യൂറോപ്പിൽ ജോലി വാഗ്ദാനം ചെയ്ത് യൂറോ വേ എമിഗ്രേഷൻ എന്ന സ്ഥാപനം കോടികൾ തട്ടിയതായി പരാതി
തൃശ്ശൂർ : ഡെൻമാർക്കിൽ നേഴ്സിങ് ജോലി വാഗ്ദാനം ചെയ്ത് കോടികളുടെ തട്ടിപ്പ് നടത്തിയ തൃശ്ശൂരിലെ യൂറോ വേ (EuroWay) സ്റ്റഡി അബ്രോഡ് / എമിഗ്രേഷൻ ഏജൻസിക്കെതിരെ വ്യാപക പരാതി.
നഴ്സിങ് ബിരുദധാരികളായ ഉദ്യോഗാർത്ഥികളിൽ നിന്ന് ഡെൻമാർക്കിൽ ജോലി വാഗ്ദാനം ചെയ്ത് നാല് ലക്ഷം രൂപ വരെയാണ് ഈ ഏജൻസി ഈടാക്കിയത്. പണം നൽകിയവർക്ക് വിസയോ ജോലിയോ ലഭിക്കാതെ വന്നതോടെയാണ് തട്ടിപ്പ് പുറത്തായത്. തട്ടിപ്പിനിരയായ ഉദ്യോഗാർത്ഥികളുടെ പരാതിയെ തുടർന്ന് തൃശ്ശൂർ വെസ്റ്റ് പോലീസ് ഈ സ്ഥാപനത്തിനെതിരെ നിലവിൽ പന്ത്രണ്ടോളം കേസുകൾ രജിസ്റ്റർ ചെയ്ത് അന്വേഷണം ആരംഭിച്ചിട്ടുണ്ട്. ഏതാണ്ട് 150-ഓളം ഉദ്യോഗാർത്ഥികൾ ഈ ഒരു സ്ഥാപനത്തിൽ നിന്ന് മാത്രം തട്ടിപ്പിനിരയായിട്ടുണ്ടെന്നാണ് പ്രാഥമിക റിപ്പോർട്ടുകൾ സൂചിപ്പിക്കുന്നത്.
ഉദ്യോഗാർത്ഥികളുടെ പരാതികൾ വ്യാപകമായതോടെ തൃശ്ശൂർ പൂങ്കുന്നത്തുള്ള യൂറോ വേ ഓഫീസ് അധികൃതർ പൂട്ടുകയും, സ്ഥാപന ഉടമകളും പ്രധാന ജീവനക്കാരും ഒളിവിൽ പോവുകയും ചെയ്തു. പ്രതികളെ കണ്ടെത്തുന്നതിനും പണം വകമാറ്റിയിട്ടുണ്ടോ എന്ന് പരിശോധിക്കുന്നതിനുമായി തൃശ്ശൂർ സിറ്റി പോലീസിന്റെ പ്രത്യേക സംഘം അന്വേഷണം ഊർജ്ജിതമാക്കിയിട്ടുണ്ട്.
ഇത്തരം വിദേശ ജോലി തട്ടിപ്പുകൾ തടയുന്നതിനും സുരക്ഷിതമായി വിസ നടപടികൾ പൂർത്തിയാക്കുന്നതിനും ഇന്ത്യൻ വിദേശകാര്യ മന്ത്രാലയം (MEA) ഔദ്യോഗിക ലൈസൻസുള്ള റിക്രൂട്ടിംഗ് ഏജൻസികളെ (eMigrate Portal) മാത്രം ആശ്രയിക്കാൻ ഉദ്യോഗാർത്ഥികൾക്ക് നിർദ്ദേശം നൽകിയിട്ടുണ്ട്.
