ജൂണിൽ പത്തുലക്ഷത്തിലധികം യാത്രക്കാരെന്ന റെക്കോർഡ് നേട്ടവുമായി എംഐഎ
ജൂണിൽ പത്തുലക്ഷത്തിലധികം യാത്രക്കാരുമായി മാൾട്ട അന്താരാഷ്ട്ര വിമാനത്താവളം. കഴിഞ്ഞ വർഷം ഇതേ കാലയളവിനെ അപേക്ഷിച്ച് 16.9% വർദ്ധനവോടെ, ജൂൺ മാസത്തിൽ 1,079,703 യാത്രക്കാരാണ് മാൾട്ട അന്താരാഷ്ട്ര വിമാനത്താവളം (MIA) വഴി യാത്ര ചെയ്തത്ത്തെന്ന് എംഐഎ വെള്ളിയാഴ്ച പുറത്തിറക്കിയ പ്രസ്താവനയിൽ അറിയിച്ചു.
ജൂണിലും ഏറ്റവും കൂടുതൽ യാത്രക്കാരെത്തിയ വിപണിയായി യുണൈറ്റഡ് കിംഗ്ഡം (യുകെ) തുടരുന്നു. 21.2% വിപണി വിഹിതവുമായി യുകെ തന്നെയാണ് പട്ടികയിൽ ഒന്നാമത്. യുകെയിലേക്കും അവിടെ നിന്നുമുള്ള യാത്രാ ട്രാഫിക്കിൽ 14.6% വർദ്ധനവുണ്ടായി.
യുകെയ്ക്ക് പിന്നാലെ ഇറ്റലി (8.5% വർദ്ധനവ്), പോളണ്ട് (52.4%), ജർമ്മനി (4.7%), സ്പെയിൻ (15.3%) എന്നീ രാജ്യങ്ങളാണ് തൊട്ടടുത്ത സ്ഥാനങ്ങളിൽ ഉള്ളത്. ഇതിൽ പോളണ്ടിൽ നിന്നുള്ള യാത്രക്കാരുടെ എണ്ണത്തിലാണ് ഏറ്റവും ഉയർന്ന വർദ്ധനവ് രേഖപ്പെടുത്തിയത്.
കൂടുതൽ സർവീസുകൾ നടത്തിയതിലൂടെ വിമാനത്താവളത്തിൽ ലഭ്യമായ സീറ്റ് ശേഷി (Available Seat Capacity) 20.6% ആയി വർദ്ധിപ്പിക്കാൻ എം.ഐ.എയ്ക്ക് സാധിച്ചു.
എന്നാൽ, വിമാനങ്ങളിലെ സീറ്റ് ലോഡ് ഫാക്ടർ (സീറ്റുകൾ നിറയുന്ന നിരക്ക്) 2.7 ശതമാനം കുറഞ്ഞ് 84.2% ആയി. കഴിഞ്ഞ വർഷത്തെ അപേക്ഷിച്ച് സീറ്റുകൾ നിറഞ്ഞതിന്റെ അനുപാതത്തിൽ നേരിയ കുറവുണ്ടായെങ്കിലും, വിമാനത്താവളം വഴി യാത്ര ചെയ്ത ആകെ യാത്രക്കാരുടെ എണ്ണത്തിൽ വലിയ വർദ്ധനവാണ് ഉണ്ടായത്.
സ്കാൻഡിനേവിയൻ മേഖലയുമായുള്ള വ്യോമബന്ധം ശക്തിപ്പെടുത്തുന്നതിന്റെ ഭാഗമായി, ജൂൺ 3 മുതൽ ഡെൻമാർക്കിലെ ബില്ലുണ്ടിലേക്കുള്ള പുതിയ സർവീസ് എം.ഐ.എ ആരംഭിച്ചു.
കൂടാതെ, ജൂൺ 8-ന് അമേരിക്കയിലെ ന്യൂയോർക്കിലെ ജോൺ എഫ്. കെന്നഡി (JFK) അന്താരാഷ്ട്ര വിമാനത്താവളത്തിൽ നിന്നുള്ള ഡെൽറ്റ എയർ ലൈൻസ് നടത്തുന്ന ചരിത്രത്തിലെ ആദ്യത്തെ വിമാനത്തെയും മാൾട്ട വിമാനത്താവളം വരവേറ്റതായി അധികൃതർ കൂട്ടിച്ചേർത്തു.
