വിദ്യാഭ്യാസ മേഖലയിൽ വിദേശ വിദ്യാർഥികളുടെ എണ്ണത്തിൽ 12% വർധന : എൻ.എസ്.ഒ

പ്രീ-പ്രൈമറി, നിർബന്ധിത വിദ്യാഭ്യാസ മേഖലകളിൽ പഠിക്കുന്ന മാൾട്ടീസ് ഇതര വിദ്യാർഥികളുടെ എണ്ണത്തിൽ 2023-2024 അധ്യയന വർഷത്തെ അപേക്ഷിച്ച് കഴിഞ്ഞ അധ്യയന വർഷം 12 ശതമാനം വർധനയുണ്ടായതായി ദേശീയ സ്ഥിതിവിവരക്കണക്ക് ഓഫീസ് (NSO) പുറത്തുവിട്ട കണക്കുകൾ വ്യക്തമാക്കുന്നു.

2024-2025 അധ്യയന വർഷത്തിൽ പ്രീ-പ്രൈമറി, പ്രൈമറി, സെക്കൻഡറി തലങ്ങളിലായി ആകെ 60,339 വിദ്യാർഥികളാണ് പഠിച്ചിരുന്നത്. മുൻ അധ്യയന വർഷത്തെ അപേക്ഷിച്ച് വിദ്യാർഥികളുടെ എണ്ണത്തിൽ 0.2 ശതമാനം വർധനയുണ്ടായി. ഇവരിൽ 19.4 ശതമാനം വിദേശികളായിരുന്നു.

വിദേശ വിദ്യാർഥികളിൽ ഭൂരിഭാഗവും സർക്കാർ, സ്വകാര്യ വിദ്യാഭ്യാസ സ്ഥാപനങ്ങളിലാണ് പഠിച്ചിരുന്നത്. സ്വകാര്യ സ്കൂളുകളിലെ വിദ്യാർഥികളിൽ 26.7 ശതമാനം വിദേശികളാണ്. സർക്കാർ സ്കൂളുകളിൽ വിദേശ വിദ്യാർഥികളുടെ വിഹിതം 25.8 ശതമാനമാണ്. അതേസമയം, സഭയുടെ കീഴിലുള്ള സ്കൂളുകളിൽ പഠിച്ചിരുന്നവരിൽ 98.8 ശതമാനവും മാൾട്ടീസ് വിദ്യാർഥികളായിരുന്നു.

സെക്കൻഡറി തലത്തിൽ ഇറ്റാലിയൻ ഭാഷയ്ക്ക് കൂടുതൽ പ്രിയം

സെക്കൻഡറി തലത്തിൽ വിദേശ ഭാഷകൾ പഠിക്കുന്നവരിൽ ഏറ്റവും പ്രചാരമുള്ളത് ഇറ്റാലിയൻ ഭാഷയാണ്. 52.9 ശതമാനം വിദ്യാർഥികൾ ഇറ്റാലിയൻ പഠിക്കുന്നുണ്ട്. ഫ്രഞ്ച് പഠിക്കുന്നവർ 22.5 ശതമാനവും സ്പാനിഷ് പഠിക്കുന്നവർ 17.3 ശതമാനവും ജർമൻ പഠിക്കുന്നവർ 11.7 ശതമാനവുമാണ്.

മുൻ അധ്യയന വർഷത്തെ അപേക്ഷിച്ച് സ്പാനിഷ് ഭാഷ പഠിക്കുന്ന വിദ്യാർഥികളുടെ എണ്ണത്തിൽ 8.3 ശതമാനം വർധനയുണ്ടായി.

ആൺകുട്ടികളും പെൺകുട്ടികളും തമ്മിലുള്ള ഭാഷാപഠനത്തിലെ വ്യത്യാസം ഏറ്റവും പ്രകടമായത് ഫ്രഞ്ച് ഭാഷയിലാണ്. 2024-2025 അധ്യയന വർഷത്തിൽ സെക്കൻഡറി തലത്തിലെ പെൺകുട്ടികളിൽ 28.8 ശതമാനം ഫ്രഞ്ച് പഠിച്ചപ്പോൾ ആൺകുട്ടികളിൽ ഇത് 16.7 ശതമാനം മാത്രമായിരുന്നു.

ഏത് സ്കൂളുകളിലാണ് കൂടുതൽ വിദ്യാർഥികൾ?

വിദ്യാർഥികളിൽ 51.7 ശതമാനം ആൺകുട്ടികളാണെന്ന് എൻഎസ്‌ഓ വ്യക്തമാക്കി. ഏകദേശം പകുതിയോളം വിദ്യാർഥികൾ, അതായത് 45.6 ശതമാനം, അഞ്ച് മുതൽ പത്ത് വയസ്സുവരെയുള്ളവരാണ്. 38.3 ശതമാനം വിദ്യാർഥികൾ 11 മുതൽ 15 വയസ്സുവരെയുള്ളവരാണ്.

