പൊതു ഇടങ്ങളിലെ നിയമവിരുദ്ധ വാണിജ്യ കൈയേറ്റങ്ങൾക്കെതിരെ കർശന നടപടി സ്വീകരിക്കണം : ആക്ടിവിസ്റ്റുകൾ

പൊതു ഇടങ്ങളിലെ നിയമവിരുദ്ധ വാണിജ്യ കൈയേറ്റങ്ങൾക്കെതിരെ കർശന നടപടി സ്വീകരിക്കണമെന്ന് ആവശ്യപ്പെട്ട് ആക്ടിവിസ്റ്റുകൾ. പൊതു ഇടങ്ങളുടെ ദുരുപയോഗവും ശബ്ദ മലിനീകരണവും സംബന്ധിച്ച നിയമങ്ങൾ വിനോദസഞ്ചാരികൾക്കും വിദേശ താമസക്കാരർക്കുമാത്രമല്ല, എല്ലാ മാൾട്ടീസ് പൗരന്മാർക്കും ഒരുപോലെ ബാധകമാകുന്ന രീതിയിൽ നടപ്പിലാക്കണമെന്ന് എൻജിഒ ആവശ്യപ്പെട്ടു.

അധികാരികൾ ഇപ്പോൾ വിനോദസഞ്ചാരികൾക്കെതിരെ നിർദ്ദേശിക്കുന്ന അതേ അടിയന്തരതയും കർശനമായ നിയമനടപടികളും മാൾട്ടയിലെ നിയമവിരുദ്ധമായി പ്രവർത്തിക്കുന്ന വ്യാപാര സ്ഥാപനങ്ങൾക്കുമെതിരെ പ്രയോഗിക്കണമെന്ന് പ്രവർത്തകർ ബുധനാഴ്ച പുറത്തിറക്കിയ പ്രസ്താവനയിൽ ആവശ്യപ്പെട്ടു.

മാൾട്ടയിൽ താമസാവകാശമില്ലാത്തവർ, ഉൾപ്പെടെ വിനോദസഞ്ചാരികൾ, രാജ്യത്ത് നിയമലംഘനം നടത്തിയാൽ സ്ഥലത്തുവെച്ചുതന്നെ പിഴ അടയ്ക്കേണ്ടിവരുമെന്ന സർക്കാർ പ്രഖ്യാപനത്തിന് പിന്നാലെയാണ് ഈ ആവശ്യം ഉയർന്നത്. ശബ്ദ മലിനീകരണം, മാലിന്യം തള്ളൽ തുടങ്ങിയ കുറ്റങ്ങൾക്ക് ഉടൻ പിഴ ഈടാക്കുമെന്നുമാണ് സർക്കാർ അറിയിച്ചത്.

ഈ നിയമം രാജ്യത്തുടനീളം ഒരേ രീതിയിലുള്ള നിയമനടപടികളുടെ തുടക്കമാകണമെന്നും, ദിവസേന പൊതു ഇടങ്ങൾ കൈയേറി തടസ്സപ്പെടുത്തുകയും അവയുടെ നിലവാരം തകർക്കുകയും ചെയ്യുന്ന വ്യാപാര സ്ഥാപനങ്ങൾക്കെതിരെയും ശക്തമായ നടപടി വേണമെന്നും പ്രവർത്തകർ വ്യക്തമാക്കി. വ്യക്തികൾക്കെതിരെ മാത്രം തിരഞ്ഞെടുത്ത രീതിയിൽ നിയമം നടപ്പാക്കരുതെന്നും അവർ കൂട്ടിച്ചേർത്തു.

വ്യാപാര സ്ഥാപനങ്ങൾക്ക് ചുമത്തുന്ന പിഴകൾ അവർ ചെയ്യുന്ന നിയമലംഘനങ്ങളുടെ ഗൗരവത്തിന് അനുസൃതമായിരിക്കണമെന്നും, വെറും പ്രതീകാത്മകമായ പിഴകളല്ലാതെ യഥാർത്ഥത്തിൽ തടയുവാനുള്ള ശക്തിയുള്ളതായിരിക്കണമെന്നും അവർ പറഞ്ഞു. അല്ലാത്തപക്ഷം സ്ഥാപനങ്ങൾ അത് അവരുടെ പ്രവർത്തനച്ചെലവിന്റെ ഭാഗമായിട്ടാണ് കാണുക.

