ആഗോളതലത്തിൽ പ്രവർത്തിച്ചിരുന്ന വൻ ഓൺലൈൻ തട്ടിപ്പ് ശൃംഖലകൾക്കെതിരെ കർശന നടപടി സ്വീകരിച്ച് കംബോഡിയൻ സർക്കാർ

മെകോങ് : കംബോഡിയയിൽ ആഗോളതലത്തിൽ പ്രവർത്തിച്ചിരുന്ന വൻ ഓൺലൈൻ തട്ടിപ്പ് ശൃംഖലകൾക്കെതിരെ സർക്കാർ കർശന നടപടി സ്വീകരിച്ചു. കഴിഞ്ഞ ഏതാനും ആഴ്ചകൾക്കുള്ളിൽ ഏകദേശം 200 തട്ടിപ്പ് കേന്ദ്രങ്ങൾ പൂട്ടിച്ചതായി കംബോഡിയൻ സർക്കാർ അറിയിച്ചു.

വിയറ്റ്നാം അതിർത്തിക്കടുത്തുള്ള കംപോട്ട് പ്രവിശ്യയിലെ ഒരു കേന്ദ്രത്തിൽ നടന്ന പരിശോധനയിൽ ഞെട്ടിക്കുന്ന വിവരങ്ങളാണ് പുറത്തുവന്നത്. അവിടെ പ്രവർത്തിച്ചിരുന്ന കേന്ദ്രത്തിൽ ഒരു വ്യാജ ഇന്ത്യൻ പോലീസ് സ്റ്റേഷനും മഹാത്മാഗാന്ധിയുടെ ചിത്രവും കണ്ടെത്തി. ആളുകളെ ഭീഷണിപ്പെടുത്തി പണം തട്ടാനാണ് ഇത്തരം വ്യാജ സംവിധാനങ്ങൾ ഇവർ ഒരുക്കിയിരുന്നത്.

കംബോഡിയൻ ഓൺലൈൻ തട്ടിപ്പ് പ്രതിരോധ കമ്മീഷൻ അധ്യക്ഷൻ ഛായ് സിനാരിത്ത് ആണ് ഈ വിവരങ്ങൾ പുറത്തുവിട്ടത്. ഇതുവരെ 190 ഓളം കേന്ദ്രങ്ങൾ അധികൃതർ സീൽ ചെയ്തിട്ടുണ്ട്.

ഈ കേന്ദ്രങ്ങളുമായി ബന്ധപ്പെട്ട 173 ഉന്നത കുറ്റവാളികളെ അറസ്റ്റ് ചെയ്യുകയും വിവിധ രാജ്യങ്ങളിൽ നിന്നുള്ള 11,000 തൊഴിലാളികളെ നാടുകടത്തുകയും ചെയ്തു. ചൈനീസ് വംശജനായ തട്ടിപ്പ് രാജാവിനെ ചൈനയ്ക്ക് കൈമാറിയതിന് പിന്നാലെയാണ് കംബോഡിയ ഈ മേഖലയിൽ കർശന പരിശോധനകൾ ആരംഭിച്ചത്.

കംപോട്ടിലെ ‘മൈ കാസിനോ’ (My Casino) എന്ന സമുച്ചയത്തിലാണ് വ്യാജ പോലീസ് സ്റ്റേഷൻ കണ്ടെത്തിയത്. ഇവിടെ കമ്പ്യൂട്ടറുകളുടെയും ഫോണുകളുടെയും വൻശേഖരം ഉണ്ടായിരുന്നു. തായ്‌ലൻഡിലെയും ഇന്ത്യയിലെയും ആളുകളെ വിളിക്കാൻ പ്രത്യേക സ്റ്റുഡിയോ ബൂത്തുകളും തയ്യാറാക്കിയിരുന്നു.

യൂണിഫോമും പോലീസ് സ്റ്റേഷന്റെ പശ്ചാത്തലവും ഉപയോഗിച്ച് വീഡിയോ കോളുകൾ ചെയ്താണ് ഇവർ ഇരകളെ ഭീഷണിപ്പെടുത്തിയിരുന്നത്. ഗാന്ധിജിയുടെ ചിത്രം ഉപയോഗിച്ചതിലൂടെ ഇന്ത്യക്കാരായ ഇരകളിൽ വിശ്വാസം ജനിപ്പിക്കാനാണ് ഇവർ ശ്രമിച്ചതെന്ന് കരുതപ്പെടുന്നു. ഇത്തരത്തിൽ വ്യാജ പോലീസ് ഓഫീസർമാരായി ചമഞ്ഞാണ് കോടിക്കണക്കിന് രൂപ സംഘം തട്ടിയെടുത്തിരുന്നത്.

പ്രമുഖ വ്യവസായിയും കാസിനോ ഉടമയുമായ ലി കുഓങ് (Ly Kuong) കഴിഞ്ഞ മാസം അറസ്റ്റിലായതോടെയാണ് ഇത്തരം കേന്ദ്രങ്ങൾ പൂട്ടാൻ വഴിതെളിഞ്ഞത്. മനുഷ്യക്കടത്ത്, പണം വെളുപ്പിക്കൽ, തട്ടിപ്പ് തുടങ്ങിയ കുറ്റങ്ങളാണ് ഇയാൾക്കെതിരെ ചുമത്തിയിരിക്കുന്നത്.

ലി കുഓങ്ങിന്റെ അറസ്റ്റിന് പിന്നാലെ ആയിരക്കണക്കിന് തൊഴിലാളികളാണ് ഈ കേന്ദ്രങ്ങളിൽ നിന്ന് ഓടി രക്ഷപ്പെട്ടത്. കംപോട്ട് പ്രവിശ്യയിൽ ആവശ്യത്തിന് പോലീസ് ഇല്ലാത്തതിനാൽ ഓടിപ്പോയവരെ മുഴുവൻ പിടികൂടാൻ കഴിഞ്ഞില്ലെന്ന് അധികൃതർ സമ്മതിക്കുന്നു. ഇവർ അതിർത്തി കടന്നോ ഒളിവിൽ കഴിയുകയാണോ എന്ന കാര്യത്തിൽ വ്യക്തതയില്ല.

തട്ടിപ്പ് കേന്ദ്രങ്ങളിൽ ക്രൂരമായ സാഹചര്യത്തിലാണ് പല തൊഴിലാളികളും കഴിഞ്ഞിരുന്നതെന്ന് ആംനസ്റ്റി ഇന്റർനാഷണൽ റിപ്പോർട്ട് ചെയ്യുന്നു. ഇതിനെ ഒരു ‘മാനുഷിക പ്രതിസന്ധി’ എന്നാണ് സംഘടന വിശേഷിപ്പിച്ചത്. പലരെയും നിർബന്ധിച്ചും ഭീഷണിപ്പെടുത്തിയും ജോലി ചെയ്യിപ്പിക്കുകയായിരുന്നു.

2026 ഏപ്രിലോടെ രാജ്യത്തെ ഓൺലൈൻ തട്ടിപ്പ് കേന്ദ്രങ്ങൾ പൂർണ്ണമായും ഇല്ലാതാക്കുക എന്നതാണ് കംബോഡിയൻ സർക്കാരിന്റെ ലക്ഷ്യം. ഫെബ്രുവരി ആദ്യവാരത്തിൽ തായ് സൈന്യവും കംബോഡിയൻ അതിർത്തിയിലെ ഇത്തരം ചില കേന്ദ്രങ്ങളിൽ റെയ്ഡ് നടത്തിയിരുന്നു.