എഐ പുനഃക്രമീകരണം; മൈക്രോസോഫ്റ്റിലും കൂട്ടപ്പിരിച്ചുവിടൽ

ലണ്ടൻ : നിക്ഷേപങ്ങൾ പൂർണ്ണമായും ആർട്ടിഫിഷ്യൽ ഇന്റലിജൻസ് ഇൻഫ്രാസ്ട്രക്ചറിലേക്ക് കേന്ദ്രീകരിക്കുന്നതിന്റെ ഭാഗമായി പ്രമുഖ ടെക് ഭീമനായ മൈക്രോസോഫ്റ്റ് തങ്ങളുടെ ജീവനക്കാരുടെ എണ്ണത്തിൽ വെട്ടിക്കുറയ്ക്കൽ പ്രഖ്യാപിച്ചു. വാണിജ്യ, എക്സ്ബോക്സ് ബിസിനസ്സ് മേഖലകൾ പുനഃക്രമീകരിക്കുന്നതിന്റെ ഭാഗമായി ആകെ ജീവനക്കാരുടെ 2.1 ശതമാനം പേരെ അതായത് ഏകദേശം 4,800 ഓളം ജീവനക്കാരെയാണ് കമ്പനി പിരിച്ചുവിടുന്നത്. മറ്റ് പ്രമുഖ ആഗോള ടെക് കമ്പനികളും സമാനമായ രീതിയിൽ വലിയ തോതിൽ ജീവനക്കാരെ പിരിച്ചുവിട്ടു കൊണ്ടിരിക്കുന്ന സാഹചര്യത്തിലാണ് മൈക്രോസോഫ്റ്റിന്റെ ഈ പുതിയ പ്രഖ്യാപനം. ഇതോടെ വിപണി ആരംഭിച്ച ആദ്യ മണിക്കൂറുകളിൽ കമ്പനിയുടെ ഓഹരി മൂല്യത്തിൽ 1.5 ശതമാനം ഇടിവ് രേഖപ്പെടുത്തി.

2026ന്റെ ആദ്യ ആറ് മാസങ്ങളിൽ ഓഹരി മൂല്യത്തിൽ ഏകദേശം 23 ശതമാനത്തോളം ഇടിവ് രേഖപ്പെടുത്തിയതിന് പിന്നാലെയാണ് തിങ്കളാഴ്ച മൈക്രോസോഫ്റ്റ് ജീവനക്കാരുടെ വെട്ടിക്കുറയ്ക്കൽ പ്രഖ്യാപിച്ചത്.

ബിസിനസ്സിലുടനീളം എഐ നടപ്പിലാക്കുന്നതിനുണ്ടാകുന്ന ഭീമമായ ചെലവുകൾ നികത്താൻ കമ്പനികൾ ഇപ്പോൾ നിർബന്ധിതരായിരിക്കുകയാണ്. ഇതിന്റെ ഭാഗമായി ആമസോൺ, മെറ്റാ പ്ലാറ്റ്‌ഫോംസ് എന്നീ പ്രമുഖ കമ്പനികളും ഈ വർഷം ആയിരക്കണക്കിന് ജീവനക്കാരെയാണ് പിരിച്ചുവിട്ടത്. എഐ നിക്ഷേപങ്ങൾക്കുള്ള തുക കണ്ടെത്തുന്നതിനായി മൈക്രോസോഫ്റ്റ് ജീവനക്കാരുടെ എണ്ണം ബോധപൂർവ്വം കുറച്ചുകൊണ്ടുവരികയാണെന്ന് ഡി എ ഡേവിഡ്‌സണിലെ മാനേജിംഗ് ഡയറക്ടറായ ഗിൽ ലൂറിയ വ്യക്തമാക്കി. ജീവനക്കാരുടെ എണ്ണം നിയന്ത്രിച്ചു നിർത്തുന്നതിലൂടെ ലാഭവിഹിതത്തിൽ മാറ്റമില്ലാതെ നിലനിർത്തിക്കൊണ്ടുതന്നെ വരുമാന വളർച്ച വേഗത്തിലാക്കാൻ അവർക്ക് സാധിക്കുന്നുണ്ട്.

