ടൂറിസം മേഖലയെ പ്രതികൂലമായി ബാധിച്ച വൈദ്യുതി മുടക്കം ആസൂത്രണമില്ലാതെ നടപ്പാക്കിയ വികസനത്തിന്റെ ഫലം : പിഎൻ
മാൾട്ടയിൽ ഉണ്ടായ വ്യാപകമായ വൈദ്യുതി മുടക്കം ടൂറിസം മേഖലയെ പ്രതികൂലമായി ബാധിച്ചുവെന്നും, ഇത് ദീർഘകാലമായി ആസൂത്രണമില്ലാതെ നടപ്പാക്കിയ വികസനത്തിന്റെ ഫലമാണെന്നും പ്രതിപക്ഷമായ നാഷണലിസ്റ്റ് പാർട്ടി (PN).
2035-ഓടെ മാത്രം പ്രതീക്ഷിച്ചിരുന്ന പ്രതിവർഷം 45 ലക്ഷം വിനോദസഞ്ചാരികൾ എന്ന ലക്ഷ്യത്തിലേക്ക് മാൾട്ട ഈ വർഷം തന്നെ എത്തിയേക്കാമെന്ന് പാർട്ടി ഓർമ്മിപ്പിച്ചു.
മാൾട്ട ടൂറിസം അതോറിറ്റി കൂടുതൽ മെച്ചപ്പെട്ട ടൂറിസം സംസ്കാരം പ്രോത്സാഹിപ്പിക്കാൻ ശ്രമിക്കുന്നുണ്ടെങ്കിലും, വർദ്ധിച്ചുവരുന്ന വിനോദസഞ്ചാരികളുടെ എണ്ണം രാജ്യത്തെ അടിസ്ഥാന സൗകര്യങ്ങൾക്കും പൊതുസേവനങ്ങൾക്കും താങ്ങാൻ കഴിയുന്നതിലും അപ്പുറമാണെന്ന് പ്രതിപക്ഷം ചൂണ്ടിക്കാട്ടി.
തലസ്ഥാനമായ വലേറ്റ ഉൾപ്പെടെയുള്ള പ്രദേശങ്ങളെ ബാധിച്ച സമീപകാല വൈദ്യുതി തടസ്സങ്ങൾ അശാസ്ത്രീയ ആസൂത്രണത്തിന്റെ പരിണതഫലമാണെന്ന് പ്രതിപക്ഷം പറഞ്ഞു. ഹോട്ടലുകളിൽ വൈദ്യുതിയും എയർ കണ്ടീഷണറും ഇലക്ട്രോണിക് ഡോർ സിസ്റ്റങ്ങളും പ്രവർത്തിക്കാതായതോടെ വിനോദസഞ്ചാരികൾക്ക് മുറികളിൽ ഉറങ്ങാൻ പോലും കഴിയാത്ത അവസ്ഥയുണ്ടായതായി വന്ന റിപ്പോർട്ടുകൾ പാർട്ടി എടുത്തുപറഞ്ഞു.
വൈദ്യുതി മുടക്കം വിനോദസഞ്ചാരികളെയും ഈ മേഖലയിലെ വ്യവസായികളെയും ഒരുപോലെ ബാധിച്ചിട്ടുണ്ട്. സേവനങ്ങൾ മെച്ചപ്പെടുത്താൻ നിക്ഷേപം നടത്തുന്ന വ്യവസായ സ്ഥാപനങ്ങളുടെ പരിശ്രമങ്ങൾ, അടിസ്ഥാന സൗകര്യങ്ങളുടെ തകരാറുകൾ കാരണം പാഴായിപ്പോകുകയാണെന്നും പി.എൻ കൂട്ടിച്ചേർത്തു.
ജനസംഖ്യാ വർദ്ധനവും അടിസ്ഥാന സൗകര്യങ്ങളിലെ അമിത സമ്മർദ്ദവുമാണ് ഈ പ്രതിസന്ധിക്ക് കാരണമായി പ്രതിപക്ഷം ചൂണ്ടിക്കാണിക്കുന്നത്. ഭാവി വികസനത്തിന് കൂടുതൽ തന്ത്രപരമായ സമീപനം രാജ്യത്തിന് ആവശ്യമാണെന്നും പാർട്ടി ആവശ്യപ്പെട്ടു.
മാൾട്ടയുടെ അടിസ്ഥാന സൗകര്യങ്ങളുടെ പരിധികൾ വിലയിരുത്താനും ടൂറിസം ഉൾപ്പെടെയുള്ള മേഖലകളിൽ ദീർഘകാല ആസൂത്രണം ഉറപ്പാക്കാനുമായി ഒരു ‘നാഷണൽ കാരിയിംഗ് കപ്പാസിറ്റി പ്ലാൻ’ വേണമെന്ന ആവശ്യം നാഷണലിസ്റ്റ് പാർട്ടി വീണ്ടും ഉന്നയിച്ചു.
