ആർ & ഡി രംഗത്തെ സർക്കാർ ചെലവഴിക്കലിന്റെ കാര്യത്തിൽ മാൾട്ട ഏറ്റവും പിന്നിൽ : യൂറോസ്‌റ്റാറ്റ് റിപ്പോർട്ട്

ഗവേഷണ-വികസന രംഗത്തെ (R&D) സർക്കാർ ചെലവഴിക്കലിന്റെ കാര്യത്തിൽ മാൾട്ട യൂറോപ്യൻ യൂണിയൻ (EU) രാജ്യങ്ങളിൽ താഴെ നിന്ന് മൂന്നാം സ്ഥാനത്തെത്തിയതായി യൂറോപ്പിന്റെ സ്ഥിതിവിവരക്കണക്ക് ഏജൻസിയായ ‘യൂറോസ്‌റ്റാറ്റ്’ (Eurostat) പുറത്തുവിട്ട കണക്കുകൾ വ്യക്തമാക്കുന്നു.

2025-ൽ മാൾട്ട ഒരു വ്യക്തിക്ക് ഗവേഷണ-വികസനത്തിനായി മാറ്റിവെച്ചത് വെറും 73.70 യൂറോ മാത്രമാണ്. ഹംഗറിയും (57.40 യൂറോ), റൊമാനിയയും (18.80 യൂറോ) മാത്രമാണ് മാൾട്ടയ്ക്ക് പിന്നിലുള്ളത്. യൂറോപ്യൻ യൂണിയന്റെ ശരാശരി ചെലവഴിക്കലായ 288.90 യൂറോയേക്കാൾ വളരെ താഴെയാണിത്. പ്രതിശീർഷ ചെലവഴിക്കലിൽ ലക്സംബർഗ് (917.20 യൂറോ) ഒന്നാമതെത്തിയപ്പോൾ ഡെൻമാർക്ക്, ജർമ്മനി എന്നീ രാജ്യങ്ങളാണ് തൊട്ടുപിന്നിൽ.

2025-ൽ യൂറോപ്യൻ യൂണിയനിൽ ആകെ സർക്കാർ ഗവേഷണ-വികസന ബജറ്റ് വിഹിതം 1,30,200 ദശലക്ഷം യൂറോയായി ഉയർന്നതായി കണക്കാക്കപ്പെടുന്നു. ഇത് മൊത്ത ആഭ്യന്തര ഉൽപ്പാദനത്തിന്റെ (GDP) 0.69% ആണ്. 2024-നെ അപേക്ഷിച്ച് 2.4 ശതമാനത്തിന്റെയും, 2015-നെ അപേക്ഷിച്ച് 60.5 ശതമാനത്തിന്റെയും വർധനവാണിത്.

യൂറോപ്യൻ യൂണിയനിൽ പ്രതിശീർഷ ഗവേഷണ വിഹിതം 2015-ലെ 183.20 യൂറോയിൽ നിന്ന് 57.7% വർധിച്ച് 2025-ൽ 288.90 യൂറോയിലെത്തി. എന്നാൽ ഈ കാലയളവിൽ തിരിച്ചടി നേരിട്ട ഏക രാജ്യം റൊമാനിയയാണ്; അവിടെ വിഹിതം 9.6% കുറഞ്ഞ് 20.80 യൂറോയിൽ നിന്ന് 18.80 യൂറോയായി. അതേസമയം, ബൾഗേറിയ 495.5% വർധനവോടെ വലിയ മുന്നേറ്റം രേഖപ്പെടുത്തി (15.50 യൂറോയിൽ നിന്ന് 92.30 യൂറോയിലേക്ക്).

യൂറോപ്യൻ യൂണിയന്റെ മൊത്തം ഗവേഷണ ഫണ്ടിന്റെ മൂന്നിലൊന്നിൽ അധികം (37.3%) പബ്ലിക് യൂണിവേഴ്സിറ്റി ഫണ്ടുകൾ വഴി പൊതു വിജ്ഞാന പുരോഗതിക്കായി ചെലവഴിച്ചപ്പോൾ, 18.4% മറ്റ് സ്രോതസ്സുകളിൽ നിന്നുള്ള വിജ്ഞാന പുരോഗതിക്കും, 9.5% വ്യാവസായിക ഉൽപ്പാദനത്തിനും സാങ്കേതികവിദ്യയ്ക്കും, 6.7% ആരോഗ്യ മേഖലയ്ക്കും, 5.8% പ്രതിരോധ മേഖലയ്ക്കുമാണ് വിനിയോഗിച്ചത്. ഡെൻമാർക്ക്, ബൾഗേറിയ, മാൾട്ട, പോളണ്ട് എന്നീ രാജ്യങ്ങളുടെ വിവരങ്ങൾ 2026 ഡിസംബറിൽ പുതുക്കും.

