യുഎസിൽ എച്ച്1ബി വിസ ഉടമകൾ ‘വീട്ടിലെ ഊണ്’ ബിസിനസ് നടന്നതായി സോഷ്യൽ മീഡിയയിൽ ആരോപണം
വാഷിങ്ടൺ ഡിസി : അമേരിക്കയിൽ എച്ച്1ബി വിസ മാർഗം എത്തിയവർ അനധികൃതമായി ഹോം കിച്ചൻ ബിസിനസ് നടത്തുന്നുവെന്ന ആരോപണം സോഷ്യൽ മീഡിയയിൽ സജീവമാകുന്നു. അമേരിക്കയിൽ പ്രത്യേകിച്ച് ടെക്സസിലാണ് ഇത്തരം പ്രവർത്തനങ്ങൾ നടക്കുന്നതെന്നാണ് ആരോപണം. പാർട്ട് ടൈം ജോലികൾ ചെയ്യുന്നതും സ്വന്തമായി ബിസിനസ് നടത്തുന്നതും നിയമപരമായി അനുവദനീയമല്ലെന്നിരിക്കെ എച്ച്1ബി വിസ ഉടമകളും അവരുടെ ആശ്രിതരായ എച്ച്4 വിസ ഉടമകളും അധിക വരുമാനം ലക്ഷ്യമിട്ടാണ് ഹോം കിച്ചൻ ബിസിനസിൽ ഏർപ്പെടുന്നത്. വീടുകളിൽനിന്ന് ചെറിയ വിരുന്നുകൾക്ക് ഭക്ഷണം തയ്യാറാക്കി നൽകുന്ന ഇത്തരം പ്രവർത്തനങ്ങൾക്ക് പലപ്പോഴും ഫേസ്ബുക്ക്, വാട്സ്ആപ്പ് പോലുള്ള സ്വകാര്യ ഗ്രൂപ്പുകളിലൂടെയാണ് പരസ്യം ചെയ്യുന്നത്. പൊതുജനങ്ങളുടെ ശ്രദ്ധയിൽപ്പെടാതെ രഹസ്യമായാണ് ഇവ നടക്കുന്നത്. എന്നാൽ ഇത്തരം പ്രവർത്തനങ്ങൾ അമേരിക്കൻ നിയമങ്ങൾക്ക് വിരുദ്ധമാണ്.
സോഷ്യൽ മീഡിയ പ്ലാറ്റ്ഫോമായ എക്സിൽ പ്രത്യക്ഷപ്പെട്ട ഒരു പോസ്റ്റിൽ ഇന്ത്യക്കാരുടേത് സംശയിക്കുന്ന ഹോം കിച്ചൻ ബിസിനസിന്റെ പരസ്യവും ഇത്തരം പ്രവർത്തനങ്ങൾ നടത്തുമ്പോൾ പാലിക്കേണ്ട നിയമവശങ്ങളും പങ്കുവെച്ചിട്ടുണ്ട്. ചെറുതും വലതുമായ പാർട്ടികളിലേക്ക് ഹോം മെയ്ഡ് നോർത്ത് ഇന്ത്യൻ ഭക്ഷണം ലഭ്യമാണെന്ന് പരസ്യത്തിൽ പറയുന്നു. ടെക്സസിലെ മെക്കിനി കേന്ദ്രീകരിച്ചു പ്രവർത്തിക്കുന്ന ഹോം കിച്ചൻ്റേതാണ് പരസ്യം. കുറഞ്ഞത് 12 മുതൽ 15 പേർ വരെയുള്ള പരിപാടികളിലേക്ക് ഭക്ഷണം നൽകുമെന്നും അഞ്ച് ദിവസമെങ്കിലും മുൻപേ ഓർഡർ നൽകണമെന്നും വലിയ ഓർഡറുകളും എത്തിച്ചു നൽകുമെന്നും പരസ്യത്തിൽ പറയുന്നു. ബന്ധപ്പെടേണ്ട നമ്പരും പരസ്യത്തിൽ നൽകിയിട്ടുണ്ട്.
