പടക്ക നിർമാണശാല സ്ഫോടനം; അടിയന്തര മുൻകരുതൽ നടപടികളുമായി എഫ്എസ്എസ്എ

പടക്ക നിർമാണശാല സ്ഫോടനത്തെ തുടർന്ന് അടിയന്തര മുൻകരുതൽ നടപടികളുമായി ഭക്ഷ്യസുരക്ഷാ അതോറിറ്റി. ചൊവ്വാഴ്ച പുലർച്ചെയുണ്ടായ പടക്ക നിർമാണശാലയിലെ സ്ഫോടനത്തെ തുടർന്ന്, ഫുഡ് സേഫ്റ്റി ആൻഡ് സെക്യൂരിറ്റി അതോറിറ്റി (FSSA) അടിയന്തര മുൻകരുതൽ നടപടികൾ ആരംഭിച്ചതായി അറിയിച്ചു.

സംഭവം നടന്ന ഉടൻ തന്നെ പ്രതികരണ സംവിധാനങ്ങൾ സജീവമാക്കിയതായും, സ്ഫോടനത്തെ തുടർന്ന് ഉണ്ടായ അവശിഷ്ടങ്ങൾ, കത്തിയ വസ്തുക്കളുടെ അവശിഷ്ടങ്ങൾ, മറ്റ് മലിനീകരണ വസ്തുക്കൾ എന്നിവ ബാധിത പ്രദേശങ്ങളിലെ ഭക്ഷണം, മൃഗങ്ങൾക്ക് നൽകുന്ന തീറ്റ, കാർഷിക ഉൽപ്പന്നങ്ങൾ എന്നിവയെ ബാധിച്ചിട്ടുണ്ടോ എന്ന് പരിശോധിച്ച് വരികയാണെന്ന് അധികൃതർ പുറത്തിറക്കിയ പ്രസ്താവനയിൽ വ്യക്തമാക്കി. നിലവിൽ പരിശോധനകൾ, സാമ്പിൾ ശേഖരണം, അപകടസാധ്യതാ വിലയിരുത്തലുകൾ എന്നിവ പുരോഗമിക്കുകയാണെന്നും ആവശ്യമെങ്കിൽ തുടരുമെന്നും അതോറിറ്റി അറിയിച്ചു.

ഈ നടപടികൾ ഫുഡ് സേഫ്റ്റി ആൻഡ് സെക്യൂരിറ്റി അതോറിറ്റി നിയമപ്രകാരം നടപ്പാക്കുന്നതാണെന്നും, ഭക്ഷ്യസുരക്ഷയും സുരക്ഷിതത്വവുമായി ബന്ധപ്പെട്ട വിഷയങ്ങളിൽ പൊതുജന ബോധവൽക്കരണവും സുതാര്യതയും ഉറപ്പാക്കുന്നത് അതോറിറ്റിയുടെ ഉത്തരവാദിത്വത്തിന്റെ ഭാഗമാണെന്നും പ്രസ്താവനയിൽ പറയുന്നു.

സാധ്യമായ അപകടസാധ്യതകൾ വേഗത്തിൽ കണ്ടെത്തുകയും അവ നീക്കം ചെയ്യുന്നതിനായി, ബന്ധപ്പെട്ട സർക്കാർ ഏജൻസികൾ, ഭക്ഷ്യ-തീറ്റ ഉൽപാദകർ, കർഷകർ, ഭക്ഷ്യവ്യാപാര സ്ഥാപനങ്ങൾ എന്നിവരുമായി ചേർന്ന് പ്രവർത്തിക്കുകയാണെന്ന് എഫ്എസ്എസ്എ അറിയിച്ചു.

ഈ പ്രവർത്തനങ്ങൾ പൊതുജനാരോഗ്യം സംരക്ഷിക്കുന്നതിനൊപ്പം, സ്ഫോടനത്തിന്റെ പ്രത്യാഘാതങ്ങൾ കൈകാര്യം ചെയ്യാൻ ആവശ്യമായ മാർഗനിർദേശങ്ങളും പിന്തുണയും ഉൽപാദകർക്ക് നൽകുന്നതിനായാണെന്നും അധികൃതർ വ്യക്തമാക്കി. ഭക്ഷണത്തിന്റെയും മൃഗതീറ്റയുടെയും സുരക്ഷയാണ് തങ്ങളുടെ ഏറ്റവും ഉയർന്ന മുൻഗണനയെന്ന് എഫ്എസ്എസ്എ പൊതുജനങ്ങൾക്ക് ഉറപ്പുനൽകി.

“തുടർച്ചയായ നിരീക്ഷണവും ശാസ്ത്രീയ അടിസ്ഥാനത്തിലുള്ള അപകടസാധ്യതാ വിലയിരുത്തലുകളും വഴി, വിപണിയിലെത്തുകയും മാൾട്ടയിലെ കുടുംബങ്ങളിലേക്ക് എത്തുകയും ചെയ്യുന്ന ഭക്ഷ്യവസ്തുക്കൾ ഉപഭോഗത്തിന് സുരക്ഷിതമാണെന്ന് ഉറപ്പാക്കാൻ ആവശ്യമായ എല്ലാ മുൻകരുതലുകളും അതോറിറ്റി സ്വീകരിച്ചുവരുന്നു,” ആവശ്യമായാൽ കൂടുതൽ വിവരങ്ങൾ പിന്നീട് പുറത്തുവിടുമെന്നും എഫ്എസ്എസ്എ അറിയിച്ചു.

തിങ്കളാഴ്ച രാവിലെ ഏകദേശം 6:35-ഓടെ, മഘ്താബ് (Magħtab) പ്രദേശത്തെ ട്രിക്ക് താൽ-കാഘ്ദി (Triq tal-Qagħdi) റോഡിലുള്ള ഒരു പടക്ക നിർമാണശാലയിൽ സ്ഫോടനം ഉണ്ടായി.

സ്ഫോടന ശബ്ദം നിരവധി കിലോമീറ്റർ അകലെയുവരെ കേൾക്കപ്പെട്ടതായും, മാൾട്ടയുടെ പല ഭാഗങ്ങളിലുമുള്ള കെട്ടിടങ്ങൾ കുലുങ്ങുകയും ജനൽചില്ലുകൾ തകരുകയും ചെയ്തതായും റിപ്പോർട്ടുകളുണ്ട്.

ഒരു ദൃക്‌സാക്ഷിയുടെ മൊഴിപ്രകാരം, സമീപ പ്രദേശങ്ങളിലെ കെട്ടിടങ്ങൾക്ക് കാര്യമായ നാശനഷ്ടമുണ്ടായി. നിരവധി ജനൽചില്ലുകൾ തകർന്നതോടൊപ്പം, കുറഞ്ഞത് ഒരു കെട്ടിടത്തിലെ മുൻഭാഗത്തെ (façade) നിർമാണ വസ്തുക്കൾ അഴിഞ്ഞുവീണതായും അദ്ദേഹം അറിയിച്ചു.