താരിഫ് യുദ്ധം; പ്രതിസന്ധി മറികടക്കാൻ ഇന്ത്യയിൽ നിന്നുള്ള കയറ്റുമതി വർധിപ്പിക്കും : നത്തിങ് ഫോൺ
ലണ്ടൻ : വർദ്ധിച്ചുവരുന്ന ആഗോള വ്യാപാര അനിശ്ചിതത്വത്തിനും താരിഫ് വെല്ലുവിളികൾക്കും ഇടയിൽ, ലണ്ടൻ ആസ്ഥാനമായുള്ള കൺസ്യൂമർ ഇലക്ട്രോണിക്സ് കമ്പനിയായ നത്തിങ് ഇന്ത്യയിൽ നിന്നുള്ള കയറ്റുമതി വർദ്ധിപ്പിക്കുമെന്ന് സിഇഒ കാൾ പേ പറഞ്ഞു. അന്താരാഷ്ട്ര വ്യാപാര നയങ്ങൾ മാറുന്നതിലൂടെ ഉണ്ടാകുന്ന അപകടസാധ്യതകൾ കുറയ്ക്കുന്നതിന് ഇന്ത്യയിൽ നിന്ന് കൂടുതൽ കയറ്റുമതി ചെയ്യാനുള്ള ഓപ്ഷൻ കമ്പനി പരിശോധിക്കുന്നുണ്ടെന്ന് എക്സ് സോഷ്യൽ മീഡിയ പ്ലാറ്റ്‌ഫോമിലെ അടുത്തിടെ നടന്ന എഎംഎ (ആസ്ക് മി എനിതിംഗ്) സെഷനിൽ നത്തിംഗ് സിഇഒ പറഞ്ഞു.
എല്ലാ ദിവസവും കാര്യങ്ങൾ മാറികൊണ്ടിരിക്കുകയാണെന്നും ഈ പ്രതിസന്ധിയെ മറികടക്കാൻ നത്തിങ് ആസൂത്രണം ചെയ്യുന്നത് ഇന്ത്യയിൽ നിന്ന് കയറ്റുമതി വർധിപ്പിക്കുകയെന്നതാണെന്ന് കാൾ പേ പറഞ്ഞു. നത്തിങ്ങിന്റെ പ്രധാന വിപണികളിലൊന്നാണ് ഇന്ത്യ. അതിന്റെ വളർച്ചയിലും ഇന്ത്യൻ വിപണി പ്രധാന പങ്ക് വഹിച്ചിട്ടുണ്ട്. 2024ൽ 577 ശതമാനം വളർച്ച നേടിയതായാണ് റിപ്പോർട്ട്.
ഫോൺ 2എ പരമ്പരയുടെയും ഉപ ബ്രാൻഡായ സിഎംഎഫിന് കീഴിലുള്ള ഉൽപ്പന്നങ്ങളുടെയും വിജയമാണ് ഈ ശക്തമായ പ്രകടനത്തിന് പ്രധാനമായും കാരണമായത്. അടുത്തിടെ, ബ്രാൻഡിന്റെ സഞ്ചിത വരുമാനം $1 ബില്യൺ കവിഞ്ഞു. ഇന്ത്യൻ വിപണിയോടുള്ള കമ്പനിയുടെ പ്രതിബദ്ധത വെറും വിൽപ്പനയ്ക്കപ്പുറം പോകുന്നു.
