അന്തർദേശീയം
യുഎസിൽ നോർത്ത് കാരോലൈനയിലെ വാരാന്ത്യ പാർട്ടിക്കിടെ വെടിവയ്‌പ്പ്; 2 മരണം, 11 പേർക്ക് പരുക്ക്
വാഷിങ്‌ടൻഡിസി : നോർത്ത് കാരോലൈനയിലെ മാക്‌റ്റണിന് സമീപം വാരാന്ത്യ പാർട്ടിക്കിടെ നടന്ന വെടിവയ്‌പിൽ രണ്ടു പേർ കൊല്ലപ്പെട്ടു. 11 പേർക്ക് പരുക്കേറ്റതായാണ് റിപ്പോർട്ടുകൾ. നോർത്ത് കാരോലൈന അതിർത്തിയിൽ നിന്ന് 150 കിലോമീറ്റർ അകലെ മാക്‌റ്റണിന് സമീപമുള്ള ഗ്രാമീണ പ്രദേശത്തെ വാരാന്ത്യ പാർട്ടിക്കിടെയായിരുന്നു വെടിവയ്‌പ്. സംഭവത്തെ കുറിച്ചുളള കൂടുതൽ വിവരങ്ങളും കൊല്ലപ്പെട്ടവരുടെയും പരുക്കേറ്റവരുടെയും പേരുകളും പുറത്തുവിട്ടിട്ടില്ല.
150 ലേറെ ആളുകൾ സംഭവസ്‌ഥലത്തുണ്ടായിരുന്നെന്നാണ് വിവരം. ഒറ്റപ്പെട്ട സംഭവമാണെന്നും നിലവിൽ സുരക്ഷാ ഭീഷണിയില്ലെന്നും റോബ്സൺ കൗണ്ടി ഷെരീഫ് ബർണിസ് വിൽക്കിൻസിന്റെ ഓഫിസ് അറിയിച്ചു. അന്വേഷണം ആരംഭിച്ചെന്നും പ്രതിയെ കുറിച്ച് വിവരം ലഭിക്കുന്നവർ അറിയിക്കണമെന്നും അധികൃതർ നിർദേശം നൽകി.
