ചന്ദ്രനില് നിന്നുള്ള 12,000 അപൂര്വ്വ ചിത്രങ്ങള് പുറത്തുവിട്ട് നാസ
വാഷിങ്ടണ് ഡിസി : “ഭൂമിയില് നിന്നു ചന്ദ്രനെ കാണുന്നതു പോലെയാണോ ചന്ദ്രനില് നിന്നു ഭൂമി കാണുക?” കാലപ്പഴക്കമുള്ള ഈ ചോദ്യത്തിന് ഉത്തരം നല്കുകയാണ് നാസ. ചാന്ദ്ര ദൗത്യമായ ആര്ട്ടെമിസിന്റെ ഭാഗമായി പകര്ത്തിയ ചിത്രങ്ങളാണ് പങ്കുവെച്ചിരിക്കുന്നത്.
കഴിഞ്ഞ ഏപ്രിലില് ആര്ട്ടെമിസ് 2 ദൗത്യത്തിന്റെ ഭാഗമായി സഞ്ചാരികള് പകര്ത്തിയ 12,000 ചിത്രങ്ങള് നാസ പുറത്തുവിട്ടിട്ടുണ്ട്. പത്തുദിവസം നീണ്ട ദൗത്യത്തില് ചന്ദ്രനെ ചുറ്റുന്നതിനിടെ പകര്ത്തിയ ചിത്രങ്ങളാണ് ഗേറ്റ് വേ റ്റു ആസ്ട്രനോട്ട് ഫോട്ടോഗ്രഫി എന്ന വെബ്സൈറ്റില് ലഭ്യമാക്കിയിരിക്കുന്നത്.
ഇതുവരെ ലോകം കണ്ടിട്ടില്ലാത്ത ഭൂമിയുടെയും ചന്ദ്രന്റെയും ചിത്രങ്ങളാണ് ഇതിലുള്പ്പെട്ടിട്ടുള്ളത്. ചന്ദ്രനില്നിന്നുള്ള ഭൂമിയുടെ ചിത്രങ്ങളും ബഹിരാകാശത്തെ മനേഹര കാഴ്ചകളും ചന്ദ്രന്റെ ഏറ്റവും അടുത്തുനിന്നുള്ള ചിത്രങ്ങളും വെബ്സൈറ്റില് കാണാനാകും.
ഈ ചിത്രങ്ങള് ആരു പകര്ത്തിയെന്നോ മറ്റു വിശദാംശങ്ങളോ നല്കിയിട്ടില്ല. ഇന്റഗ്രിറ്റി എന്നു വിളിക്കുന്ന ഓറിയോണ് ബഹിരാകാശ പേടകത്തിന്റെ ഉള്ഭാഗങ്ങളും ചിത്രത്തില് കാണാം.
രണ്ട് നിക്കോണ് ഡി5 ക്യാമറകളും ഒരു നിക്കോണ് സീ9 ക്യാമറയും വ്യത്യസ്തങ്ങളായ സൂം, വൈഡ് ആംഗിള് ലെന്സുകളുമാണ് ചിത്രങ്ങള് എടുക്കാനായി സജീകരിച്ചിരുന്നത്. ഐഫോണും ഗോപ്രോ ആക്ഷന് ക്യാമറകളും ഉപയോഗിച്ചിരുന്നതായി നാസ അറിയിച്ചിരുന്നു.
