വടക്കേ അമേരിക്കയിൽ കനത്ത ശൈത്യം; ഭാഗികമായി തണുത്തുറഞ്ഞ് നയാഗ്ര വെള്ളച്ചാട്ടം

ടൊറന്റോ : വടക്കേ അമേരിക്കയിൽ തുടരുന്ന കനത്ത ശൈത്യത്തിൽ ലോകപ്രശസ്തമായ നയാഗ്ര വെള്ളച്ചാട്ടം ഭാഗികമായി തണുത്തുറഞ്ഞു. കഴിഞ്ഞ ഏതാനും ദിവസങ്ങളായി മേഖലയിൽ അനുഭവപ്പെടുന്ന അതിശൈത്യമാണ് വെള്ളച്ചാട്ടത്തെ മഞ്ഞുപാളികൾക്കുള്ളിലാക്കിയത്.

വെള്ളച്ചാട്ടത്തിന് ചുറ്റുമുള്ള പാറക്കൂട്ടങ്ങളും മരങ്ങളും പൂർണ്ണമായും മഞ്ഞിൽ പൊതിഞ്ഞ നിലയിലാണ്. മേഖലയിൽ താപനില മൈനസ് 20 ഡിഗ്രി സെൽഷ്യസിനും താഴേക്ക് പതിച്ചതോടെയാണ് ഈ അപൂർവ്വ പ്രതിഭാസം ദൃശ്യമായത്. ശക്തമായ ശീതക്കാറ്റും മഞ്ഞുവീഴ്ചയും കാരണം വെള്ളച്ചാട്ടത്തിൽ നിന്നുള്ള ജലകണങ്ങൾ അന്തരീക്ഷത്തിൽ വെച്ച് തന്നെ ഐസ് കട്ടകളായി മാറുകയാണ്.

സെക്കൻഡിൽ ലക്ഷക്കണക്കിന് ലിറ്റർ വെള്ളം ഒഴുകുന്നതിനാൽ വെള്ളച്ചാട്ടം പൂർണ്ണമായും നിശ്ചലമാകില്ലെങ്കിലും, ഉപരിതലത്തിൽ കട്ടിയുള്ള മഞ്ഞുപാളികൾ രൂപപ്പെട്ടത് വെള്ളച്ചാട്ടം നിശ്ചലമായ പ്രതീതിയാണ് ജനിപ്പിക്കുന്നത്. അമേരിക്കൻ ഭാഗത്തെ വെള്ളച്ചാട്ടത്തിലാണ് കൂടുതൽ മഞ്ഞുപാളികൾ രൂപപ്പെട്ടിരിക്കുന്നത്.

വെള്ളച്ചാട്ടത്തിന് താഴെ കട്ടിയുള്ള ഐസ് പാളികൾ രൂപപ്പെട്ട് ‘ഐസ് ബ്രിഡ്ജ്’ എന്നറിയപ്പെടുന്ന പ്രതിഭാസവും ദൃശ്യമാണ്. ഇത് കാണാനായി കനത്ത തണുപ്പിനെ അവഗണിച്ചും നിരവധി സഞ്ചാരികളാണ് യുഎസ്-കാനഡ അതിർത്തിയിലേക്ക് എത്തുന്നത്.

നേരത്തെ 1848-ലാണ് നയാഗ്ര വെള്ളച്ചാട്ടം പൂർണ്ണമായും തണുത്തുറഞ്ഞതായി രേഖപ്പെടുത്തിയിട്ടുള്ളത്. ഇത്തവണത്തെ അതിശൈത്യം വരും ദിവസങ്ങളിലും തുടരുമെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്. സഞ്ചാരികൾക്ക് കർശന സുരക്ഷാ നിർദ്ദേശങ്ങൾ അധികൃതർ നൽകിയിട്ടുണ്ട്.