മാൾട്ടാ വാർത്തകൾ

ജൂനിയർ ഡോക്ടർമാരുടെ നിയമനത്തിലെ കാലതാമസം; ചട്ടപ്പടി സമരം പ്രഖ്യാപിച്ച് എംഎഎം

സ്പെഷ്യലിസ്റ്റ് പരിശീലന തസ്തികകളിലേക്ക് ജൂനിയർ ഡോക്ടർമാരെ നിയമിക്കുന്നതിലെ തുടർച്ചയായ കാലതാമസത്തെച്ചൊല്ലിയുള്ള തർക്കം പരിഹരിക്കപ്പെടാത്ത സാഹചര്യത്തിൽ ചട്ടപ്പടി സമരം പ്രഖ്യാപിച്ച് മാൾട്ട മെഡിക്കൽ അസോസിയേഷൻ (MAM).

നവംബർ 20 മുതൽ സമര നിർദേശങ്ങൾ പ്രാബല്യത്തിൽ വരും. ഫൗണ്ടേഷൻ ഇയർ ഡോക്ടർമാരെ ബേസിക് സ്പെഷ്യലിസ്റ്റ് ട്രെയിനി (BST) തസ്തികകളിലേക്ക് നിയമിക്കുന്നതിലെ കാലതാമസവുമായി ബന്ധപ്പെട്ട് നവംബർ 12-ന് രജിസ്റ്റർ ചെയ്ത തൊഴിൽ തർക്കത്തിന്റെ ഭാഗമായാണ് നടപടി.

ബുധനാഴ്ച പുറത്തിറക്കിയ പ്രസ്താവനയിൽ, തർക്കം പരിഹരിക്കുന്നതിനായി അധികൃതർ അർഥവത്തായ ചർച്ചകൾക്ക് തയ്യാറാകുന്നില്ലെന്ന് എംഎഎം ആരോപിച്ചു. പ്രശ്നം എപ്പോൾ പരിഹരിക്കപ്പെടുമെന്ന കാര്യത്തിൽ പോലും അധികൃതർ വ്യക്തമായ സൂചന നൽകിയിട്ടില്ലെന്നും സംഘടന വ്യക്തമാക്കി.

ഔദ്യോഗിക നിയമന ഉത്തരവിനായി കാത്തിരിക്കുന്ന ഫൗണ്ടേഷൻ ഇയർ ഡോക്ടർമാരെ നവംബർ 23 മുതൽ സ്പെഷ്യലിസ്റ്റ് ട്രെയിനികളുടെ ചുമതലകളിൽ നിയോഗിക്കാനുള്ള നീക്കത്തിലും സംഘടന ആശങ്ക പ്രകടിപ്പിച്ചു. ഇവർ ഇപ്പോഴും ജൂനിയർ ഡോക്ടർമാരുടെ തൊഴിൽ വ്യവസ്ഥകൾക്ക് കീഴിലാണ് പ്രവർത്തിക്കുന്നതെന്നും എംഎഎം ചൂണ്ടിക്കാട്ടി.

ഇത്തരമൊരു നീക്കം തങ്ങൾ ആവശ്യപ്പെട്ട ഇടക്കാല നടപടികൾക്ക് വിരുദ്ധമാണെന്നും നിലവിലെ തർക്കം കൂടുതൽ രൂക്ഷമാക്കുമെന്നും സംഘടന ആരോപിച്ചു.

തുടർന്ന് രണ്ട് പ്രവൃത്തി ദിവസത്തെ മുൻകൂർ അറിയിപ്പ് നൽകിയാണ് എംഎഎം ചട്ടപ്പടി സമര നടപടികൾ പ്രഖ്യാപിച്ചത്. വെള്ളിയാഴ്ച മുതൽ ഡോക്ടർമാർ പാലിക്കേണ്ട മൂന്ന് നിർദേശങ്ങളാണ് സംഘടന പുറപ്പെടുവിച്ചിരിക്കുന്നത്.

നിർദേശങ്ങൾ പ്രകാരം, നഴ്‌സിങ്, മെഡിക്കൽ ജീവനക്കാരിൽ നിന്നുള്ള രോഗികളുമായി ബന്ധപ്പെട്ട ടെലിഫോൺ കോളുകൾ മാത്രമേ ഡോക്ടർമാർ സ്വീകരിക്കുകയുള്ളൂ. കൂടാതെ, ക്ലിനിക്കൽ ഏരിയകളിൽ നിന്ന് പുറത്തുപോയി പുകവലിക്കാൻ രോഗികൾക്ക് അനുമതി നൽകുന്ന കത്തുകൾ തയ്യാറാക്കുന്നതും ഡോക്ടർമാർ നിർത്തിവയ്ക്കും.

ബിഎസ്‌ടി തസ്തികകളിലേക്ക് ഔദ്യോഗിക നിയമനത്തിനായി കാത്തിരിക്കുന്ന ഫൗണ്ടേഷൻ ഇയർ ഡോക്ടർമാർക്ക് നിയമനം ഔദ്യോഗികമായി സ്ഥിരീകരിക്കുന്നതുവരെ സ്പെഷ്യലിസ്റ്റ് ട്രെയിനികളുടെ ചുമതലകൾ ഏറ്റെടുക്കരുതെന്നും നിർദേശം നൽകിയിട്ടുണ്ട്. അധിക പരിശീലന റൊട്ടേഷനുകളിലൂടെയോ മറ്റ് തസ്തികകളിലേക്ക് പുനർനിയമിച്ചോ ഇത്തരം ചുമതലകൾ നൽകുന്നതിനും വിലക്കുണ്ട്.

