എൽഎസ്ഇ സീനിയോറിറ്റി സംബന്ധിച്ച ഓംബുഡ്സ്മാന്റെ ശുപാർശ നടപ്പിലാക്കും : വിദ്യാഭ്യാസ മന്ത്രാലയം
പുതിയ നിയമനങ്ങൾക്കുള്ള എൽഎസ്ഇ സീനിയോറിറ്റി സംബന്ധിച്ച ഓംബുഡ്സ്മാന്റെ ശുപാർശ മന്ത്രാലയം അംഗീകരിച്ചു. ലേണിംഗ് സപ്പോർട്ട് എഡ്യൂക്കേറ്റർമാരുടെ (LSEs) സീനിയോറിറ്റിയുമായി ബന്ധപ്പെട്ട ഓംബുഡ്സ്മാന്റെ ശുപാർശ നടപ്പിലാക്കാൻ വിദ്യാഭ്യാസ മന്ത്രാലയം തീരുമാനിച്ചത്. നിലവിലുണ്ടായിരുന്ന രീതി നിയമവിരുദ്ധവും വിവേചനപരവുമാണെന്ന് കണ്ടെത്തി അഞ്ച് മാസത്തിന് ശേഷമാണ് മന്ത്രാലയം ഇത്തരമൊരു തീരുമാനത്തിലെത്തിയത്.
ചൊവ്വാഴ്ച ജീവനക്കാർക്ക് അയച്ച സർക്കുലറിൽ, ഇനി മുതൽ നിയമിക്കപ്പെടുന്ന എൽഎസ്ഇമാരുടെ സീനിയോറിറ്റി, പബ്ലിക് സർവീസിന്റെ ‘മാനുവൽ ഓൺ റിസോഴ്സിംഗ് പോളിസിസ് ആൻഡ് പ്രൊസീജിയേഴ്സി’ലെ സെക്ഷൻ 3.14-ൽ പറഞ്ഞിരിക്കുന്ന നടപടിക്രമങ്ങൾക്കനുസൃതമായിരിക്കുമെന്ന് മന്ത്രാലയം വ്യക്തമാക്കി.
“വർഷങ്ങളായി എൽഎസ്ഇമാർ നൽകുന്ന സേവനത്തെയും അവരുടെ പ്രൊഫഷണലിസത്തെയും മന്ത്രാലയം പൂർണ്ണമായി അംഗീകരിക്കുന്നു. നീതി, ബഹുമാനം, വിദ്യാഭ്യാസ സംവിധാനത്തിലേക്കുള്ള അവരുടെ സംഭാവനകൾ എന്നിവയെ അടിസ്ഥാനമാക്കിയുള്ളതായിരിക്കണം ഏത് പരിഹാരവും എന്ന് ഞങ്ങൾ വിശ്വസിക്കുന്നു,” എന്ന് സർക്കുലറിൽ പറയുന്നു.
നിലവിൽ ജോലി ചെയ്യുന്ന ഉദ്യോഗസ്ഥർക്കായി “നീതിയുക്തവും സുതാര്യവും സുസ്ഥിരവുമായ പരിഹാരങ്ങൾ” കണ്ടെത്തുന്നതിനുള്ള പ്രവർത്തനങ്ങൾ തുടരുകയാണെന്ന് മന്ത്രാലയം അറിയിച്ചു. കഴിഞ്ഞ മാസങ്ങളിൽ മാൾട്ട യൂണിയൻ ഓഫ് ടീച്ചേഴ്സുമായി (MUT) പലതവണ ചർച്ചകൾ നടത്തിയതായും മന്ത്രാലയം വ്യക്തമാക്കി.
താൽപ്പര്യമുള്ള ആർക്കും തങ്ങളുടെ അഭിപ്രായങ്ങളോ നിർദ്ദേശങ്ങളോ നിയമപരമായ ഉപദേശങ്ങളോ രേഖാമൂലം സമർപ്പിക്കാൻ രണ്ടാഴ്ചത്തെ സമയം മന്ത്രാലയം നൽകിയിട്ടുണ്ട്. അന്തിമ തീരുമാനമെടുക്കുന്നതിന് മുൻപായി ഈ നിർദ്ദേശങ്ങൾ പരിഗണിക്കും.