പതിവ് ജോലികൾ ഓട്ടോമേറ്റ് ചെയ്തുകൊണ്ട് എഐ പ്രവർത്തനരീതികളിൽ മാറ്റങ്ങൾ വരുത്തുന്നുണ്ടെങ്കിലും ഈ പിരിച്ചുവിടലുകൾ കമ്പനിയുടെ മുൻഗണനകൾക്കനുസരിച്ച് പ്രവർത്തന ഘടന പുനഃക്രമീകരിക്കുന്നതിനുള്ള ശ്രമങ്ങളുടെ ഭാഗമാണെന്ന് ജീവനക്കാർക്കയച്ച ഔദ്യോഗിക കുറിപ്പിൽ മൈക്രോസോഫ്റ്റ് വ്യക്തമാക്കി. ഒഴിവാക്കപ്പെട്ട തസ്തികകൾക്ക് പകരം എഐയെ നിയമിക്കുകയല്ല ചെയ്യുന്നതെന്ന കാര്യം താൻ നേരിട്ട് തന്നെ വ്യക്തമാക്കാൻ ആഗ്രഹിക്കുന്നുവെന്നും, എന്നാൽ ജോലികൾ ചെയ്യുന്ന രീതിയെ എഐ മാറ്റിമറിക്കുന്നു എന്നത് തികച്ചും യാഥാർത്ഥ്യമാണെന്നും മൈക്രോസോഫ്റ്റ് കുറിപ്പിൽ കൂട്ടിച്ചേർത്തു. ഈ വർഷം തുടക്കത്തിൽ കമ്പനി തങ്ങളുടെ യുഎസിലെ 9,000 ജീവനക്കാർക്ക് സ്വമേധയാ വിരമിക്കാനുള്ള പാക്കേജുകളും വാഗ്ദാനം ചെയ്തിരുന്നു. പുതിയ സാമ്പത്തിക വർഷത്തേക്കുള്ള ചെലവുകൾ ആസൂത്രണം ചെയ്യുന്നതിന്റെ ഭാഗമായി ജൂണിൽ അവസാനിക്കുന്ന സാമ്പത്തിക വർഷാവസാനത്തോട് അനുബന്ധിച്ച് മൈക്രോസോഫ്റ്റ് സാധാരണയായി ഇത്തരം ജീവനക്കാരുടെ പുനഃക്രമീകരണം നടത്താറുണ്ട്.

പതിവ് ബിസിനസ്സ് ജോലികൾ കൂടുതൽ എളുപ്പത്തിൽ ഓട്ടോമേറ്റ് ചെയ്യാൻ ശേഷിയുള്ള എഐ ടൂളുകളുടെ വരവ് മൈക്രോസോഫ്റ്റിന്റെ ഏറ്റവും ലാഭകരമായ സോഫ്റ്റ്‌വെയർ ബിസിനസ്സിന് വലിയൊരു ഭീഷണിയായി ഉയർന്നുവന്നിട്ടുണ്ട്. ഇതിനുപുറമേ ഡാറ്റാ സെന്ററുകളുടെ വർധിച്ച ഡിമാൻഡ് കാരണം മെമ്മറി ചിപ്പുകളുടെ വില കുതിച്ചുയർന്നതും കമ്പനിക്ക് തിരിച്ചടിയായി. വിപണിയിൽ എക്സ്ബോക്സ് കൺസോളുകളുടെ ഡിമാൻഡ് ഇതിനകം തന്നെ കുറഞ്ഞുനിൽക്കുന്ന സമയത്താണ് ചിപ്പുകളുടെ വിലവർധനവ് മൂലം കൺസോളുകളുടെ വില കൂട്ടാൻ മൈക്രോസോഫ്റ്റ് നിർബന്ധിതരായത്. ഇതോടെ ഗെയിമിംഗ് ഡിവിഷനും പുനഃക്രമീകരണത്തിന്റെ പാതയിലാണ്.