മാൾട്ടയിലും ഗോസോയിലുമുള്ള ജനങ്ങൾ പൊതുസ്ഥലങ്ങൾ സ്വകാര്യ വ്യാപാര ആവശ്യങ്ങൾക്ക് വേണ്ടി കൈയേറപ്പെടുന്നതിന്റെ ബുദ്ധിമുട്ടുകൾ നേരിടുകയാണെന്ന് അവർ വിശദീകരിച്ചു. പ്രത്യേകിച്ച് അനധികൃതമായി സ്ഥാപിക്കുന്ന മേശ-കസേരകൾ, കിയോസ്കുകൾ, എ-ഫ്രെയിം ബോർഡുകൾ എന്നിവയാണ് പ്രശ്നങ്ങൾ സൃഷ്ടിക്കുന്നതെന്ന് അവർ പറഞ്ഞു.

ഇതിനൊപ്പം, രാത്രി വൈകിയും അത്യധികം ശബ്ദത്തിൽ സംഗീതം പ്രക്ഷേപണം ചെയ്യുന്നത് നാട്ടുകാർക്ക് സഹിക്കേണ്ടിവരുന്നുവെന്നും, ഇത് താമസമേഖലകളെ സംരക്ഷിക്കാൻ ഉള്ള നിയമങ്ങളുടെ വ്യക്തമായ ലംഘനമാണെന്നും അവർ ചൂണ്ടിക്കാട്ടി.

“ഇവ ഒറ്റപ്പെട്ട സംഭവങ്ങളല്ല,” അവർ പറഞ്ഞു. “ഇത് പൊതു ഇടങ്ങളുടെ സ്ഥിരവും ദൃശ്യവുമായ ദുരുപയോഗത്തെയും നാട്ടുകാരുടെ ജീവിത നിലവാരത്തെ തുടർച്ചയായി ബാധിക്കുന്ന പ്രശ്നങ്ങളെയും പ്രതിനിധീകരിക്കുന്നു.”

പൊതു ഇടങ്ങളിൽ അനധികൃതമായി സ്ഥാപിച്ചിരിക്കുന്ന മേശകൾ, കസേരകൾ, മറ്റ് ഘടനകൾ, വ്യാപാര തടസ്സങ്ങൾ എന്നിവ ഉടൻ നീക്കം ചെയ്യണമെന്നും, ശബ്ദ മലിനീകരണ നിയമങ്ങൾ ഫലപ്രദമായി നടപ്പാക്കണമെന്നും പ്രവർത്തകർ ആവശ്യപ്പെട്ടു.

“ഫുട്പാത്തുകൾ, പൊതു ചത്വരങ്ങൾ, പ്രൊമെനേഡുകൾ, കടൽത്തീരങ്ങൾ, താമസവീഥികൾ എന്നിവ സ്വകാര്യ വ്യാപാര പ്രവർത്തനങ്ങളുടെ വിപുലീകരണമായി തുടരാൻ പാടില്ല. ഇത് പൊതുജനങ്ങളുടെ സഞ്ചാര സൗകര്യത്തെയും സുരക്ഷയെയും ജീവിതനിലവാരത്തെയും ബാധിക്കുന്നു, പൊതു ഇടങ്ങൾ പൊതുജനങ്ങൾക്കുള്ളതാണ്.” അവർ പറഞ്ഞു

ബിസെജെഡ് ഗ്രൂപ്പ്, ഫ്ലിംകിയൻ ഗാൽ ആംബ്ജൻ്റ് അജാർ, മാർസാസ്‌കല റസിഡൻ്റ്‌സ് നെറ്റ്‌വർക്ക്, മാർസാക്‌സ്‌ലോക് ഹെറിറ്റേജ്, മൂവിമെൻ്റ് ഗ്രാഫിറ്റി, പെംബ്രോക്ക് റെസിഡൻ്റ്‌സ്, റെസിഡൻറിബെൽറ്റിൻ, സ്ലീമ റസിഡൻ്റ്‌സ് അസോസിയേഷൻ, സെൻ്റ് പോൾസ്, ബേ റെയ്‌സ് ആർട്ട്‌സ്‌വീസ് ഗ്രൂപ്പ്, ട്യൂണ ആർട്ട്ന ലൂറ എന്നീ സംഘടനകളാണ് ഈ പ്രസ്താവനയിൽ ഒപ്പുവെച്ചത്.