സർക്കാർ സർവീസിലെ 329 എൽഎസ്ഇമാർ നൽകിയ പരാതിയെത്തുടർന്ന് ഓംബുഡ്സ്മാൻ ഓഫീസിലെ വിദ്യാഭ്യാസ കമ്മീഷണർ വിൻസെന്റ് ഡി ഗേറ്റാനോ നടത്തിയ അന്വേഷണത്തെത്തുടർന്നാണ് ഈ നടപടി.
പുതിയതോ ഉയർന്നതോ ആയ യോഗ്യതകൾ നേടുന്ന എൽഎസ്ഇമാരെ, അവരുടെ സേവന കാലയളവ് പരിഗണിക്കാതെ, സീനിയോറിറ്റിയിൽ സഹപ്രവർത്തകർക്ക് മുകളിൽ ഉൾപ്പെടുത്തുന്ന രീതിയായിരുന്നു മന്ത്രാലയം പിന്തുടർന്നിരുന്നത്. ഇത് സ്കൂളുകളിലെ നിയമനങ്ങളെയും പുനർനിയമനങ്ങളെയും ബാധിച്ചിരുന്നു.
മറ്റ് അധ്യാപകർക്കോ കിൻഡർഗാർട്ടൻ എഡ്യൂക്കേറ്റർമാർക്കോ ഇല്ലാത്ത ഈ രീതി എൽഎസ്ഇമാർക്ക് മാത്രമായി ബാധകമാക്കിയതിനെ കമ്മീഷണർ വിമർശിച്ചു. ഈ രീതിയെ ന്യായീകരിക്കാൻ രേഖാമൂലമുള്ള പോളിസിയോ സർക്കുലറോ നിയമപരമായ രേഖകളോ മന്ത്രാലയത്തിന്റെ പക്കൽ ഉണ്ടായിരുന്നില്ല.
ഈ സമ്പ്രദായം “നിയമവിരുദ്ധവും വിവേചനപരവുമാണെന്ന്” ഡി ഗേറ്റാനോ വിധിച്ചു. പരാതി പൂർണ്ണമായും ന്യായമാണെന്നും, ഓംബുഡ്സ്മാൻ നിയമപ്രകാരം ഇത് ഭരണപരമായ വീഴ്ചയാണെന്നും അദ്ദേഹം അഭിപ്രായപ്പെട്ടു. ഈ നിയമവിരുദ്ധമായ രീതി ഉടൻ നിർത്തണമെന്നും, സീനിയോറിറ്റി മാനുവൽ പ്രകാരം മാത്രം തീരുമാനിക്കണമെന്നും അദ്ദേഹം ശുപാർശ ചെയ്തു.
ആ സമയത്ത്, എംയുടിയുമായി ചർച്ചകൾ നടക്കുന്നുണ്ടെന്ന് പറഞ്ഞ് കമ്മീഷണറുടെ ചോദ്യങ്ങൾക്ക് മന്ത്രാലയം കൃത്യമായ മറുപടി നൽകിയിരുന്നില്ല.
ഈ വിഷയത്തിൽ മന്ത്രാലയത്തോട് വർഷങ്ങളായി യൂണിയൻ പരാതി ഉന്നയിക്കുന്നുണ്ടെന്ന് എംയുടി പ്രസിഡന്റ് മാർക്കോ ബോണിസി പറഞ്ഞു. സീനിയോറിറ്റി എന്നത് മാനേജ്മെന്റ് പ്രക്രിയയായതിനാൽ, അത് എംയുടിയും മന്ത്രാലയവും തമ്മിലുള്ള കരാറിന്റെ ഭാഗമല്ലെന്ന് അദ്ദേഹം വ്യക്തമാക്കി.
വിഷയത്തിന്റെ സങ്കീർണ്ണത കാരണം ഇതുവരെ തീരുമാനമെടുക്കാൻ സാധിച്ചിട്ടില്ലെന്നും, മന്ത്രാലയം ഒരു ഫോം വഴി എൽഎസ്ഇമാരുമായി കൂടിയാലോചനകൾ നടത്തി വരികയാണെന്നുമാണ് യൂണിയനെ അറിയിച്ചിട്ടുള്ളതെന്ന് ബോണിസി കൂട്ടിച്ചേർത്തു.
