ് കൈവരിക്കുന്നത്. ഈ ട്രെയിനുകളുടെ ഏതാണ്ട് ഇരട്ടി വേഗതയാണ് ജപ്പാൻ പദ്ധതിയിടുന്നത്. ടോക്കിയോയ്ക്കും നഗോയയ്ക്കും ഇടയിലുള്ള യാത്രാസമയം വെറും 40 മിനിറ്റായി കുറയ്ക്കാൻ L0 സീരീസ് ട്രെയിൻ ലക്ഷ്യമിടുന്നു. ഈ പദ്ധതിക്ക് ഏകദേശം 52 ബില്യൺ പൗണ്ട് (59.9 ബില്യൺ യൂറോ) ചെലവ് വരും. 2034 നും 2035 നും ഇടയിൽ ട്രെയിൻ പാളത്തിലിറങ്ങുമെന്നാണ് പറയുന്നത്.

L0 സീരീസ് ട്രെയിൻ വികസിപ്പിക്കുന്നത് സെൻട്രൽ ജപ്പാൻ റെയിൽവേ കമ്പനിയാണ്. ഈ ട്രെയിൻ മാഗ്‌നെറ്റിക് ലെവിറ്റേഷൻ സാങ്കേതികവിദ്യ തന്നെയാണ് ഉപയോഗിക്കുക. ഈ സാങ്കേതികവിദ്യ ട്രെയിനിനെ ട്രാക്കുകളിൽ നിന്ന് ഉയർത്തി നിർത്തുകയും വൈദ്യുത മോട്ടോറുകൾ ഉപയോഗിച്ച് മുന്നോട്ട് നയിക്കുകയും ചെയ്യുന്നു. വൈദ്യുതിയും കാന്തങ്ങളും ഉപയോഗിക്കുന്ന ഈ രീതി ട്രെയിനിനെ അവിശ്വസനീയമായ വേഗതയിൽ സഞ്ചരിക്കാൻ സഹായിക്കും.

നിലവിൽ ടോക്കിയോയിൽ നിന്ന് നഗോയയിലേക്കുള്ള യാത്രാ സമയം ഷിൻകാൻസെൻ ബുള്ളറ്റ് ട്രെയിനുകളിൽ ഒരു മണിക്കൂറും 26 മിനിറ്റും ആണ് എടുക്കുക. എന്നാൽ L0 സീരീസിന്റെ ചുഓ-ഷിൻകാൻസെൻ ലൈൻ ഈ യാത്രാ സമയം വെറും 40 മിനിറ്റായി കുറയ്ക്കും. ഭാവിയിൽ നഗോയയ്ക്കും ഒസാക്കയ്ക്കും ഇടയിൽ ഒരു സർവീസ് കൂടി നടപ്പിലാക്കാൻ സാധ്യതയുണ്ട്. ഇത് ഈ മൂന്ന് നഗരങ്ങളെയും ഒരു വലിയ സേവന മേഖലയായി ബന്ധിപ്പിക്കും. ടോക്കിയോയിൽ നിന്ന് ഒസാക്കയിലേക്കുള്ള യാത്ര ഒരു മണിക്കൂറിനുള്ളിൽ പൂർത്തിയാക്കാൻ കഴിയും. നിലവിൽ ഈ യാത്രയ്ക്ക് രണ്ട് മണിക്കൂർ മുതൽ നാല് മണിക്കൂർ വരെയാണ് എടുക്കുന്നത്.

ഈ ട്രെയിനിന് വലിയ നിക്ഷേപം ആവശ്യമാണ്. ഇതുവരെ ഏകദേശം 52 ബില്യൺ പൗണ്ട് (59.9 ബില്യൺ യൂറോ) ചിലവഴിച്ചിട്ടുണ്ട്. യഥാർത്ഥത്തിൽ 2027-ൽ പൂർത്തിയാകാൻ നിശ്ചയിച്ചിരുന്ന ഈ പദ്ധതി ഇതിനോടകം എട്ട് വർഷം വൈകിയിട്ടുണ്ട്. 2034 നും 2035 നും ഇടയിൽ ട്രെയിൻ എത്തുമെന്നാണ് ഇപ്പോഴത്തെ പ്രതീക്ഷ.