സാങ്കേതിക തകരാർ; സൗദി സഖ്യസേന ഹെലികോപ്റ്റർ നജ്‌റാനിൽ തകർന്നുവീണ് രണ്ട് ജീവനക്കാർ മരിച്ചു
റിയാദ് : സൗദി അറേബ്യയിലെ നജ്‌റാൻ പ്രവിശ്യയിൽ സൗദി നാഷണൽ ഗാർഡിന്‍റെ എച്ച്-6ഐ നിരീക്ഷണ ഹെലികോപ്റ്റർ തകർന്ന് രണ്ട് ഉദ്യോഗസ്ഥർ മരിച്ചു. സാങ്കേതിക തകരാറാണ് അപകടകാരണമെന്ന് യെമനിലെ സൗദി നേതൃത്വത്തിലുള്ള സഖ്യസേന വ്യക്തമാക്കി. സൗദി അറേബ്യയുടെ തെക്കുപടിഞ്ഞാറൻ അതിർത്തി പ്രദേശത്താണ് അപകടമുണ്ടായതെന്ന് സഖ്യസേന ഔദ്യോഗിക വക്താവ് മേജർ ജനറൽ തുർക്കി അൽ-മാലികി അറിയിച്ചു. വ്യോമസേനയിലെ രണ്ട് ഓഫീസർമാരാണ് കൊല്ലപ്പെട്ടതെന്നും അദ്ദേഹം സ്ഥിരീകരിച്ചു. മരിച്ചവരുടെ കുടുംബാംഗങ്ങൾക്ക് അദ്ദേഹം അനുശോചനം രേഖപ്പെടുത്തി.
ഹൂതി വിമതരുടെ ഭാഗത്തുനിന്ന് ഇതുമായി ബന്ധപ്പെട്ട് അവകാശവാദവും ഉയർന്നിട്ടുണ്ട്. തങ്ങൾ സൗദി ഹെലികോപ്റ്റർ വെടിവച്ചിട്ടതായി ഇറാൻ പിന്തുണയുള്ള ഹൂതി സൈനിക വക്താവ് യഹ്യ സരീ അവകാശപ്പെട്ടു. നജ്‌റാൻ അതിർത്തിക്ക് സമീപം വെച്ചാണ് ഹെലികോപ്റ്റർ തകർത്തതെന്നായിരുന്നു ഹൂതികളുടെ വാദം. എന്നാൽ ഹൂതികളുടെ ഈ അവകാശവാദം സൗദി സഖ്യസേന ശക്തമായി തള്ളി. ഹൂതികൾ നുണ പ്രചരിപ്പിക്കുകയാണെന്ന് മേജർ ജനറൽ തുർക്കി അൽ-മാലികി വ്യക്തമാക്കി. സംഭവത്തിന്‍റെ കൂടുതൽ വിവരങ്ങൾ ലഭ്യമായിട്ടില്ല.
പ്രശസ്തമായ ബോയിങ് കമ്പനി വികസിപ്പിച്ചെടുത്തതാണ് ഈ നിരീക്ഷണ ഹെലികോപ്റ്റർ. ചെറിയ വലിപ്പവും താരതമ്യേന കുറഞ്ഞ റഡാർ, ദൃശ്യ സാന്നിധ്യമുള്ളതുമാണ് ഇതിന്റെ പ്രധാന സവിശേഷതകൾ. നഗരങ്ങളിലും പർവ്വത പ്രദേശങ്ങളിലും ഒരുപോലെ മികച്ച രീതിയിൽ പ്രവർത്തിക്കാനും കുത്തനെ അഭ്യാസങ്ങൾ നടത്താനുമുള്ള ഉയർന്ന ശേഷി ഈ ഹെലികോപ്റ്ററിനുണ്ട്. സായുധ നിരീക്ഷണങ്ങൾക്കും പ്രത്യേക സേനയ്ക്ക് അകമ്പടി സേവിക്കുന്നതിനും ഇത് ഏറെ അനുയോജ്യമാണ്. കൂടാതെ, വിപുലമായ സെൻസർ സംവിധാനങ്ങൾ സജ്ജീകരിച്ചിട്ടുള്ളതിനാൽ രാപ്പകലില്ലാതെ ദൗത്യങ്ങൾ നിർവഹിക്കാൻ ഈ ഹെലികോപ്റ്ററിന് സാധിക്കുമെന്നും അധികൃതർ അറിയിച്ചു.
