ഇന്ത്യൻ വിദ്യാർത്ഥിയെ യുഎസിൽ കാണാതായതായി പരാതി
വാഷിങ്ടൺ ഡിസി : 22 കാരനായ ഇന്ത്യൻ വിദ്യാർത്ഥിയെ യുഎസിൽ കാണാതായതായി പരാതി. കർണ്ണാടക സ്വദേശിയായ സാകേത് ശ്രീനിവാസയ്യയെ ഫെബ്രുവരി 9 മുതൽ കണാനില്ലെന്നാണ് പരാതി ലഭിച്ചിരിക്കുന്നത്. ബെർക്ക്ലിയിലെ കാലിഫോർണിയ സർവകലാശാലയിലാണ് സാകേത് പഠിച്ചിരുന്നത്. ബെർക്ക്ലി കുന്നുകളിലെ അൻസ തടാകത്തിന് സമീപമാണ് അദ്ദേഹത്തെ അവസാനമായി കണ്ടത്.
സാകേത് ശ്രീനിവാസയ്യയെ കണ്ടെത്തുന്നതിനായി കോൺസുലേറ്റ് ജനറൽ അദ്ദേഹത്തിന്റെ കുടുംബവുമായും ബന്ധപ്പെട്ട പ്രാദേശിക അധികാരികളുമായും ബന്ധപ്പെട്ടിട്ടുണ്ടെന്ന് സാൻ ഫ്രാൻസിസ്കോയിലെ ഇന്ത്യൻ എംബസി ശനിയാഴ്ച ട്വീറ്റ് ചെയ്തു. ശ്രീനിവാസയ്യയുടെ റൂംമേറ്റ് ബനീത് സിംഗ്, തന്റെ സുഹൃത്തിനെ കണ്ടെത്താൻ സഹായം അഭ്യർത്ഥിച്ച് ലിങ്ക്ഡ്ഇനിൽ പോസ്റ്റ് ചെയ്തതോടെയാണ് വിവരം പുറത്ത് വരുന്നത്.
“കർണാടക സ്വദേശിയും യുസി ബെർക്ക്ലിയിലെ ബിരുദാനന്തര ബിരുദ വിദ്യാർത്ഥിയുമായ സാകേത് ശ്രീനിവാസയ്യയുടെ തിരോധാനത്തിൽ സാൻ ഫ്രാൻസിസ്കോയിലെ ഇന്ത്യൻ കോൺസുലേറ്റ് ജനറൽ വളരെയധികം ആശങ്കാകുലരാണ്. വിദ്യാർത്ഥിയെ കണ്ടെത്തുന്നതിനായി കോൺസുലേറ്റ് കുടുംബവുമായി ബന്ധപ്പെടുകയും ബന്ധപ്പെട്ട പ്രാദേശിക അധികാരികളുമായി ബന്ധപ്പെടുകയും ചെയ്യുന്നു,” ഇന്ത്യൻ എംബസി ട്വീറ്റ് ചെയ്തു.
‘എന്റെ റൂംമേറ്റായ സാകേത്ഹ് ശ്രീനിവാസയ്യ തിങ്കളാഴ്ച 9-ാം തീയതി മുതൽ കാണാതായിരിക്കുകയാണ്. അവസാനമായി ബെർക്ലി ഹിൽസിലെ ലേക്ക് ആൻസയ്ക്ക് സമീപം കണ്ടതായി വിവരം ലഭിച്ചു. ആ പ്രദേശത്ത് ഉള്ള ആരെയെങ്കിലും നിങ്ങൾക്കറിയാമെങ്കിൽ, അല്ലെങ്കിൽ അടുത്തിടെ അദ്ദേഹത്തെ കണ്ടതായി എന്തെങ്കിലും വിവരം ഉണ്ടെങ്കിൽ, ദയവായി എനിക്ക് അറിയിക്കുക. അദ്ദേഹത്തെ കണ്ടെത്താൻ ഞാൻ പൊലീസ് വകുപ്പുമായി ചേർന്ന് അടിയന്തരമായി പ്രവർത്തിക്കുകയാണ്. ഇത് ഞങ്ങൾക്കായി വളരെ പ്രയാസകരമായ സമയമാണ്. സഹായകരമായ ഏതൊരു വിവരവും ദയവായി പങ്കുവെക്കണം,” അദ്ദേഹം പ്ലാറ്റ്ഫോമിൽ കുറിച്ചു.
ശ്രീനിവാസയ്യ കർണാടക സ്വദേശിയാണ്. അദ്ദേഹത്തിന്റെ ലിങ്ക്ഡ്ഇൻ പ്രൊഫൈൽ അനുസരിച്ച്, 2025 ൽ ഐഐടി-മദ്രാസിൽ നിന്ന് കെമിക്കൽ എഞ്ചിനീയറിംഗിൽ ബിടെക് ബിരുദം നേടി. നിലവിൽ യുസി ബെർക്ക്ലിയിൽ നിന്ന് കെമിക്കൽ ആൻഡ് ബയോമോളിക്യുലാർ എഞ്ചിനീയറിംഗിൽ ബിരുദാനന്തര ബിരുദം വിദ്യാർത്ഥിയാണ്.
