എറ്റ്ന അഗ്നിപർവതത്തിൽ ശക്തമായ പൊട്ടിത്തെറി; സിസിലിയിൽ വ്യോമഗതാഗതം തടസ്സപ്പെട്ടു

കിഴക്കൻ സിസിലിക്ക് മുകളിൽ വൻ ചാരമേഘ പടലങ്ങൾ സൃഷ്ടിച്ചുകൊണ്ട് എറ്റ്ന അഗ്നിപർവ്വതം വീണ്ടും ശക്തമായി സ്ഫോടന ഘട്ടത്തിലേക്ക് കടന്നു. ശനിയാഴ്ചയാണ് അഗ്നിപർവ്വതത്തിൽ നിന്ന് വലിയ തോതിൽ ലാവയും ചാരവും പുറത്തേക്ക് ഒഴുകാൻ തുടങ്ങിയത്.

ഓഗസ്റ്റ് 6 വ്യാഴാഴ്ച വൈകുന്നേരത്തോടെയാണ് നിലവിലെ അഗ്നിപർവ്വത പ്രവർത്തനങ്ങൾ തീവ്രമായത്. രാത്രിയോടെ ഇത് ശക്തമായ ലാവ പ്രവാഹമായി മാറി. ശനിയാഴ്ചയായപ്പോഴേക്കും അഗ്നിപർവ്വത സ്ഫോടനം അതിന്റെ ഏറ്റവും ഉയർന്ന ഘട്ടത്തിലേക്ക് എത്തുകയായിരുന്നു. ലാവയും വൻ സ്ഫോടനങ്ങളും അതിശക്തമായ ചാര ഉദ്‌ഗിരണവും അടങ്ങുന്നതാണ് ഈ ഘട്ടം.

തെക്കുകിഴക്കൻ ദിശയിലേക്ക് നീങ്ങിയ ചാരമേഘങ്ങൾ കാരണം സിസിലിയൻ നഗരങ്ങളായ റാഗൽന, അദ്രാനോ എന്നിവിടങ്ങളിൽ വലിയ തോതിൽ ചാരവർഷം റിപ്പോർട്ട് ചെയ്തിട്ടുണ്ട്.

അഗ്നിപർവ്വത ചാരം ഉയർന്നതിനെ തുടർന്ന് അധികൃതർ വിമാന സർവീസുകൾക്ക് റെഡ് അലേർട്ട് പ്രഖ്യാപിക്കുകയും കറ്റാനിയ ബെല്ലിനി വിമാനത്താവളത്തിന്റെ പ്രവർത്തനം തടസ്സപ്പെടുകയും ചെയ്തു. ശനിയാഴ്ച രാവിലെ എത്തിയ വിമാനങ്ങളുടെ സർവീസ് നിർത്തിവച്ചു. അന്തരീക്ഷത്തിൽ ഉയർന്ന അളവിൽ ചാരം ഉള്ളതിനാൽ ഉച്ചവരെ വിമാനങ്ങൾ ഇറങ്ങുന്നത് തടഞ്ഞിട്ടുണ്ടെന്ന് വിമാനത്താവള അധികൃതർ ആദ്യഘട്ടത്തിൽ അറിയിച്ചു.

മാൾട്ടയിൽ നിന്ന് കറ്റാനിയയിലേക്കുള്ള രണ്ട് വിമാന സർവീസുകളെയെങ്കിലും ഈ തടസ്സം ബാധിച്ചിട്ടുണ്ട്. രാവിലെ 6:45-ന്റെ കെ.എം മാൾട്ട എയർലൈൻസ് വിമാനം റദ്ദാക്കുകയും 7:50-ന്റെ റയാൻഎയർ വിമാനം പാ ലെർമോയിലേക്ക് തിരിച്ചുവിടുകയും ചെയ്തു. വിമാനത്താവളത്തിലേക്ക് പുറപ്പെടുന്നതിന് മുൻപ് സർവീസ് വിവരങ്ങൾ ബന്ധപ്പെട്ട എയർലൈനുകളുമായി സ്ഥിരീകരിക്കാൻ യാത്രക്കാർക്ക് നിർദ്ദേശം നൽകിയിട്ടുണ്ട്. അതേസമയം ഇവിടെ നിന്നുള്ള വിമാന പുറപ്പെടലുകൾ സാധാരണ നിലയിൽ തുടർന്നു.