പുതിയ നിയമഭേദഗതി; സ്വയംതൊഴിൽ ചെയ്യുന്ന ടാക്സി ഡ്രൈവർമാരെ സസ്പെൻഡ് ചെയ്ത് ഊബർ
അടുത്തിടെ നിലവിൽ വന്ന പുതിയ നിയമഭേദഗതികളുടെ പശ്ചാത്തലത്തിൽ സ്വയംതൊഴിൽ ചെയ്യുന്ന (Self-employed) ടാക്സി ഡ്രൈവർമാർക്ക് ഊബർ പ്രവർത്തനാനുമതി താൽക്കാലികമായി നിഷേധിച്ചു.
യാത്രക്കാരുടെ റൈഡ് റിക്വസ്റ്റുകൾ സ്വീകരിക്കുന്നതിന് മുൻപ് തന്നെ, യാത്രയുടെ നിരക്കും മറ്റ് വിവരങ്ങളും ഡ്രൈവർമാർക്ക് നൽകണമെന്ന് ഈ ആഴ്ച ആദ്യം റൈഡ്-ഹെയിലിംഗ് പ്ലാറ്റ്ഫോമുകൾക്ക് നിർബന്ധമാക്കിയിരുന്നു. വിദേശ രാജ്യങ്ങളിൽ ഇത് സാധാരണയായി നിലനിൽക്കുന്ന രീതിയാണ്.
എന്നാൽ, “ഈ പുതിയ നിയന്ത്രണങ്ങൾ പാലിക്കുന്നതിന് ആവശ്യമായ സാങ്കേതികവിദ്യ നടപ്പിലാക്കുന്നതിനായി ഇപ്പോൾ പ്രവർത്തിച്ചുവരികയാണ്” എന്ന് ആഗോള റൈഡ്-ഹെയിലിംഗ് ഭീമനായ ഊബർ പ്രാദേശിക ഡ്രൈവർമാർക്ക് അയച്ച സന്ദേശത്തിൽ വ്യക്തമാക്കി.
ഡ്രൈവർമാരുടെ കൂട്ടായ്മയായ ലൈറ്റ് പാസഞ്ചർ ഓപ്പറേറ്റേഴ്സ് അസോസിയേഷൻ (LPOA) ആണ് ഊബറിന്റെ ഈ തീരുമാനത്തെ രൂക്ഷമായി വിമർശിച്ചുകൊണ്ട് സന്ദേശം ഫേസ്ബുക്കിൽ പങ്കുവെച്ചത്. മറ്റ് രാജ്യങ്ങളിൽ സമാനമായ സാങ്കേതികവിദ്യ ഊബർ നൽകുന്നുണ്ടെങ്കിലും, മാൾട്ടയിൽ ആവശ്യമായ മാറ്റങ്ങൾ വരുത്തുന്നതിൽ കമ്പനിക്ക് ബുദ്ധിമുട്ടുകൾ നേരിടേണ്ടി വന്നതായി ഇവർ ആരോപിക്കുന്നു.
“എല്ലാവർക്കും അനുയോജ്യമായ രീതിയിൽ പ്രശ്നപരിഹാരം കണ്ടെത്തുന്നതിന് അധികൃതരുമായി സഹകരിച്ച് യഥാസമയം പരിഹാരം ഉണ്ടാക്കുന്നതിന് പകരം, വരും ആഴ്ചകളിൽ പ്രശ്നം പരിഹരിക്കപ്പെടാം എന്ന പ്രതീക്ഷയിൽ സ്വയംതൊഴിൽ ചെയ്യുന്ന ഓപ്പറേറ്റർമാരെ ഊബർ സസ്പെൻഡ് ചെയ്യുകയാണ് ചെയ്തത്,” എൽ.പി.ഒ.എ വ്യക്തമാക്കി.
പുതിയ നിയന്ത്രണങ്ങൾ കാരണമാക്കിയുള്ള ഈ സസ്പെൻഷൻ അംഗീകരിക്കാനാകില്ലെന്ന് വ്യക്തമാക്കിയ എൽ.പി.ഒ.എ, പുതിയ നിയമങ്ങൾ പാലിച്ചുകൊണ്ട് തന്നെ ഡ്രൈവർമാർക്ക് ജോലിയിൽ തുടരാൻ കഴിയുന്ന രീതിയിലുള്ള പരിഹാരം ഉടൻ കണ്ടെത്തണമെന്ന് ആവശ്യപ്പെട്ടു.
