മലേഷ്യൻ സർക്കാർ 16 വയസ്സിന് താഴെയുള്ള വിദ്യാർത്ഥികൾക്ക് സോഷ്യൽ മീഡിയയും സ്മാർട്ട്‌ഫോണും നിരോധിക്കാൻ ഒരുങ്ങുന്നു
കോലാലമ്പൂർ : സോഷ്യൽ മീഡിയയും സ്മാർട്ട്‌ഫോൺ ഉപയോഗവും സംബന്ധിച്ച് സുപ്രധാന തീരുമാനം എടുക്കാൻ മലേഷ്യൻ സർക്കാർ. 16 വയസ്സിന് താഴെയുള്ള വിദ്യാർത്ഥികൾക്ക് സ്മാർട്ട്‌ഫോണും സോഷ്യൽ മീഡിയയും നിരോധിക്കുന്നത് സർക്കാർ പരിഗണനയിൽ. സ്‌കൂളുകളിൽ അക്രമാസക്തമായ കുറ്റകൃത്യങ്ങളും ഭീഷണിപ്പെടുത്തലും വർദ്ധിച്ചുവരുന്ന സാഹചര്യത്തിലാണ് മലേഷ്യൻ സർക്കാർ ഈ നിർദ്ദേശം പരിഗണിക്കുന്നത്.
സ്കൂൾ സുരക്ഷ മെച്ചപ്പെടുത്തുന്നതിനായി മന്ത്രിസഭ മൂന്ന് അടിയന്തര നടപടികൾ നിർദ്ദേശിച്ചിട്ടുണ്ടെന്നും അതിൽ ഒന്ന് സ്മാർട്ട്‌ഫോണുകളുടെ നിരോധനമാണെന്നും പ്രധാനമന്ത്രി അൻവർ ഇബ്രാഹിം പറഞ്ഞു. സോഷ്യൽ മീഡിയയ്ക്കും സ്മാർട്ട്‌ഫോണുകൾക്കും നിരോധനം ഏർപ്പെടുത്തുന്നതിലേക്ക് സർക്കാർ നീങ്ങുകയാണ്.
“സോഷ്യൽ മീഡിയയും ഓൺലൈൻ ഗെയിമുകളും ആളുകളുടെ പെരുമാറ്റത്തെ സ്വാധീനിക്കുമെന്ന് ഞങ്ങൾ കണ്ടിട്ടുണ്ട്. ചിലപ്പോൾ അവ കുറ്റകൃത്യങ്ങൾക്ക് പോലും പ്രേരണ നൽകും. അതുകൊണ്ടാണ് 16 വയസ്സും അതിൽ താഴെയുമുള്ള വിദ്യാർത്ഥികൾക്ക് സ്മാർട്ട്‌ഫോൺ ഉപയോഗം നിരോധിക്കുന്നതിലേക്ക് ഞങ്ങൾ നീങ്ങുന്നത്,” മലേഷ്യൻ പ്രധാനമന്ത്രി പറഞ്ഞു.
“ഈ നിർദ്ദേശം ഇപ്പോഴും പരിഗണനയിലാണ്, പക്ഷേ നിരവധി രാജ്യങ്ങൾ ഇതിനകം നിയന്ത്രണങ്ങൾ നടപ്പിലാക്കിയിട്ടുണ്ട്.” യുവാക്കൾക്കിടയിൽ വർദ്ധിച്ചുവരുന്ന ഓൺലൈൻ അക്രമം, സൈബർ ഭീഷണി, സോഷ്യൽ മീഡിയയിലെ നെഗറ്റീവ് സ്വാധീനം എന്നിവയെക്കുറിച്ച് മലേഷ്യയിൽ ആശങ്കകൾ വർദ്ധിച്ചിട്ടുണ്ട്. ഇതിനുള്ള പ്രതികരണമായാണ് സർക്കാർ ഈ നടപടി സ്വീകരിക്കാൻ തീരുമാനിച്ചത് അദ്ദേഹം പറഞ്ഞു.
കൂടാതെ, പ്രായപൂർത്തിയാകാത്ത കുട്ടികളെ തിരിച്ചറിയുന്നതിനും അവർ സോഷ്യൽ മീഡിയ അക്കൗണ്ടുകൾ സൃഷ്ടിക്കുന്നത് തടയുന്നതിനുമായി സോഷ്യൽ മീഡിയ പ്ലാറ്റ്‌ഫോമുകളിൽ eKYC നടപ്പിലാക്കാൻ മലേഷ്യൻ സർക്കാർ ആഗ്രഹിക്കുന്നു. കുട്ടികളുടെ പെരുമാറ്റത്തിൽ സ്മാർട്ട്‌ഫോണുകളുടെയും സോഷ്യൽ മീഡിയയുടെയും സ്വാധീനം മലേഷ്യയിൽ ഒരു പ്രധാന പ്രശ്നമാണ്.
കുട്ടികളുടെ സോഷ്യൽ മീഡിയ ഉപയോഗം നിയന്ത്രിക്കാൻ മലേഷ്യക്കാരിൽ ഗണ്യമായ വിഭാഗം ആഗ്രഹിക്കുന്നുണ്ടെന്ന് റിപ്പോർട്ടുകൾ സൂചിപ്പിക്കുന്നു. എന്നിരുന്നാലും, സ്മാർട്ട്‌ഫോണുകൾ നിരോധിക്കുന്ന വിഷയത്തിൽ പൊതുജനാഭിപ്രായം ഭിന്നിച്ചിരിക്കുന്നു. ഇപ്‌സോസ് മലേഷ്യ എഡ്യൂക്കേഷൻ മോണിറ്റർ 2025 സർവേ പ്രകാരം, പത്തിൽ ഏഴ് മലേഷ്യക്കാരും 14 വയസ്സിന് താഴെയുള്ള കുട്ടികൾക്കായി സോഷ്യൽ മീഡിയ ഉപയോഗം നിയന്ത്രിക്കുന്നതിനെ പിന്തുണയ്ക്കുന്നു.