എന്നാൽ ഇത് മെക്കിന്നിയിലെ പ്രാദേശിക നിയമങ്ങൾ അനുസരിച്ച് നിയമവിരുദ്ധമാണെന്ന് പോസ്റ്റിൽ ആരോപിക്കുന്നു. ഇത്തരം ഭക്ഷണ ബിസിനസുകൾക്ക് ഫുഡ് എസ്റ്റാബ്ലിഷ്മെൻ്റ് പെർമിറ്റ് ആവശ്യമാണ്. കൂടാതെ, റെസിഡൻഷ്യൽ അടുക്കളകളിൽനിന്ന് ചൂടുള്ള ഭക്ഷണം തയ്യാറാക്കി നൽകാൻ കഴിയില്ല. ടെക്സസ് കോട്ടേജ് ഫുഡ് നിയമം അനുസരിച്ച് ബേക്ക് ചെയ്ത സാധനങ്ങൾ മാത്രമേ റെസിഡൻഷ്യൽ അടുക്കളകളിൽ നിർമിക്കാൻ അനുവാദമുള്ളൂ, ചൂടുള്ള വിഭവങ്ങൾ നിർമിക്കാൻ അനുവാദമില്ലെന്നും പോസ്റ്റിൽ പറയുന്നു.
എച്ച്1ബി വിസ ഉടമകൾക്ക് പാർട്ട് ടൈം ജോലി ചെയ്യാൻ പറ്റുമോ?
യുഎസ് നിയമപ്രകാരം, എച്ച്1ബി വിസ ഉടമകൾക്ക് അവരെ സ്പോൺസർ ചെയ്യുന്ന കമ്പനികൾക്ക് വേണ്ടി മാത്രമേ ജോലി ചെയ്യാൻ അനുമതിയുള്ളൂ. കൂടാതെ, എച്ച്1ബി അപേക്ഷയിൽ പറഞ്ഞിരിക്കുന്ന പ്രത്യേക തൊഴിൽ മേഖലയിലും വ്യവസ്ഥകളിലും മാത്രമേ ജോലി ചെയ്യാൻ പാടുള്ളൂ. എച്ച്1ബി വിസ ഉടമകൾ അപേക്ഷയിൽ പറഞ്ഞിരിക്കുന്ന ജോലിയല്ലാതെ ഫ്രീലാൻസിങ്, ഓൺലൈൻ ടാക്സി ഡ്രൈവിങ്, പാർട്ട് ടൈം കൺസൾട്ടിങ്, ബിസിനസ്, കണ്ടന്റ് ക്രിയേഷൻ, കോഡിങ് തുടങ്ങിയ ജോലികൾ ചെയ്യുന്നത് നിയമവിരുദ്ധമാണെന്ന് യുഎസ് സിറ്റിസൺഷിപ്പ് ആൻ്റ് ഇമിഗ്രേഷൻ സർവീസസ് കണക്കാക്കും. ചെറിയ വരുമാനമാണെങ്കിലോ ക്ലയിന്റുകൾ യുഎസിന് പുറത്തുള്ളവരാണെങ്കിലോ പോലും ഇത് നിയമവിരുദ്ധമാണ്.
എന്നാൽ നിക്ഷേപം, ഓഹരികൾ, വാടക എന്നിവയിൽ നിന്നുള്ള നിഷ്ക്രിയ വരുമാനം അനുവദനീയമാണ്. അതേസമയം എംപ്ലോയ്മെൻ്റ് ഓതറൈസേഷൻ ഡോക്യുമെൻ്റ് ഉള്ള എച്ച്4 വിസ ഉടമകൾക്ക് മറ്റ് നിയമങ്ങൾ ലംഘിക്കാത്ത പക്ഷം ബിസിനസ് ഉടമയാകാനും നടത്താനും കഴിയും.