‘കേവലം അക്കങ്ങളല്ല, രാഷ്ട്രീയ നിലപാടിന്റെ ഫലം’: പി.എൻ (PN)

പുറത്തുവന്ന വിവരങ്ങളിൽ സർക്കാരിനെതിരെ രൂക്ഷവിമർശനവുമായി പ്രതിപക്ഷ പാർട്ടിയായ പി.എൻ (PN) രംഗത്തെത്തി. “ഇവ കേവലം അക്കങ്ങളല്ല, മറിച്ച് നിലവിലെ സർക്കാരിന്റെ രാഷ്ട്രീയ നിലപാടിന്റെ ഫലമാണ്,” എന്ന് പി.എൻ ആരോപിച്ചു.

ജി.ഡി.പി (GDP) വിഹിതമായി കണക്കാക്കുമ്പോൾ, ഗവേഷണ-വികസനത്തിനായുള്ള സർക്കാർ വിഹിതം 2015-ലെ 0.24 ശതമാനത്തിൽ നിന്ന് 2025-ൽ 0.17 ശതമാനമായി കുറഞ്ഞു. ഇത് മാൾട്ടയെ യൂറോപ്പിൽ തന്നെ ഏറ്റവും കുറഞ്ഞ നിരക്കിലെത്തിച്ചു. മറ്റ് രാജ്യങ്ങൾ സുസ്ഥിര സമ്പദ്‌വ്യവസ്ഥ കെട്ടിപ്പടുക്കാൻ ഗവേഷണത്തിൽ നിക്ഷേപം വർദ്ധിപ്പിക്കുമ്പോൾ മാൾട്ട ഇതിൽ പരാജയപ്പെടുകയാണെന്ന് പാർട്ടി ചൂണ്ടിക്കാട്ടി.

ഗവേഷണത്തിലും നവീകരണത്തിലും നിക്ഷേപം നടത്തുന്നതിൽ പരാജയപ്പെടുന്ന സർക്കാർ രാജ്യത്തെ ഗവേഷകർ, വിദ്യാർത്ഥികൾ, ബിസിനസുകൾ എന്നിവരുടെ അവസരങ്ങളെ പരിമിതപ്പെടുത്തുകയും രാജ്യത്തിന്റെ ഭാവിയെ ദുർബലപ്പെടുത്തുകയും ചെയ്യുന്നു. ഈ മേഖലയിലെ വിഹിതം യൂറോപ്പിൽ ഏറ്റവും കുറഞ്ഞ നിലയിൽ നിൽക്കുമ്പോൾ ‘മാൾട്ട വിഷൻ 2050’ പദ്ധതിയെ ഗൗരവമായി കാണാനാകില്ലെന്നും, ദീർഘകാല കാഴ്ചപ്പാടുകൾ വെറും മുദ്രാവാക്യങ്ങളിലല്ല മറിച്ച് കൃത്യമായ സാമ്പത്തിക വിഹിതത്തിലാണ് അധിഷ്ഠിതമാകേണ്ടതെന്നും പി.എൻ വ്യക്തമാക്കി.

യൂണിവേഴ്‌സിറ്റി ഓഫ് മാൾട്ടയിലും മറ്റ് വിദ്യാഭ്യാസ സ്ഥാപനങ്ങളിലും ഗവേഷണം ശക്തിപ്പെടുത്തുന്നതിനും, സ്വകാര്യ മേഖലയിലെ നിക്ഷേപം പ്രോത്സാഹിപ്പിക്കുന്നതിനും, നവീകരണത്തിലൂടെ മികച്ച ജോലിസാധ്യതകൾ സൃഷ്ടിക്കുന്നതിനും കൃത്യമായ ലക്ഷ്യങ്ങളും ആവശ്യത്തിന് ഫണ്ടുമുള്ള വ്യക്തമായ പദ്ധതി തയ്യാറാക്കണമെന്ന് പി.എൻ ആവശ്യപ്പെട്ടു.