ചരിത്രത്തിന്റെ പുതിയ ഏടുകൾ പുറത്ത്; മാൾട്ടയിൽ നൂറുകണക്കിന് പുരാവസ്തുക്കൾ കണ്ടെത്തി

മാൾട്ടയുടെ സമ്പന്നമായ പുരാതന ചരിത്രത്തിലേക്ക് വെളിച്ചം വീശുന്ന നിർണായക കണ്ടെത്തലുകളുമായി മാൾട്ടയിലെ സൂപ്രണ്ടൻസ് ഓഫ് കൾച്ചറൽ ഹെറിറ്റേജിന്റെ (SCH) 2025-ലെ വാർഷിക റിപ്പോർട്ട് പുറത്തിറങ്ങി. രാജ്യത്തുടനീളം നടന്ന നിർമ്മാണ പ്രവർത്തനങ്ങൾക്കിടയിൽ നിരീക്ഷണം നടത്തിയതിലൂടെ 172 പുരാവസ്തു കേന്ദ്രങ്ങളാണ് പുതുതായി കണ്ടെത്തുകയോ പുനർനിർണ്ണയിക്കുകയോ ചെയ്തത്. മാൾട്ടയുടെ ഗ്രാമീണ-നഗര ഭൂപ്രദേശങ്ങളിൽ ഇന്നും ഒളിഞ്ഞിരിക്കുന്ന ചരിത്രശേഖരത്തിന്റെ വ്യാപ്തിയാണ് ഈ കണ്ടെത്തലുകൾ വ്യക്തമാക്കുന്നത്.

റാബത്തിലെ പുരാതന തെളിവുകൾ : റാബത്തിലെ ഗോർജ് ബോർഗ് ഒലിവിയർ തെരുവിൽ നടത്തിയ ഖനനത്തിൽ ഹെല്ലനിസ്റ്റിക് കാലഘട്ടത്തിലേതെന്ന് കരുതപ്പെടുന്ന ആയിരക്കണക്കിന് മൺപാത്ര കഷണങ്ങളും വിളക്കുകളും കണ്ടെത്തി. ഇത് അവിടെയുണ്ടായിരുന്ന ഒരു പുരാതന ആരാധനാലയത്തിന്റെ അവശിഷ്ടമാകാനാണ് സാധ്യത. ഇതിനുപുറമെ, റോമൻ-പ്യൂണിക് കാലഘട്ടത്തിലെ വാസസ്ഥലങ്ങളുടെയും തെളിവുകൾ അവിടെനിന്ന് ലഭിച്ചു.

റോമൻ കാലഘട്ടത്തിലെ കാർഷിക ജീവിതം : ബിഡ്നിജയിൽ നിന്ന് റോമൻ കാലഘട്ടത്തിലെ ഒരു വലിയ വില്ലയുടെ അവശിഷ്ടങ്ങളും ചുവർ ചിത്രങ്ങളുടെ ഭാഗങ്ങളും കണ്ടെത്തി. മാർഷക്ലോക്കിൽ ഒലിവ് സംസ്കരണത്തിന്റെ അവശിഷ്ടങ്ങളും, ബൽസാനിൽ കൃഷി ആവശ്യങ്ങൾക്കായി ഉപയോഗിച്ചിരുന്ന വലിയ പാത്രങ്ങളും (Dolium) കണ്ടെത്തിയിട്ടുണ്ട്.

പുരാതന ശ്മശാനങ്ങളും ആരോഗ്യസ്ഥിതിയും : അറ്റാർഡിൽ നിന്ന് ലഭിച്ച 25-നും 31-നും ഇടയിൽ പ്രായമുള്ള ഒരു സ്ത്രീയുടെ അസ്ഥികൂടം ഗവേഷകർക്ക് പുതിയ അറിവുകൾ നൽകി. ഇവർ ഉപയോഗിച്ചിരുന്ന ആനക്കൊമ്പ് കൊണ്ടുള്ള മാലകൾ അവർ ഉയർന്ന സാമൂഹിക പദവിയിലുള്ളവരായിരുന്നു എന്ന് സൂചിപ്പിക്കുന്നു. കൂടാതെ, ഇവരുടെ പല്ലുകളിൽ കണ്ട അണുബാധകൾ അക്കാലത്തെ ജനങ്ങളുടെ ആരോഗ്യനിലയെക്കുറിച്ച് വ്യക്തമായ ധാരണ നൽകുന്നു. പാവോലയിൽ നിന്ന് ലഭിച്ച ശവകുടീരങ്ങളിൽ മൃഗങ്ങളുടെ അസ്ഥികൾ കണ്ടെത്തിയത്, അന്നത്തെ ആചാരപരമായ ചടങ്ങുകളിലേക്കാണ് വിരൽ ചൂണ്ടുന്നത്.

സമുദ്ര-നഗര പൈതൃകം : മാർസാസ്കാലയിൽ നടത്തിയ സമുദ്രഗവേഷണത്തിൽ നാലാം നൂറ്റാണ്ട് മുതൽ ആറാം നൂറ്റാണ്ട് വരെയുള്ള കാലഘട്ടത്തിലെ പാത്രങ്ങളും മീൻപിടുത്ത ഉപകരണങ്ങളും കണ്ടെത്തി. കൂടാതെ, സ്ലീമയിലെ ഒരു പഴയ കെട്ടിടത്തിൽ നിന്ന് നിയോക്ലാസിക്കൽ ശൈലിയിലുള്ള തൂണുകളും ശിൽപങ്ങളും കണ്ടെത്തിയത് നഗരത്തിന്റെ വാസ്തുവിദ്യാ പൈതൃകത്തിന് തെളിവായി.

സംരക്ഷണ പ്രവർത്തനങ്ങൾ

പുതിയ നിർമ്മാണ പദ്ധതികൾക്കിടയിലും പുരാവസ്തുക്കൾക്ക് കോട്ടം തട്ടാതിരിക്കാൻ എസ്.സി.എച്ച് അതീവ ശ്രദ്ധയാണ് പുലർത്തുന്നത്. ഖൗറയിൽ കണ്ടെത്തിയ കല്ലറകളും ക്വാറിയും സംരക്ഷിക്കാനായി ഡെവലപ്പർമാരുമായി ചർച്ചകൾ നടക്കുന്നുണ്ട്. അതുപോലെ, മാർസാസ്കാലയിലെ സമുദ്ര അവശിഷ്ടങ്ങൾ സംരക്ഷിക്കാൻ ഡ്രഡ്ജിംഗ് (മണ്ണെടുപ്പ്) പരിധിയിൽ മാറ്റങ്ങൾ വരുത്തി.

മാൾട്ടയുടെ ഭൂമിക്ക് താഴെ ഇപ്പോഴും വലിയൊരു ചരിത്രം ഒളിഞ്ഞിരിപ്പുണ്ടെന്നും, അത് സംരക്ഷിക്കേണ്ടത് അനിവാര്യമാണെന്നും റിപ്പോർട്ട് അടിവരയിടുന്നു.