ഡീപ്സീക്ക് ഓപ്പൺഎഐ കോപ്പിയടിക്കുന്നതായി യുഎസ് നിയമനിർമ്മാതാക്കളുടെ പാനലിനോട് വെളിപ്പെടുത്തിയതായി റിപ്പോർട്ട്
വാഷിങ്ടൺ ഡിസി : ചൈനീസ് നിർമ്മിത നിർമ്മിതബുദ്ധി സ്റ്റാർട്ടപ്പ് ആയ ഡീപ്സീക്ക് അമേരിക്കൻ നിർമ്മിത നിർമ്മിതബുദ്ധി മോഡലുകളെ കോപ്പിയടിച്ച് സ്വന്തം സിസ്റ്റങ്ങളെ പരിശീലിപ്പിക്കാൻ ശ്രമിക്കുന്നതായി യുഎസ് നിയമനിർമ്മാതാക്കളുടെ പാനലിനോട് വെളിപ്പെടുത്തിയതായി റിപ്പോർട്ട്. യുഎസും ചൈനയും തമ്മിലുള്ള തന്ത്രപരമായ മത്സരത്തെക്കുറിച്ച് യുഎസ് ഹൗസ് സെലക്ട് കമ്മിറ്റിക്ക് സമർപ്പിച്ച ഒരു മെമ്മോയിലാണ് ഈ ആരോപണങ്ങൾ ഉന്നയിച്ചിരിക്കുന്നത്. ഡീപ്സീക്ക് ജീവനക്കാരുമായി ബന്ധമുള്ള അക്കൗണ്ടുകൾ ഓപ്പൺഎഐ യുടെ പ്രവേശന നിയന്ത്രണങ്ങൾ മറികടക്കാൻ ശ്രമിച്ചത് കണ്ടെത്തിയെന്നാണ് ആരോപണം. ഇത് ചൈനീസ് സ്റ്റാർട്ടപ്പ് കോപ്പിയടി നടത്തിയതിന് തെളിവായി ഓപ്പൺഎഐ ഉന്നയിച്ചു. തേർഡ് പാർട്ടി റൂട്ടിംഗ് രീതികൾ ഉപയോഗിച്ച് ഇത്തരം അക്കൗണ്ടുകൾ തങ്ങളുടെ പ്രവേശന ഉറവിടം മറച്ചുവെച്ചതായും ഓപ്പൺഎഐ ആരോപിക്കുന്നു.ഓപ്പൺഎഐയും മറ്റ് യുഎസ് ലാബുകളും വികസിപ്പിച്ചെടുത്ത എഐ ശേഷികളിൽ നിന്ന് സൗജന്യമായി പ്രയോജനം നേടാനുള്ള ഡീപ്സീക്ക് തുടർച്ചയായി ശ്രമിക്കുകയാണെന്ന് ഓപ്പൺഎഐ കുറ്റപ്പെടുത്തി. ചൈനീസ് സ്റ്റാർട്ടപ്പുമായി ബന്ധപ്പെട്ട വ്യക്തികൾ, ‘ഡിസ്റ്റിലേഷൻ’ എന്നറിയപ്പെടുന്ന ഒരു സാങ്കേതികവിദ്യയ്ക്കായി യുഎസ് എഐ മോഡലുകളിൽ നിന്ന് ഔട്ട്പുട്ടുകൾ പ്രോഗ്രാം വഴി വേർതിരിച്ചെടുക്കാൻ കോഡ് എഴുതിയതായും കമ്പനി അവകാശപ്പെടുന്നു.
