അടിയന്തര ചികിത്സാ റഫറൽ പദ്ധതി താൽക്കാലികമായി നിർത്തിവെച്ച് ആരോഗ്യ മന്ത്രാലയം

സ്വകാര്യ ആശുപത്രികളിലേക്ക് സങ്കീർണ്ണമല്ലാത്ത അടിയന്തര പരിചരണ സേവനങ്ങൾ (Emergency Care) ഔട്ട്‌സോഴ്‌സ് ചെയ്യുന്ന പദ്ധതി ആരോഗ്യമന്ത്രാലയം താൽക്കാലികമായി നിർത്തിവെച്ചു. പദ്ധതിയുടെ ഫലപ്രാപ്തി പുനഃപരിശോധിക്കുന്നതിന്റെ ഭാഗമായാണ് ഈ നടപടി.

പദ്ധതി താൽക്കാലികമായി നിർത്തിവെച്ചതായി കഴിഞ്ഞ ആഴ്ച ഇമെയിൽ മുഖേന സ്വകാര്യ ആശുപത്രികളെ അറിയിച്ചിരുന്നു. തുടർനടപടികൾ സംബന്ധിച്ച് മന്ത്രാലയവുമായി ചർച്ചകൾ നടത്തുന്നതുവരെ പദ്ധതി നിർത്തിവെക്കുമെന്നാണ് അറിയിപ്പിൽ വ്യക്തമാക്കിയത്.

എല്ലാ മന്ത്രാലയങ്ങളോടും ചെലവുകൾ പുനഃപരിശോധിക്കാൻ (spending reviews) ധനമന്ത്രാലയം നിർദ്ദേശിച്ചതിനെ തുടർന്നാണ് ഈ തീരുമാനം. സ്വകാര്യ ആശുപത്രികളിൽ ചികിത്സ തേടിയ രോഗികളുടെ എണ്ണം പ്രതീക്ഷിച്ചതിലും വളരെ കുറവായതിനാലാണ് പദ്ധതിയുടെ തുടർച്ചയെക്കുറിച്ച് ആരോഗ്യമന്ത്രാലയം സംശയം പ്രകടിപ്പിച്ചത്.

മാറ്റെർ ഡെയ് (Mater Dei) ആശുപത്രിയിലെ എമർജൻസി വിഭാഗത്തിലെ തിരക്ക് കുറയ്ക്കുന്നതിനായി 2025 ജനുവരിയിലാണ് ഈ പദ്ധതി ആരംഭിച്ചത്. ഗൗരവകരമല്ലാത്ത അടിയന്തര സാഹചര്യങ്ങളുള്ള രോഗികളെ മാറ്റെർ ഡെയ് ആശുപത്രിയിൽ നിന്നോ 1400 ഹെൽപ്പ് ലൈൻ ഓപ്പറേറ്റർമാർ വഴിയോ സ്വകാര്യ ആശുപത്രികളിലേക്ക് മാറ്റുകയായിരുന്നു ചെയ്തിരുന്നത്.

സെന്റ് തോമസ് ഹോസ്പിറ്റൽ, സെന്റ് ജെയിംസ് ഹോസ്പിറ്റൽ, ഡാവിഞ്ചി ഹോസ്പിറ്റൽ എന്നീ മൂന്ന് സ്വകാര്യ ആശുപത്രികളാണ് ഈ പദ്ധതിയിൽ പങ്കാളികളായിരുന്നത്. പ്രത്യേക കോൾ സെന്റർ വഴി അയക്കുന്ന രോഗികളുടെ ചികിത്സാച്ചെലവ് സർക്കാർ ഈ ആശുപത്രികൾക്ക് തിരികെ നൽകുകയായിരുന്നു രീതി.

കഴിഞ്ഞ ഒക്ടോബറിൽ പാർലമെന്റിൽ നൽകിയ മറുപടി പ്രകാരം, 2025 ഏപ്രിൽ മുതൽ ഓഗസ്റ്റ് വരെയുള്ള കാലയളവിൽ 1,530 രോഗികളെ മാത്രമാണ് സ്വകാര്യ എമർജൻസി സർവീസുകളിലേക്ക് മാറ്റിയത്. അതായത്, മൂന്ന് സ്വകാര്യ ആശുപത്രികളിലുമായി പ്രതിമാസം ശരാശരി 300 രോഗികൾ മാത്രം. ഇതിനായി സർക്കാരിന് 5,12,000 യൂറോ ചെലവായി.

എന്നാൽ, മാറ്റെർ ഡെയ് ആശുപത്രിയിലെ എമർജൻസി വിഭാഗത്തിൽ പ്രതിദിനം എത്തുന്ന എണ്ണൂറോളം രോഗികളുമായി താരതമ്യം ചെയ്യുമ്പോൾ ഈ സംഖ്യ വളരെ തുച്ഛമാണ്. മാറ്റെർ ഡെയ് ആശുപത്രിയിലെ അമിതഭാരം കുറയ്ക്കുക എന്ന ലക്ഷ്യത്തോടെയാണ് പബ്ലിക്-പ്രൈവറ്റ് പങ്കാളിത്തം ആരംഭിച്ചതെങ്കിലും, സ്വകാര്യ ആശുപത്രികളിലേക്ക് അയച്ച രോഗികളുടെ എണ്ണം വളരെ കുറവായതിനാൽ പദ്ധതി ലക്ഷ്യം കണ്ടില്ലെന്നാണ് വിലയിരുത്തൽ.

സ്വകാര്യ ആശുപത്രികളിലേക്ക് രോഗികളുടെ എണ്ണം കുറയാനുണ്ടായ വ്യക്തമായ കാരണം ഇതുവരെ വ്യക്തമല്ല. പദ്ധതി നിർത്തിവെക്കുന്നത് വരെ ഓരോ ആശുപത്രിയിലും എത്ര രോഗികൾ ചികിത്സ തേടിയെന്നതിന്റെ പരസ്യമായ കണക്കുകളും ലഭ്യമല്ല.

2026-ലെ ബജറ്റിൽ, മെഡിക്കൽ സേവനങ്ങൾ ഔട്ട്‌സോഴ്‌സ് ചെയ്യുന്നതിനായി ആരോഗ്യമന്ത്രാലയത്തിന് 15 ദശലക്ഷം (1.5 കോടി) യൂറോ വകയിരുത്തിയിരുന്നു. പൊതുജനാരോഗ്യ മേഖലയിലെ വെയ്റ്റിംഗ് ലിസ്റ്റ് കുറയ്ക്കുന്നതിനുള്ള ശസ്ത്രക്രിയകൾ ഉൾപ്പെടെയുള്ള എല്ലാത്തരം ഔട്ട്‌സോഴ്‌സിംഗിനുമായാണ് ഈ തുക നീക്കിവെച്ചിരിക്കുന്നത്.