വിരമിക്കൽ പ്രായത്തിലോ സുരക്ഷാ വിഹിതത്തിന്റെ നിരക്കിലോ വർദ്ധനവ് ഉണ്ടാകില്ല : സർക്കാർ

2025-ലെ തന്ത്രപ്രധാനമായ പെൻഷൻ റിപ്പോർട്ടിലുള്ള പൊതുജന അഭിപ്രായങ്ങൾ സ്വീകരിച്ചതിന് ശേഷം, വിരമിക്കൽ പ്രായമോ സാമൂഹിക സുരക്ഷാ വിഹിതത്തിന്റെ നിരക്കോ വർദ്ധിപ്പിക്കില്ലെന്ന് ഉറപ്പുനൽകി സർക്കാർ.

കഴിഞ്ഞ ഡിസംബറിൽ പാർലമെന്റിൽ അവതരിപ്പിച്ച ഈ റിപ്പോർട്ട്, തിരഞ്ഞെടുപ്പ് പ്രകടനപത്രികയിൽ നൽകിയ വാഗ്ദാനം നിറവേറ്റുന്നതാണ്. വരും വർഷങ്ങളിൽ നടപ്പിലാക്കാൻ ഉദ്ദേശിക്കുന്ന നിരവധി നടപടികളെക്കുറിച്ച് സാമൂഹിക നയ-കുടുംബകാര്യ മന്ത്രി മൈക്കൽ ഫാൽസൺ വിശദീകരിച്ചു.

“ഈ നിയമസഭാ കാലാവധിക്കുള്ളിൽ ആസൂത്രണം ചെയ്ത നിരവധി നടപടികളിലൂടെ സർക്കാർ പെൻഷനുകൾ ശക്തിപ്പെടുത്തുന്നത് തുടരും, വരാനിരിക്കുന്ന ബജറ്റിലും ഇത് പ്രതിഫലിക്കും,” മന്ത്രി മൈക്കൽ ഫാൽസൺ പറഞ്ഞു.

പ്രഖ്യാപിച്ച പ്രധാന നടപടികൾ :-

* പെൻഷൻ വർദ്ധനവ് : നിയമസഭാ കാലാവധിക്കുള്ളിൽ ആഴ്ചതോറും 50 യൂറോയുടെ              വർദ്ധനവ് നടപ്പിലാക്കും.

* വിധവകൾക്കും വിഭാര്യർക്കും ഉള്ള പെൻഷൻ : അടുത്ത വർഷം മുതൽ, പങ്കാളി                 ജീവിച്ചിരുന്നെങ്കിൽ ലഭിക്കുമായിരുന്ന അതേ തുക പെൻഷനായി ഇവർക്കും ലഭിക്കും.

* ജീവിതച്ചെലവ് ബോണസ് : അടുത്ത വർഷം മുതൽ ഇത് എല്ലാവർക്കും                                         തുല്യമായിരിക്കും.

* പരമാവധി പെൻഷൻ വരുമാനം : 2028-ഓടെ, ജനനത്തീയതി പരിഗണിക്കാതെ                       എല്ലാവർക്കും പരമാവധി പെൻഷൻ വരുമാനം തുല്യമാകും.

ഇതുകൂടാതെ, പെൻഷൻകാർക്കും വയോജനങ്ങൾക്കും മാത്രമല്ല, കുടുംബങ്ങൾക്കും കുട്ടികൾക്കും ഭിന്നശേഷിക്കാർക്കും മറ്റ് ദുർബല വിഭാഗങ്ങൾക്കും പ്രയോജനപ്പെടുന്ന നിരവധി സാമൂഹിക നടപടികൾ അടുത്ത അഞ്ച് വർഷത്തിനുള്ളിൽ ആസൂത്രണം ചെയ്തിട്ടുണ്ട്.

ഈ വിഷയവുമായി ബന്ധപ്പെട്ട് നടന്ന പൊതുജന കൂടിയാലോചനയിൽ 14 നിർദ്ദേശങ്ങളാണ് ലഭിച്ചത്. ഇതിൽ ആറെണ്ണം സംഘടനകളിൽ നിന്നും രണ്ടെണ്ണം സ്വകാര്യ കമ്പനികളിൽ നിന്നും ആറെണ്ണം വ്യക്തികളിൽ നിന്നുമാണ് ലഭിച്ചത്. പെർമനന്റ് സെക്രട്ടറി മാർക്ക് മുസുവിന്റെ നേതൃത്വത്തിലുള്ള ‘സ്ട്രാറ്റജിക് പെൻഷൻ ഗ്രൂപ്പ്’ ഈ നിർദ്ദേശങ്ങൾ പരിശോധിച്ച ശേഷം സർക്കാരിന് അന്തിമ റിപ്പോർട്ട് സമർപ്പിക്കും. വിരമിക്കൽ പ്രായമോ സാമൂഹിക സുരക്ഷാ വിഹിതമോ വർദ്ധിപ്പിക്കേണ്ടതില്ലെന്ന് ഈ നിർദ്ദേശങ്ങൾ വ്യക്തമാക്കുന്നു.

രാജ്യത്തിന്റെ ശക്തമായ സമ്പദ്‌വ്യവസ്ഥയും സാമ്പത്തിക നിലയുമാണ് ഈ നടപടികൾ സാധ്യമാക്കുന്നതെന്ന് മന്ത്രി വ്യക്തമാക്കി. മാൾട്ടയുടെ പെൻഷൻ സംവിധാനം പര്യാപ്തവും സുസ്ഥിരവുമാണെന്ന് അവസാനത്തെ തന്ത്രപ്രധാന റിപ്പോർട്ടും സ്ഥിരീകരിച്ചിട്ടുണ്ടെന്ന് അദ്ദേഹം കൂട്ടിച്ചേർത്തു.