പ്രശസ്ത ഹോളിവുഡ് നടി കാതറിൻ ഒഹാര അന്തരിച്ചു
ലോസ് ഏഞ്ചൽസ് : പ്രശസ്ത ഹോളിവുഡ് നടി കാതറിൻ ഒഹാര (71) അന്തരിച്ചു. വാർദ്ധക്യസഹജമായ അസുഖങ്ങളെ തുടർന്ന് ലോസ് ഏഞ്ചൽസിലെ വസതിയിൽ വെള്ളിയാഴ്ചയായിരുന്നു അന്ത്യമെന്ന് അവരുടെ ഏജന്റ് അറിയിച്ചു. ഹാസ്യ വേഷങ്ങളിലൂടെ ലോകമെമ്പാടുമുള്ള സിനിമാ പ്രേമികളുടെ പ്രിയങ്കരിയായിരുന്നു കാതറിൻ.
വിഖ്യാത ചിത്രം ‘ഹോം എലോണി’ൽ (Home Alone) എട്ടു വയസ്സുകാരനായ മകൻ കെവിനെ വീട്ടിൽ മറന്നുവെച്ച് അവധിക്കാല യാത്ര പോകുന്ന അമ്മ ‘കെയ്റ്റ് മക്കാലിസ്റ്റർ’ എന്ന കഥാപാത്രത്തിലൂടെയാണ് അവർ ഏറെ ശ്രദ്ധിക്കപ്പെടുന്നത്. ‘ബീറ്റിൽജൂസ്’ (Beetlejuice), ‘ഷിറ്റ്സ് ക്രീക്ക്’ (Schitt’s Creek) എന്നീ ചിത്രങ്ങളിലെയും പരമ്പരകളിലെയും പ്രകടനം അവർക്ക് ലോകം മുഴുവൻ ആരാധകരെ സൃഷ്ടിച്ചു.
കാതറിന്റെ അപ്രതീക്ഷിത വിയോഗത്തിൽ സിനിമാ ലോകവും ആരാധകരും അതീവ ദുഃഖത്തിലാണ്. അത്ഭുതകരമായ ഒരു കലാകാരിയും വ്യക്തിയും സഹപ്രവർത്തകയും എന്നാണ് സഹപ്രവർത്തകർ അവരെ വിശേഷിപ്പിക്കുന്നത്. എമ്മി അവാർഡ് നേടിയ ‘ദി സ്റ്റുഡിയോ’, എച്ച്.ബി.ഒ പരമ്പര ‘ദി ലാസ്റ്റ് ഓഫ് അസ്’ എന്നിവയിലാണ് കാതറിൻ അവസാനമായി അഭിനയിച്ചത്.
കോവിഡ് കാലഘട്ടത്തിൽ ഏറെ ജനപ്രിയമായ ‘ഷിറ്റ്സ് ക്രീക്ക്’ എന്ന കോമഡി പരമ്പരയിലൂടെ കാതറിൻ ഒഹാര യുവാക്കളുടെ ഇടയിൽ വീണ്ടും തരംഗമായി മാറി. ഇതിലെ മോയ്റ റോസ് എന്ന കഥാപാത്രം അവർക്ക് മികച്ച നടിക്കുള്ള എമ്മി അവാർഡ് നേടിക്കൊടുത്തു.
“അമ്മേ, നമുക്ക് ഇനിയും സമയമുണ്ടാകുമെന്ന് ഞാൻ കരുതി. എനിക്ക് ഇനിയും ഒരുപാട് സംസാരിക്കാനുണ്ടായിരുന്നു. ഞാൻ നിങ്ങളെ സ്നേഹിക്കുന്നു, പിന്നീട് കാണാം.” ‘ഹോം എലോണി’ൽ കാതറിനൊപ്പം അഭിനയിച്ച മക്കൗലി കുൽക്കിൻ (Macaulay Culkin) വികാരാധീനനായി തന്റെ ഇൻസ്റ്റാഗ്രാമിൽ കുറിച്ചു.
ബോളിവുഡ് താരങ്ങളായ കരീന കപൂർ, ആലിയ ഭട്ട്, ഇല്യാന ഡിക്രൂസ്, ബിപാഷ ബസു എന്നിവരും ഹോളിവുഡ് താരങ്ങളായ മെറിൽ സ്ട്രീപ്പ്, മൈക്കൽ കീറ്റൺ, പെഡ്രോ പാസ്കൽ എന്നിവരും കാതറിന് ആദരാഞ്ജലികൾ അർപ്പിച്ചു. കാനഡ പ്രധാനമന്ത്രി മാർക്ക് കാർണി അവരെ “കനേഡിയൻ ലെജൻഡ്” എന്നാണ് വിശേഷിപ്പിച്ചത്. ബോ വെൽച്ചാണ് കാതറിൻറെ ഭർത്താവ്. മാത്യു, ലൂക്ക് എന്നീ രണ്ട് മക്കളുമുണ്ട്.
