കാൻബിസ് നിയമങ്ങൾ പുനഃപരിശോധിക്കണം : എംഎച്ച്ആർഎ
മാൾട്ടയിലെ കഞ്ചാവ് (Cannabis) സംബന്ധിച്ച നിലവിലെ നിയമം പുനഃപരിശോധിക്കണമെന്ന് മാൾട്ട ഹോട്ടൽസ് ആൻഡ് റെസ്റ്റോറന്റ്സ് അസോസിയേഷൻ (MHRA) ആവശ്യപ്പെട്ടു. മാൾട്ട മയക്കുമരുന്ന് ഉപയോഗത്തോട് അമിതമായ ഇളവ് കാണിക്കുന്ന രാജ്യമാണെന്ന തെറ്റായ സന്ദേശം നിലവിലെ നിയമം നൽകുന്ന സാഹചര്യം ഒഴിവാക്കേണ്ടതുണ്ടെന്ന് സംഘടന വ്യക്തമാക്കി.
സാമൂഹിക വിരുദ്ധ പെരുമാറ്റങ്ങൾക്കെതിരെ കർശന നടപടി സ്വീകരിക്കാനുള്ള സർക്കാർ നീക്കത്തെ എംഎച്ച്ആർഎ സ്വാഗതം ചെയ്തു. എന്നാൽ ഇത്തരം നടപടികൾ ഫലപ്രദമാകണമെങ്കിൽ നിലവിലെ നിയമങ്ങളിൽ സമഗ്രമായ പരിഷ്കരണം അനിവാര്യമാണെന്ന് ശനിയാഴ്ച പുറത്തിറക്കിയ പ്രസ്താവനയിൽ അസോസിയേഷൻ വ്യക്തമാക്കി.
നിയമലംഘകർക്ക് ഉടനടി പിഴ ചുമത്തുന്ന സംവിധാനം കൊണ്ടുവന്നതിനെ സ്വാഗതം ചെയ്ത അസോസിയേഷൻ, നിലവിലെ നിയമങ്ങൾ കൂടുതൽ കാര്യക്ഷമമാക്കാൻ സമഗ്രമായ അഴിച്ചുപണി അത്യാവശ്യമാണെന്ന് ചൂണ്ടിക്കാട്ടി.
വെള്ളിയാഴ്ച പുറപ്പെടുവിച്ച പുതിയ നിയമ ഉത്തരവ് പ്രകാരം, സ്വദേശികളല്ലാത്ത വിനോദസഞ്ചാരികൾക്ക് 200 യൂറോയോ അതിൽ കൂടുതലോ പിഴ ലഭിച്ചാൽ, അവരുടെ അവധിക്കാലം പൂർത്തിയാകുന്നതിന് മുൻപ് തന്നെ രാജ്യത്ത് നിന്ന് നാടുകടത്താൻ വ്യവസ്ഥയുണ്ട്.
മാൾട്ട പോലീസിനും മാൾട്ട ടൂറിസം അതോറിറ്റിക്കും (MTA) വ്യക്തമായ അധികാരങ്ങൾ നൽകുന്ന, പ്രായോഗികവും നടപ്പിലാക്കാൻ സാധിക്കുന്നതുമായ നിയമങ്ങൾ കൊണ്ടുവരണമെന്നാണ് എംഎച്ച്ആർഎ ആവശ്യപ്പെടുന്നത്. നിലവിലെ അവ്യക്തമായ നിയമങ്ങൾ തിരുത്തുന്നത് അധികൃതർക്ക് കൃത്യമായി ഇടപെടാൻ സഹായകരമാകും.
രാത്രികാലങ്ങളിലെ മദ്യവില്പനയിൽ കർശന നിയന്ത്രണം വേണമെന്നും കടകൾ കുറഞ്ഞ വിലയിൽ തടസ്സമില്ലാതെ മദ്യം വിതരണം ചെയ്യുന്ന കേന്ദ്രങ്ങളായി മാറരുതെന്നും അസോസിയേഷൻ കൂട്ടിച്ചേർത്തു.
ശബ്ദമലിനീകരണത്തിനെതിരെ അളക്കാവുന്ന ഡെസിബെൽ പരിധികൾ നിശ്ചയിച്ച് വ്യക്തമായ നിയമം കൊണ്ടുവരണമെന്നും സംഘടന ആവശ്യപ്പെട്ടു. ഇത് നാട്ടുകാർക്കും വിനോദസഞ്ചാരികൾക്കും ബിസിനസുകൾക്കും ഒരുപോലെ ആശ്വാസകരമാകും.
മാൾട്ട വിനോദവും സന്തോഷവും പകരുന്ന ഇടമായി തുടരുമ്പോഴും, പ്രാദേശിക സമൂഹത്തോടുള്ള ആദരവ് നിലനിർത്തേണ്ടതുണ്ടെന്ന് എംഎച്ച്ആർഎ പ്രസിഡന്റ് ടോണി സഹ്റ പറഞ്ഞു. വിനോദസഞ്ചാര മേഖലയുടെ കാര്യക്ഷമമായ നടത്തിപ്പ് എല്ലാവരുടെയും കൂട്ടായ ഉത്തരവാദിത്തമാണെന്ന് സംഘടന വ്യക്തമാക്കി.