നിലവിലുള്ള ശക്തമായ എഐ സിസ്റ്റം ഒരു പുതിയ മോഡലിനെ വിലയിരുത്തുകയും നയിക്കുകയും ചെയ്യുന്ന ഒരു പ്രക്രിയയാണ് ഡിസ്റ്റിലേഷൻ. പുതിയ മോഡലിന് നേരത്തെ തന്നെ സ്ഥാപിതമായ ശക്തമായ മോഡലിന്റെ രീതികളും പാറ്റേണുകളും പെർഫോമൻസുമെല്ലാം സ്വീകരിച്ചു കൊണ്ട് പുതിയ ഔട്ട്പുട്ടുകൾ സൃഷ്ടിച്ചെടുക്കാനാകും. ഇതുവഴി വലിയ തോതിൽ ചെലവ് കുറയും. അതിവേഗത്തിൽ എഐ വികസന പ്രക്രിയകൾ മുമ്പോട്ടു പോകുകയും ചെയ്യും. യുഎസ്സിന്റെ ശക്തമായ എഐ മോഡലുകളുടെ കഴിവുകളുപയോഗിച്ച് പുതിയ മോഡലുകളെ സൃഷ്ടിക്കാനാണ് ഡീപ്സീക്ക് ശ്രമിച്ചത്. ഇതുവഴി കാര്യമായ ഒരു ചെലവുമില്ലാതെ തന്നെ ഓപ്പൺഎഐ നിർമ്മിച്ചെടുത്ത മോഡലുകളുടെ ശേഷികൾ കൈക്കലാക്കാൻ ഡീപ്സീക്കിന് സാധിക്കും.
നിർമ്മിതബുദ്ധി രംഗത്തെ യുഎസ്-ചൈന സംഘർഷങ്ങൾക്കിടയിലാണ് ഈ ആരോപണങ്ങൾ വരുന്നത്. കഴിഞ്ഞ വർഷം ചൈനയിൽ നിന്ന് പുറത്തിറങ്ങിയ എഐ മോഡലുകൾ അമേരിക്ക സൃഷ്ടിച്ചെടുത്ത വമ്പൻ സിസ്റ്റങ്ങളുമായി കാര്യക്ഷമമായ മത്സരിക്കുന്നത് ലോകശ്രദ്ധ നേടിയിരുന്നു. യുഎസ്സിന്റെ എഐ മോഡലുകളുടേതിന് സമാനമായ മോഡലുകളെ അത്രയൊന്നും ചെലവില്ലാതെ തന്നെ ചൈന സംഘടിപ്പിക്കുന്നത് ലോകത്തെ ഞെട്ടിച്ചു. ഹാങ്ഷൂ ആസ്ഥാനമായി പ്രവർത്തിക്കുന്ന സ്ഥാപനമാണ് ഡീപ്സീക്ക്. യുഎസ് ഏര്പ്പെടുത്തിയ കയറ്റുമതി നിയന്ത്രണങ്ങൾക്കിടയിലും ചൈന തങ്ങളുടെ വിവിധങ്ങളായ കഴിവ് വളർത്തിയെടുക്കുന്നത് വാഷിംഗ്ടണിൽ ആശങ്കയുയർത്തുന്നുമുണ്ട്.
ചില ചൈനീസ് ലാർജ് ലാംഗ്വേജ് മോഡൽ ഡെവലപ്പർമാർ പരിശീലനത്തിനും വിന്യാസത്തിനുമെല്ലാം സുരക്ഷാ സമ്പ്രദായങ്ങളിൽ എളുപ്പവഴികൾ സ്വീകരിക്കുന്നതായും ഓപ്പൺഎഐ മെമ്മോയിൽ ആരോപിക്കുന്നു. അതെസമയം സംശയാസ്പദമായ പ്രവർത്തനങ്ങൾ തങ്ങൾ നിരീക്ഷിക്കുന്നുണ്ട്. മോഡൽ ഔട്ട്പുട്ടുകൾ വേർതിരിച്ചെടുക്കാൻ ശ്രമിക്കുന്ന ഉപയോക്താക്കളെ നീക്കം ചെയ്യുകയും ചെയ്യുന്നുണ്ടെന്ന് കമ്പനി അറിയിച്ചു.
