മനോയിൻ ദ്വീപിലെ അനധികൃത പാഡൽ കോർട്ടുകൾക്കെതിരെ പ്രതിഷേധം; വാളുകളിൽ ‘ഇല്ലീഗൽ’ എന്ന് സ്പ്രേ പെയിന്റ് ചെയ്ത് ആക്ടിവിസ്റ്റുകൾ

മനോയിൻ ദ്വീപിൽ അനുമതിയില്ലാതെ നിർമ്മിച്ച പാഡൽ കോർട്ടുകൾക്കെതിരെ പ്രതിഷേധം ശക്തമാകുന്നു. പ്ലാനിംഗ് അതോറിറ്റിയുടെ (PA) നിർണ്ണായക തീരുമാനം വ്യാഴാഴ്ച വരാനിരിക്കെ, പ്രതിഷേധത്തിന്റെ ഭാഗമായി കോർട്ടുകളുടെ മതിലിൽ ‘ഇല്ലീഗൽ പാഡൽ’ എന്ന് സ്പ്രേ പെയിന്റ് ചെയ്ത് ആക്ടിവിസ്റ്റുകൾ .

ജിസിര യുണൈറ്റഡ് എഫ്‌സി പ്രസിഡന്റ് ഷാർലോൺ പേസാണ് ഒരു നാഷണൽ പാർക്ക് നിർമ്മിക്കേണ്ട സ്ഥലത്ത് യാതൊരു അനുമതിയും കൂടാതെ ഈ കോർട്ടുകൾ നിർമ്മിച്ചത്. നിയമവിരുദ്ധമായി നിർമ്മിച്ച ഈ കോർട്ടുകൾക്ക് വെറും 900 യൂറോ പിഴ ചുമത്തി നിയമവിധേയമാക്കാനാണ് പ്ലാനിംഗ് അതോറിറ്റിയുടെ ഡെവലപ്‌മെന്റ് ആൻഡ് മാനേജ്‌മെന്റ് ഡയറക്ടറേറ്റ് ശുപാർശ ചെയ്തിരിക്കുന്നത്.

തിരഞ്ഞെടുപ്പ് പ്രചാരണ വേളയിൽ മെയ് മാസത്തിൽ തീരുമാനിക്കേണ്ടിയിരുന്ന ഈ വിഷയം, പിന്നീട് വ്യാഴാഴ്ചത്തേക്ക് മാറ്റിവെക്കുകയായിരുന്നു. കോർട്ടുകൾ മറയ്ക്കാൻ സ്ഥാപിച്ച കോൺക്രീറ്റ് മതിലിലാണ് ‘മൂവ്മെന്റ് ഗ്രാഫിറ്റി ‘ പ്രവർത്തകർ പ്രതിഷേധം രേഖപ്പെടുത്തിയത്.

“ഷാർലോൺ പേസിന്റെ അനധികൃത കോർട്ടുകൾ മറച്ചുവെക്കുകയല്ല, മറിച്ച് പുറത്തുകൊണ്ടുവരികയാണ് ഞങ്ങൾ ചെയ്തത്,” എന്ന് പ്രവർത്തകർ മാധ്യമങ്ങളോട് പറഞ്ഞു. മനോയിൻ ദ്വീപ് ജനങ്ങൾക്ക് തിരികെ നൽകുമെന്ന് സർക്കാർ നൽകിയ വാഗ്ദാനം എവിടെയെന്നും അവർ ചോദിച്ചു.

വ്യാഴാഴ്ച രാവിലെ 10 മണിക്ക് നടക്കുന്ന പ്ലാനിംഗ് അതോറിറ്റി ഹിയറിംഗിൽ പൊതുജനങ്ങൾ പങ്കുചേരണമെന്ന് മൂവ്മെന്റ് ഗ്രാഫിറ്റി അഭ്യർത്ഥിച്ചു.

അനധികൃത നിർമ്മാണങ്ങൾക്കെതിരെ താൻ കർശനമായി എതിരാണെന്ന് പ്രധാനമന്ത്രി റോബർട്ട് അബേല നേരത്തെ പറഞ്ഞിരുന്നെങ്കിലും, ഈ വിഷയത്തിൽ അദ്ദേഹം വ്യക്തമായ നിലപാട് സ്വീകരിച്ചിട്ടില്ല. വിഷയം പ്ലാനിംഗ് അതോറിറ്റിയുടെ പരിഗണനയിലാണെന്ന മറുപടിയാണ് അദ്ദേഹം നൽകിയത്.