ആശ്വാസ വാർത്ത : ഇറ്റലിയിൽ ഇന്ധനവില വർദ്ധനവിനെതിരെ ട്രക്ക് ഡ്രൈവർമാർ നടത്തിവന്ന സമരം ഒത്തുതീർപ്പിലേക്ക്
ഇറ്റലിയിൽ ഇന്ധനവില വർദ്ധനവിനെതിരെ ട്രക്ക് ഡ്രൈവർമാർ നടത്തിവന്ന സമരം ഒത്തുതീർപ്പിലേക്ക്. ഇന്ധന പ്രതിസന്ധി പരിഹരിക്കുന്നതിനായി ഇറ്റാലിയൻ സർക്കാർ പുതിയ അടിയന്തര പാക്കേജ് പ്രഖ്യാപിച്ചതിനെ തുടർന്നാണ് പ്രതിഷേധക്കാർ റോഡ് ഉപരോധം അവസാനിപ്പിച്ചു തുടങ്ങിയത്.
ഇന്ധനവില വർദ്ധനവ് മൂലം പ്രതിസന്ധിയിലായ ട്രക്ക് ഡ്രൈവർമാർക്കായി 106 മില്യൺ യൂറോയുടെ അധിക നികുതി ഇളവുകൾ (Tax Credits) പ്രധാനമന്ത്രി ജോർജിയ മെലോണിയുടെ നേതൃത്വത്തിലുള്ള മന്ത്രിസഭ പ്രഖ്യാപിച്ചു. മുൻപ് പ്രഖ്യാപിച്ചിരുന്ന 434 മില്യൺ യൂറോയ്ക്ക് പുറമെയാണിത്. കൂടാതെ കർഷകർക്കായി 60 മില്യൺ യൂറോയും മത്സ്യബന്ധന മേഖലയ്ക്ക് 10 മില്യൺ യൂറോയും അനുവദിച്ചിട്ടുണ്ട്.
സർക്കാർ സഹായം പ്രഖ്യാപിച്ചതിനെ തുടർന്ന് സിസിലി, കലാബ്രിയ തുടങ്ങിയ പ്രധാന മേഖലകളിലെ ട്രക്ക് ഡ്രൈവർമാരുടെ സംഘടനകൾ പ്രതിഷേധം താൽക്കാലികമായി നിർത്തിവെക്കുകയും റോഡ് ഉപരോധങ്ങൾ പിൻവലിക്കാൻ ആരംഭിക്കുകയും ചെയ്തു.
ഒരാഴ്ചയോളമായി തുടർന്ന സമരം തെക്കൻ ഇറ്റലിയിലെ സിസിലി, കലാബ്രിയ, കാമ്പാനിയ എന്നിയിടങ്ങളിലും മാൾട്ടയിലും ഭക്ഷ്യ-ഇന്ധന വിതരണത്തെയും പ്രശസ്തമായ ബഫല്ലോ മൊസറെല്ല ചീസ്, പാസ്ത തുടങ്ങിയവയുടെ ഉൽപ്പാദനത്തെയും ഗുരുതരമായി ബാധിച്ചിരുന്നു. സമരം ഒത്തുതീർപ്പായതോടെ സൂപ്പർമാർക്കറ്റുകളിലേക്കും മറ്റിടങ്ങളിലേക്കുമുള്ള അവശ്യസാധനങ്ങളുടെ വിതരണം പുനഃസ്ഥാപിക്കപ്പെട്ടു തുടങ്ങിയിട്ടുണ്ട്.
എന്നിരുന്നാലും, ഗെല (Gela) പോലുള്ള ചില പ്രത്യേക നഗരങ്ങളിലെ ഡ്രൈവർമാർ കൂടുതൽ കൃത്യമായ ഉറപ്പുകൾ ലഭിക്കുന്നതുവരെ പ്രതിഷേധം തുടരുമെന്ന് അറിയിച്ചിട്ടുണ്ട്.
