നെതന്യാഹുവിന്‍റെ വെളിപ്പെടുത്തൽ; ഇസ്രായേലിലേക്ക് റോക്കറ്റുകൾ വിക്ഷേപിച്ച് ഹിസ്ബുള്ള
ടെൽ അവീവ് : പേജർ ആക്രമണത്തിന് പിന്നിൽ ഇസ്രയേലാണെന്ന പ്രധാനമന്ത്രി ബെഞ്ചമിൻ നെതന്യാഹുവിന്‍റെ വെളിപ്പെടുത്തലിന് പിന്നാലെ ആക്രമണം ശക്തമാക്കി ഹിസ്ബുള്ള. വടക്കൻ ഇസ്രായേലിലേക്ക് ഹിസ്ബുള്ള നൂറുകണക്കിന് റോക്കറ്റുകൾ വിക്ഷേപിച്ചതായി റിപ്പോർട്ടുകളുണ്ട്.
ആക്രമണത്തിൽ ഒരു വയസുകാരി ഉൾപ്പെടെ ഏഴ് പേർക്ക് പരിക്കേറ്റതായി സൂചനയുണ്ട്. ആക്രമണത്തിന്‍റെ ഒരു വീഡിയോ ഇസ്രയേൽ ഡിഫൻസ് ഫോഴ്‌സ് (ഐഡിഎഫ്) എക്സിൽ പങ്കുവച്ചിട്ടുണ്ട്. വടക്കൻ ഇസ്രയേൽ ആക്രമണത്തിനിരയായതായും ഹിസ്ബുള്ളയുടെ ആക്രമണത്തിൽ ജനങ്ങളെ സംരക്ഷിക്കുന്നത് തുടരുമെന്നും ഐഡിഎഫ് എക്സിൽ കുറിച്ചു.
സെപ്റ്റംബർ 17നു ലബനനിലെ ബെയ്റൂട്ടിലും മറ്റുഭാഗങ്ങളിലും ഒരേ സമയം പേജറുകൾ പൊട്ടിത്തെറിച്ച് 39 പേർ മരിക്കുകയും 3400 പേർക്ക് പരിക്കേൽക്കുകയും ചെയ്തിരുന്നു.
