സെന്റ് ജൂലിയൻസിൽ കൊല്ലപ്പെട്ട മൊറോക്കൻ യുവാവിന്റെ മൃതദേഹം നാട്ടിലെത്തിച്ച് സംസ്കരിക്കും
സെന്റ് ജൂലിയൻസിൽ ഞായറാഴ്ച പുലർച്ചെയുണ്ടായ സംഘർഷത്തിൽ തലയ്ക്ക് അടിയേറ്റ് കൊല്ലപ്പെട്ട 31-കാരനായ അബ്ദുല്ലത്തീഫ് ഒമഖ്ലൂഫിന്റെ മൃതദേഹം സംസ്കാരത്തിനായി മൊറോക്കോയിലേക്ക് കൊണ്ടുപോകാനുള്ള നടപടികൾ ആരംഭിച്ചു. മകന്റെ മൃതദേഹം സ്വന്തം നാട്ടിൽ സംസ്കരിക്കണമെന്ന മാതാപിതാക്കളുടെ ആഗ്രഹപ്രകാരമാണ് നടപടിയെന്ന് മൊറോക്കൻ കമ്മ്യൂണിറ്റി പ്രസിഡന്റ് ദുനിയ ബോർഗ് ലകേഹാൽ അറിയിച്ചു.
ചൊവ്വാഴ്ച രാവിലെ മാൾട്ടയിലെ അധികൃതർ മൃതദേഹം വിട്ടുകൊടുത്തതോടെയാണ് നടപടികൾ വേഗത്തിലായത്. മാൾട്ടയിൽ മൊറോക്കോയ്ക്ക് എംബസിയില്ലാത്തതിനാൽ റോമിലെ മൊറോക്കൻ എംബസി മുഖേനയാണ് മൃതദേഹം കൊണ്ടുപോകുന്നതിനുള്ള രേഖകൾ ശരിയാക്കുന്നത്.
ഒരു വർഷവും ഒരു മാസവുമായി മാൾട്ടയിലെ നിർമ്മാണക്കമ്പനിയിൽ ജോലി ചെയ്തുവരികയായിരുന്ന അബ്ദുല്ലത്തീഫ്, ഇളയ സഹോദരൻ അടങ്ങുന്ന കുടുംബത്തെ സഹായിക്കാനാണ് മാൾട്ടയിലെത്തിയത്. സൗമ്യനായ യുവാവായിരുന്നു ഇയാളെന്ന് സുഹൃത്തുക്കൾ ഓർമ്മിക്കുന്നു. എന്നാൽ മരണത്തിലേക്ക് നയിച്ച തർക്കത്തിന്റെ കാരണം എന്താണെന്ന് ഇപ്പോഴും വ്യക്തമായിട്ടില്ല.
സ്പിനോള ഗാർഡനിൽ ഞായറാഴ്ച പുലർച്ചെ 6.30-നാണ് അബ്ദുല്ലത്തീഫിനെ പരിക്കേറ്റ നിലയിൽ കണ്ടെത്തിയത്. തുടർന്ന് നടത്തിയ പരിശോധനയിൽ ഇയാൾ മരിച്ചതായി സ്ഥിരീകരിച്ചു. സിസിടിവി ദൃശ്യങ്ങളും സാക്ഷിമൊഴികളും കേന്ദ്രീകരിച്ച് നടത്തിയ അന്വേഷണത്തിലാണ് അക്രമിയെക്കുറിച്ചുള്ള സൂചന പോലീസിന് ലഭിച്ചത്.
സംഭവവുമായി ബന്ധപ്പെട്ട് സെബാസ്റ്റ്യൻ മാലിനോവ്സ്കി എന്ന 27-കാരനായ പോളിഷ് വിനോദസഞ്ചാരിയെ പോലീസ് അറസ്റ്റ് ചെയ്തു. കൊലപാതകം, മാരകമായി പരിക്കേൽപ്പിക്കൽ എന്നീ കുറ്റങ്ങളാണ് ഇയാൾക്കെതിരെ ചുമത്തിയിരിക്കുന്നത്. തിങ്കളാഴ്ച കോടതിയിൽ ഹാജരാക്കിയ പ്രതി കുറ്റം നിഷേധിച്ചു. ഇയാളെ നിലവിൽ ജുഡീഷ്യൽ കസ്റ്റഡിയിൽ വിട്ടിരിക്കുകയാണ്.
