കാലാവസ്ഥാ ലക്ഷ്യങ്ങൾ കൈവരിക്കുന്നതിൽ മാൾട്ട ഉൾപ്പെടെ ഒൻപത് ഇയു രാജ്യങ്ങൾ പിന്നിൽ : ഇയു കമ്മീഷൻ
2030-ഓടെ എമിഷൻ (ഹരിതഗൃഹ വാതക പുറന്തള്ളൽ) കുറയ്ക്കുന്നതിനുള്ള കാലാവസ്ഥാ ലക്ഷ്യങ്ങൾ കൈവരിക്കുന്നതിൽ മാൾട്ട ഉൾപ്പെടെയുള്ള ഒൻപത് യൂറോപ്യൻ യൂണിയൻ (EU) രാജ്യങ്ങൾ പിന്നിലാകാൻ സാധ്യതയുണ്ടെന്ന് യൂറോപ്യൻ കമ്മീഷൻ വ്യക്തമാക്കി. തുർക്കിയിൽ നടക്കുന്ന ഐക്യരാഷ്ട്രസഭയുടെ COP31 കാലാവസ്ഥാ ഉച്ചകോടിയുടെ ഭാഗമായി പുറത്തുവിട്ട റിപ്പോർട്ടിലാണ് കമ്മീഷൻ ഇക്കാര്യം അറിയിച്ചത്.
ലക്ഷ്യങ്ങൾ കൈവരിക്കുന്നതിൽ പിന്നിലുള്ള ഒൻപത് രാജ്യങ്ങളോടും പുറന്തള്ളൽ കുറയ്ക്കുന്നതിനുള്ള നടപടികളും നിക്ഷേപങ്ങളും വേഗത്തിലാക്കാൻ ആവശ്യമായ തിരുത്തൽ പ്രവർത്തനപദ്ധതി സമർപ്പിക്കാൻ നിർദേശിക്കുമെന്ന് യൂറോപ്യൻ കമ്മീഷൻ അറിയിച്ചു. യൂറോപ്യൻ ക്ലൈമറ്റ് കമ്മീഷണർ വോപ്കെ ഹോക്സ്ട്ര (Wopke Hoekstra) മൂന്ന് മാസത്തിനകം പദ്ധതികൾ സമർപ്പിക്കാൻ ആവശ്യപ്പെട്ട് ഈ ഒൻപത് രാജ്യങ്ങൾക്കും കത്തയക്കും.
2021-2025 കാലയളവിൽ ഇറ്റലി, ക്രൊയേഷ്യ, സൈപ്രസ് എന്നീ രാജ്യങ്ങൾ ഉദ്വമന ലക്ഷ്യങ്ങൾ ഇതിനകം മറികടന്നിട്ടുണ്ടെങ്കിലും, ഓസ്ട്രിയ, ജർമ്മനി, അയർലൻഡ്, ലിത്വാനിയ, മാൾട്ട, സ്വീഡൻ എന്നീ രാജ്യങ്ങൾ 2030-ലെ ലക്ഷ്യങ്ങൾ കൈവരിക്കാൻ കഴിയാത്ത അപകടസാധ്യതയിലാണെന്ന് റിപ്പോർട്ടിൽ ചൂണ്ടിക്കാണിക്കുന്നു.
എഫർട്ട് ഷെയറിംഗ് റെഗുലേഷൻ (ESR) ഫ്ലെക്സിബിലിറ്റികൾ ഉപയോഗിക്കുന്നതിന് മുമ്പുള്ള കണക്കുകൾ പ്രകാരം ജർമ്മനി, അയർലൻഡ്, മാൾട്ട എന്നീ രാജ്യങ്ങളാണ് 2030-ലെ ലക്ഷ്യങ്ങളിൽ നിന്ന് ഏറ്റവും വലിയ വ്യതിയാനം കാണിക്കുന്നത്. 2005-ൽ പുറന്തള്ളിയതിനേക്കാൾ കൂടുതൽ ഹരിതഗൃഹ വാതകങ്ങൾ 2030-ൽ മാൾട്ട പുറന്തള്ളാൻ സാധ്യതയുണ്ടെന്ന് റിപ്പോർട്ടിലെ ഗ്രാഫിക്കൽ കണക്കുകൾ വ്യക്തമാക്കുന്നു. അതേസമയം ബൾഗേറിയ, ഗ്രീസ്, പോർച്ചുഗൽ എന്നീ രാജ്യങ്ങൾ 2030-ലെ ലക്ഷ്യങ്ങളേക്കാൾ കൂടുതൽ നേട്ടം കൈവരിച്ചു.
അതേസമയം, യൂറോപ്യൻ യൂണിയനിലെ മൊത്തം ഹരിതഗൃഹ വാതക പുറന്തള്ളൽ 2024-ൽ നിന്ന് കഴിഞ്ഞ വർഷം 1.6 ശതമാനം കുറഞ്ഞതായി പ്രാഥമിക കണക്കുകൾ വ്യക്തമാക്കുന്നു. 27 രാജ്യങ്ങളടങ്ങുന്ന യൂറോപ്യൻ യൂണിയന്റെ നിലവിലെ എമിഷൻ നിരക്ക് 1990-ലെ അളവിനേക്കാൾ 39 ശതമാനം കുറവാണ്. 2040-ഓടെ എമിഷൻ 90 ശതമാനം കുറയ്ക്കാനും 2050-ഓടെ ‘നെറ്റ്-സീറോ’ എമിഷൻ കൈവരിക്കാനുമാണ് യൂറോപ്യൻ യൂണിയൻ ലക്ഷ്യമിടുന്നത്.
എന്നാൽ, കമ്പനികൾക്കായുള്ള കാലാവസ്ഥാ വ്യവസ്ഥകളിൽ കഴിഞ്ഞ രണ്ട് വർഷമായി നിരന്തരം ഇളവുകൾ നൽകിക്കൊണ്ട് യൂറോപ്യൻ യൂണിയൻ തങ്ങളുടെ വാഗ്ദാനങ്ങളിൽ നിന്ന് പിന്മാറുകയാണെന്ന് പരിസ്ഥിതി സംഘടനകൾ ആരോപിച്ചു.
