സ്കോട്ട്ലാൻഡിലെ വനമേഖലയിൽ വൻ കാട്ടുതീ; യു.കെയിലുടനീളം മുന്നറിയിപ്പ്
എഡിൻബർഗ് : സ്കോട്ട്ലൻഡിലെ വനമേഖലയിലെ വലിയ പ്രദേശത്ത് കാട്ടുതീ പടരുന്നതായി റിപ്പോർട്ട്. അഗ്നിശമന സേനാംഗങ്ങൾ തീ കെടുത്താൻ ശ്രമിച്ചുവരികയാണ്. പ്രദേശത്തുനിന്ന് മാറിനിൽക്കാൻ പൊലീസ് ആളുകളോട് ആവശ്യപ്പെട്ടു. വെള്ളിയാഴ്ച രാത്രി 11.50 ഓടെയാണ് തെക്കൻ സ്കോട്ട്ലൻഡിലെ ഗാലോവേയിലെ ഗ്ലെൻട്രൂളിൽ തീ പടരുന്നതായി വിവരം ലഭിച്ചത്. കിഴക്കൻ അയർഷയറിലെ ലോച്ച് ഡൂൺ പ്രദേശത്തേക്ക് തീ വ്യാപിക്കുമെന്ന് കരുതുന്നതായി സ്കോട്ട്ലൻഡ് പൊലീസ് പറഞ്ഞു.
സ്കോട്ട്ലൻഡ്, വെയിൽസ്, ഇംഗ്ലണ്ട് എന്നിവിടങ്ങളിലെ അഗ്നിശമന സേനാംഗങ്ങൾ തുറസ്സായ സ്ഥലങ്ങളിൽ ബാർബിക്യൂകളും ക്യാമ്പ് ഫയറുകളും നടത്തുന്നതിനെതിരെ മുന്നറിയിപ്പ് നൽകിയിട്ടുണ്ട്. കൂടാതെ സിഗരറ്റുകൾ ശരിയായി നിർമാർജനം ചെയ്യാൻ ആളുകളോട് അഭ്യർത്ഥിക്കുകയും ചെയ്തു.
ഹെലികോപ്റ്ററുകൾ ഉപയോഗിച്ച് മെറിക് ഹിൽ, ബെൻ യെല്ലറി, ലോച്ച് ഡീ എന്നിവിടങ്ങളിൽ ബാധിച്ച തീ അണക്കാൻ ശ്രമിക്കുന്നുണ്ടെന്ന് പൊലീസ് പറഞ്ഞു. സ്കോട്ടിഷ് ഫയർ ആൻഡ് റെസ്ക്യൂ സർവീസിൽ നിന്നുള്ള അഗ്നിശമന സാമഗ്രികളും ഇവിടെയുണ്ട്. വ്യാഴാഴ്ച ഇതേ പ്രദേശത്ത് മറ്റൊരു കാട്ടുതീ റിപ്പോർട്ട് ചെയ്യപ്പെട്ടിരുന്നു.നേരത്തെ സ്കോട്ട്ലൻഡിലെ സ്റ്റിർലിംഗിലെ പോർട്ട് ഓഫ് മെന്റൈത്തിലെ ഗാർട്ടർ മോസിലെ പുല്ലിൽ പടർന്ന തീ നിയന്ത്രണവിധേയമാക്കിയിരുന്നു.
ഈ ആഴ്ച യു.കെയിലുടനീളമുള്ള കാട്ടുതീയെ അഗ്നിശമന സേനാംഗങ്ങൾ നേരിട്ടതിനുശേഷം കാലാവസ്ഥാ പ്രതിസന്ധിയെയും അതിനെ മറികടക്കാനുള്ള സേവനങ്ങളുടെ വർധിച്ച ആവശ്യകതയെയും നേരിടാൻ ദീർഘകാലവും സുസ്ഥിരവുമായ നിക്ഷേപം ആവശ്യമാണെന്ന് നാഷണൽ ഫയർ ചീഫ്സ് കൗൺസിൽ മുന്നറിയിപ്പ് നൽകി.
ഈ വർഷം യു.കെയിൽ 286 കാട്ടുതീ ഉണ്ടായതായി എൻ.എഫ്‌.സി.സിയുടെ കണക്കുകൾ സൂചിപ്പിക്കുന്നു, റെക്കോർഡ് ഭേദിക്കുന്ന താപനിലയും അഭൂതപൂർവമായ കാട്ടുതീ പ്രവർത്തനവും ഉണ്ടായ 2022ലെ കാലയളവിൽ രേഖപ്പെടുത്തിയതിനേക്കാൾ 100 ൽ അധികമാണിത്.
നിലവിലെ ബജറ്റുകൾ ഇതിനകം തന്നെ തികയാത്ത അവസ്ഥയിൽ കാട്ടുതീയിലെ ഗണ്യമായ വർധനവ് നേരിടാൻ കഴിയുന്നില്ലെന്ന് എൻ.എഫ്‌.സി.സി സർക്കാറിന് മുന്നറിയിപ്പ് നൽകി. കാലാവസ്ഥാ വ്യതിയാനം കാട്ടുതീ പോലുള്ള തീവ്രമായ കാലാവസ്ഥാ സംഭവങ്ങളുടെ വർധനവിന് കാരണമാകുന്നു എന്ന വസ്തുതയിൽ നിന്ന് രക്ഷപ്പെടാൻ കഴിയില്ല എന്ന് എൻ.എഫ്‌.സി.സിയുടെ ചെയർമാൻ ഫിൽ ഗാരിഗൻ ചൂണ്ടിക്കാട്ടി.