ബാധിക്കപ്പെട്ട ഡോക്ടർമാർക്ക് നവംബർ 25 ബുധനാഴ്ചയ്ക്കുള്ളിലും ഔദ്യോഗിക നിയമന ഉത്തരവുകൾ ലഭിച്ചില്ലെങ്കിൽ കൂടുതൽ സമര നിർദേശങ്ങൾ പ്രഖ്യാപിക്കുമെന്ന് എംഎഎം മുന്നറിയിപ്പ് നൽകി.

ഇതിന്റെ ഭാഗമായി മെഡിക്കൽ ജോലികളേക്കാൾ ഭരണപരമായ ചുമതലകളെന്ന് സംഘടന വിശേഷിപ്പിക്കുന്ന ചില പ്രവർത്തനങ്ങൾ ഡോക്ടർമാർ നിർത്തിവയ്ക്കും. ഇലക്ട്രോണിക് കേസ് സമ്മറി (Electronic Case Summary) സംവിധാനത്തിലൂടെ രോഗികളുടെ സമ്പൂർണ ഡിസ്ചാർജ് കത്തുകൾ തയ്യാറാക്കുകയും നടപടിക്രമങ്ങൾ പൂർത്തിയാക്കുകയും ചെയ്യില്ല. ശസ്ത്രക്രിയയ്ക്ക് മുമ്പുള്ള പരിശോധനയ്ക്കുള്ള അപ്പോയിന്റ്മെന്റുകൾ ക്രമീകരിക്കുകയോ അവ സംബന്ധിച്ച വിവരങ്ങൾ രോഗികളെ അറിയിക്കുകയോ ചെയ്യുന്നതും നിർത്തിവയ്ക്കും.

സ്പെഷ്യലിസ്റ്റ് ട്രെയിനി തസ്തികകളിലേക്കുള്ള നിയമന നടപടികളിൽ ആവർത്തിച്ചുണ്ടായ കാലതാമസമാണ് തർക്കത്തിന് കാരണം. അപേക്ഷകൾ സ്വീകരിക്കൽ, അഭിമുഖങ്ങൾ നടത്തൽ, ഫലങ്ങൾ പ്രസിദ്ധീകരിക്കൽ, വിജയികളായ ഉദ്യോഗാർഥികളെ വിവരമറിയിക്കൽ തുടങ്ങിയ ഘട്ടങ്ങളിലെല്ലാം കാലതാമസം ഉണ്ടായതായി സംഘടന വ്യക്തമാക്കി.

ഒക്ടോബർ 21-ന് അയച്ച കത്തിൽ, മേയ് 15-ന് ആരംഭിച്ച നിയമന നടപടികൾ വലിയ കാലതാമസത്തിന് വിധേയമായതായി എംഎഎം മുന്നറിയിപ്പ് നൽകിയിരുന്നു. തങ്ങൾ തിരഞ്ഞെടുക്കപ്പെട്ടിട്ടുണ്ടോ, പരിശീലനം എപ്പോൾ ആരംഭിക്കാനാകും തുടങ്ങിയ കാര്യങ്ങളിൽ അപേക്ഷകർക്ക് വ്യക്തതയില്ലാത്ത സാഹചര്യമാണുണ്ടായതെന്നും സംഘടന ചൂണ്ടിക്കാട്ടി.

ഈ കാലതാമസം ഡോക്ടർമാരുടെ കരിയർ ആസൂത്രണത്തെ പ്രതികൂലമായി ബാധിക്കുന്നതായും സ്പെഷ്യലിസ്റ്റ് പരിശീലനം പൂർത്തിയാക്കാൻ കൂടുതൽ സമയം വേണ്ടിവരുന്നതിനും വരുമാനത്തിൽ വലിയ നഷ്ടമുണ്ടാകുന്നതിനും കാരണമാകാമെന്നും എംഎഎം വ്യക്തമാക്കി.

നിയമന നടപടികൾ കൂടുതൽ കാലതാമസമില്ലാതെ പൂർത്തിയാക്കണമെന്നും ഇതിലുണ്ടായ വീഴ്ചകൾ ഔദ്യോഗികമായി വിലയിരുത്തണമെന്നും സംഘടന നേരത്തെ ആവശ്യപ്പെട്ടിരുന്നു. ഭാവിയിൽ സമാന പ്രശ്നങ്ങൾ ആവർത്തിക്കാതിരിക്കാൻ സുതാര്യമായ നിയമന നടപടിക്രമം കൊണ്ടുവരണമെന്നും ആവശ്യപ്പെട്ടിരുന്നു.

എന്നാൽ തർക്കം ഇപ്പോഴും പരിഹരിക്കപ്പെടാതെ തുടരുകയാണെന്നും പ്രശ്നം നിലനിൽക്കുന്നിടത്തോളം കൂടുതൽ വ്യാവസായിക സമര നടപടികൾ പ്രഖ്യാപിക്കാനുള്ള അവകാശം സംഘടനയിൽ നിക്ഷിപ്തമാണെന്നും എംഎഎം വ്യക്തമാക്കി.

Related Articles

Leave a Reply

Your email address will not be published. Required fields are marked *

Back to top button