യെമനിലെ അൽ ആലം സൈനിക പരിശീലന ക്യാംപിന് നേരെ ഹൂതി ആക്രമണം; 53 പേർ കൊല്ലപ്പെട്ടു, 200 പേർക്ക് പരുക്ക്
സന : യെമനിലെ ഷബ്വാ പ്രവിശ്യയിലുള്ള സർക്കാർ സേനയുടെ പരിശീലന ക്യാംപിനു നേരെ ഹൂതികൾ നടത്തിയ ആക്രമണത്തിൽ 53 പേർ കൊല്ലപ്പെട്ടു. 200 പേർക്ക് പരുക്കേറ്റു. എണ്ണ മേഖലയായ ഷബ്വാ പ്രവിശ്യയിലെ അൽ ആലം സൈനിക ക്യാംപിനു നേരെയാണ് ഹൂതികളുടെ ആക്രമണമുണ്ടായത്. തുറമുഖ നഗരമായ മോഖ പിടിച്ചെടുത്തതിനു സമാനമായ സാഹചര്യമാണ് ഷബ്വയിലെന്നാണു റിപ്പോർട്ട്. യെമന്റെ തെക്കൻ തീരപ്രദേശത്ത് ഏദൻ ഉൾക്കടലിനോട് ചേർന്നു കിടക്കുന്ന എണ്ണ-വാതക സമ്പന്നമായ ഷബ്വ പ്രവിശ്യയിലാണ് രാജ്യത്തെ ഏറ്റവും വലിയ വ്യാവസായിക നിക്ഷേപമായ ‘ബൽഹാഫ്’ ദ്രവീകൃത പ്രകൃതിവാതക പ്ലാന്റ് സ്ഥിതി ചെയ്യുന്നത്. ദരിദ്ര രാജ്യമായ യെമനിൽ ആഭ്യന്തര സംഘർഷം വീണ്ടും രൂക്ഷമാകുന്നതിനിടെയാണ് ഈ ആക്രമണം.
പരിശീലനം നടക്കുന്നതിനിടെ സൈനികർക്ക് നേരെ ഹൂതികൾ മൂന്ന് ബാലിസ്റ്റിക് മിസൈലുകൾ തൊടുത്തുവിടുകയായിരുന്നുവെന്ന് പ്രാദേശിക ഭരണകൂട വൃത്തങ്ങൾ പറഞ്ഞു. യെമൻ സർക്കാരിന്റെ നിയന്ത്രണത്തിലുള്ള ഷബ്വയിൽ നിന്ന് ഹൂതി നിയന്ത്രണത്തിലുള്ള അൽ ബെയ്ദയിലേക്കുള്ള റോഡ് തകർത്തു. സംഘർഷം കണക്കിലെടുത്തു ഫ്ലൈദുബായ് അബ്ഹ, ദമാം, റിയാദ് എന്നിവിടങ്ങളിലേക്കുള്ള സർവീസുകൾ 24 വരെ റദ്ദാക്കി. ഖത്തർ എയർവേയ്സും 24 വരെ സർവീസുകൾ റദ്ദാക്കിയിട്ടുണ്ട്.
ഹൂതികൾക്കെതിരായ ആക്രമണത്തിൽ സൗദിയെ സൈനികമായി സഹായിക്കാൻ തയാറാണെന്ന് ഈജിപ്ത് അറിയിച്ചു. ഇതിനായി സൈന്യത്തെ ചുമതലപ്പെടുത്താൻ അടിയന്തര പാർലമെന്റ് സമ്മേളനം വിളിച്ചുചേർക്കണമെന്ന് പ്രസിഡന്റ് അബ്ദുൽ ഫത്താ അൽ സിസി അഭ്യർഥിച്ചു. ചെങ്കടലിലെ സുരക്ഷാപ്രശ്നത്തിൽ സഹായംതേടി സൗദി കിരീടാവകാശി മുഹമ്മദ് ബിൻ സൽമാൻ ഈജിപ്തിലെത്തി പ്രസിഡന്റ് സിസിയുമായി കഴിഞ്ഞമാസം ചർച്ച നടത്തിയിരുന്നു. ഇതിനിടെ, ഹോർമുസ് കടലിടുക്കിൽ മൈനിൽ തട്ടി എണ്ണക്കപ്പൽ പൊട്ടിത്തെറിച്ചതായി ഇറാൻ നാവികസേന വെളിപ്പെടുത്തി.
ഹൂതികളുടെ നിയന്ത്രണത്തിലുള്ള പ്രദേശങ്ങൾ തിരിച്ചുപിടിക്കുന്നതിന് സർക്കാർ സൈന്യം ഈ മാസം പ്രത്യേക സൈനിക നീക്കം ആരംഭിക്കുകയും കടലിടുക്കിന് സമീപമുള്ള പ്രദേശങ്ങളിൽ സ്വാധീനം വീണ്ടെടുക്കുകയും ചെയ്തിരുന്നു. ഇതിനിടയിലാണ് യെമന്റെ തെക്കൻ മലനിരകളിൽ ഹൂതി വിരുദ്ധ സഖ്യത്തിന്റെ പ്രധാന നഗരകേന്ദ്രമായ തായിസ് ഹൂതികൾ വളഞ്ഞിരിക്കുന്നത്. ചെങ്കടലിന്റെ കവാടത്തിലെ തന്ത്രപ്രധാനമായ കപ്പൽപ്പാതയായ ബാബ് അൽ മന്ദബ് കടലിടുക്കിന് സമീപമുള്ള പ്രദേശങ്ങളിലേക്ക് സെപ്റ്റംബറിൽ ഹൂതികൾ മുന്നേറ്റം നടത്തിയിരുന്നു. 2014-ൽ ഹൂതി വിമതർ തലസ്ഥാനമായ സന പിടിച്ചടക്കുകയും ഭരണകൂടത്തെ തെക്കൻ ഭാഗത്തേക്ക് തുരത്തുകയും ചെയ്തതോടെയാണ് യെമനിൽ ആഭ്യന്തരയുദ്ധം പൊട്ടിപ്പുറപ്പെട്ടത്.
