വീണ്ടും വിസ്മയിപ്പിക്കാൻ ചൈന; കടലിനടിയിലൂടെയുള്ള ലോകത്തിലെ ഏറ്റവും നീളം കൂടിയ അതിവേഗ റെയിൽ പാത 2028ൽ പൂർത്തിയാക്കും
ബെയ്ജിങ് : കിഴക്കൻ ചൈനയിലെ ജിന്റാങ് അന്തർ വാഹിനി അതിവേഗ റെയിൽ തുരങ്കത്തിൽ 104 ഷീൽഡ് കട്ടിങ് ടൂളുകളുടെ പരിശോധനയും മാറ്റിസ്ഥാപിക്കലും പൂർത്തിയാക്കി. ഉയർന്ന ജലസമ്മർദ്ദത്തിൽ 21 ദിവസത്തിനുള്ളിലാണ് നിർമാണ തൊഴിലാളികൾ ജോലികൾ പൂർത്തിയാക്കിയത്. ഷെജാങ് പ്രവിശ്യയിലുള്ള നിങ്ബോ-ഷൗഷാൻ റെയിൽവേയിലെ ഈ പാത കടലിനടിയിലൂടെയുള്ള ലോകത്തിലെ ഏറ്റവും നീളം കൂടിയ അതിവേഗ റെയിൽ പാതയാണിത്.
നിങ്ബോയെയും ഷൗഷാൻ ദ്വീപുകളെയും ബന്ധിപ്പിക്കുന്ന ഈ റെയിൽവേ യാഥാർഥ്യമാകുന്നതോടെ, നിലവിലെ 1.5 – 2 മണിക്കൂർ യാത്രാ സമയം 26 മിനിറ്റായി കുറയും. 16.18 കിലോമീറ്റർ ദൈർഘ്യമുള്ള ജിന്റാങ് തുരങ്കത്തിൽ 11.21 കിലോമീറ്റർ ഷീൽഡ് വിഭാഗമാണ്. ആഴമേറിയ ഭാഗത്ത്, ഏകദേശം സമുദ്ര നിരപ്പിൽ നിന്ന 92 മീറ്റർ താഴെയായ 8.5 ബാർ മർദമാണ് അനുഭവപ്പെടുന്നത്. ഇത് കട്ടറുകൾ മാറ്റി സ്ഥാപിക്കുന്ന ജോലികൾ ദുഷ്കരമാക്കിയിരുന്നു.
ചൈന സ്വന്തമായി വികസിപ്പിച്ചെടുത്ത ഹൈപ്പർ ബോറിക് സംവിധാനമാണ് ഷീൽഡ് കട്ടിങ് ടൂളുകൾ മാറ്റി സ്ഥാപിക്കാൻ ഉപയോഗിച്ചത്. ഇതുവഴി തൊഴിലാളികൾക്ക് എട്ട് മണിക്കൂർ വരെ തുടർച്ചയായി ജോലി ചെയ്യാനാകും. അപകട സാധ്യതയും വിരളമാണെന്നാണ് റിപ്പോർട്ട്. പരമ്പരാഗത രീതികൾ ഉപയോഗിക്കുമ്പോൾ 40 മുതൽ 60 മിനിറ്റ് വരെ മാത്രമേ തൊഴിലാളികൾക്ക് തുടർച്ചയായി ജോലിചെയ്യാനാകുമായിരുന്നുള്ളു. ഇതുവരെ തുരങ്ക നിർമാണത്തിന്റെ 80 ശതമാനം പ്രവർത്തനങ്ങളും പൂർത്തിയായി. 2028ഓടെ യാത്രയ്ക്കായി തുരങ്കം തുറന്നു നൽകുമെന്നാണ് വിവരം.