ആകെ വിദ്യാർഥി പ്രവേശനത്തിന്റെ 59.4 ശതമാനവും സർക്കാർ സ്കൂളുകളിലാണ്. സഭയുടെ കീഴിലുള്ള സ്കൂളുകളിൽ 26.6 ശതമാനം വിദ്യാർഥികളും സ്വകാര്യ സ്കൂളുകളിൽ 14 ശതമാനം വിദ്യാർഥികളും പഠിച്ചു.

2024-2025 അധ്യയന വർഷത്തിൽ നിർബന്ധിത വിദ്യാഭ്യാസ മേഖലയിൽ ആകെ 50,890 വിദ്യാർഥികളുണ്ടായിരുന്നു. ഇവരിൽ 54.2 ശതമാനം പ്രൈമറി സ്കൂളുകളിലും 45.8 ശതമാനം സെക്കൻഡറി സ്കൂളുകളിലുമാണ് പഠിച്ചത്.

മുൻ അധ്യയന വർഷത്തെ അപേക്ഷിച്ച് പ്രൈമറി സ്കൂളുകളിലെ വിദ്യാർഥികളുടെ എണ്ണത്തിൽ 0.2 ശതമാനവും സെക്കൻഡറി സ്കൂളുകളിലെ വിദ്യാർഥികളുടെ എണ്ണത്തിൽ 0.8 ശതമാനവും വർധനയുണ്ടായി.

പ്രൈമറി തലത്തിൽ ഒരു ക്ലാസിലെ ശരാശരി വിദ്യാർഥികളുടെ എണ്ണം 18.4 ആയിരുന്നു. സെക്കൻഡറി തലത്തിൽ ഇത് 19.1 ആണ്.

സ്കൂളുകളുടെ വിഭാഗമനുസരിച്ച് പരിശോധിക്കുമ്പോൾ പ്രൈമറി, സെക്കൻഡറി തലങ്ങളിൽ ഏറ്റവും കുറഞ്ഞ ശരാശരി ക്ലാസ് വലുപ്പം സർക്കാർ സ്കൂളുകളിലായിരുന്നു. ഏറ്റവും ഉയർന്ന ശരാശരി ക്ലാസ് വലുപ്പം സഭയുടെ കീഴിലുള്ള സ്കൂളുകളിലുമായിരുന്നു.

പ്രൈമറി തലത്തിൽ നാലാം വർഷ ക്ലാസുകളിലാണ് ഏറ്റവും ഉയർന്ന ശരാശരി വിദ്യാർഥി എണ്ണമുണ്ടായിരുന്നത്. സെക്കൻഡറി തലത്തിൽ ഒൻപതാം വർഷ ക്ലാസുകളിലാണ് ഈ സ്ഥിതി.

ഏറ്റവും കൂടുതൽ വിദ്യാർഥികൾ നോർതേൺ ഹാർബർ ജില്ലയിൽ

സ്കൂളുകളിൽ പഠിക്കുന്ന വിദ്യാർഥികളിൽ ഏറ്റവും കൂടുതൽ പേർ നോർതേൺ ഹാർബർ ജില്ലയിലാണ്. ആകെ വിദ്യാർഥികളുടെ 37.7 ശതമാനവും ഈ ജില്ലയിലാണ് പഠിക്കുന്നത്. 16.4 ശതമാനവുമായി സൗത്ത് ഹാർബർ ജില്ലയാണ് രണ്ടാം സ്ഥാനത്ത്. ഗോസോ, കോമിനോ മേഖലകളിലാണ് ഏറ്റവും കുറവ് വിദ്യാർഥികൾ പഠിക്കുന്നത്; ആകെ വിദ്യാർഥികളുടെ 7.2 ശതമാനം മാത്രമാണ് ഇവിടെ.

വിദ്യാർഥികൾ താമസിക്കുന്ന പ്രദേശങ്ങളുടെ കണക്കനുസരിച്ച് 26.4 ശതമാനം പേർ നോർതേൺ ഹാർബർ ജില്ലയിലാണ് താമസിക്കുന്നത്. 20 ശതമാനം പേർ നോർതേൺ ജില്ലയിലും താമസിക്കുന്നു.

താമസസ്ഥലത്തുനിന്ന് സ്കൂളിലേക്കുള്ള യാത്രയുടെ കണക്കുകൾ പരിശോധിക്കുമ്പോൾ, 68.9 ശതമാനം വിദ്യാർഥികളും തങ്ങൾ താമസിക്കുന്ന അതേ ജില്ലയിലുള്ള സ്കൂളുകളിലാണ് പഠിക്കുന്നത്. എന്നാൽ 31.1 ശതമാനം വിദ്യാർഥികൾ താമസിക്കുന്ന ജില്ലയ്ക്ക് പുറത്തുള്ള സ്കൂളുകളിലാണ് പഠനം നടത്തുന്നത്.