2025-ലെ ഒ-ലെവൽ പരീക്ഷയിലെ സ്ഥിതിവിവരക്കണക്ക് പുറത്തുവിട്ട് എംഎടിഎസ്ഇസി
2025-ലെ ഒ-ലെവൽ പരീക്ഷയിലെ സ്ഥിതിവിവരക്കണക്ക് പുറത്തുവിട്ട് എംഎടിഎസ്ഇസി (MATSEC). ഈ റിപ്പോർട്ട് പ്രകാരം, ഒ-ലെവൽ പരീക്ഷകൾ എഴുതുന്ന മാൾട്ടീസ് വിദ്യാർത്ഥികൾ തിരഞ്ഞെടുക്കുന്ന വിഷയങ്ങളിൽ വൈവിധ്യം വർധിക്കുന്നതായും അവർ കൂടുതൽ വിഷയങ്ങളിൽ പരീക്ഷ എഴുതുകയും ചെയ്യുന്നതായും കണ്ടെത്തി. ഡിജിറ്റൽ ഉപകരണങ്ങളുടെയും സ്കൂൾ അടിസ്ഥാനമാക്കിയുള്ള മൂല്യനിർണയമായ എസ്.ബി.എയുടെയും (School-Based Assessment) സ്വാധീനം വർധിച്ചുവരുന്നതും റിപ്പോർട്ട് ചൂണ്ടിക്കാണിക്കുന്നു. പരിഷ്കരിച്ച മൂല്യനിർണയ മാതൃക പ്രകാരമുള്ള ആദ്യത്തെ 2025 സെക്കൻഡറി എജുക്കേഷൻ സർട്ടിഫിക്കറ്റ് (SEC) സെഷൻ വിദ്യാർത്ഥികളുടെ നേട്ടങ്ങളെ കൂടുതൽ സമഗ്രമായി അവതരിപ്പിക്കുന്നു.
10 വിഷയങ്ങളിൽ പരീക്ഷ എഴുതുന്നവർ വർധിച്ചു
ഡാറ്റ പ്രകാരം, 16 വയസുള്ള ഭൂരിഭാഗം വിദ്യാർത്ഥികളും ഇപ്പോൾ ഒമ്പത് മുതൽ പത്ത് വിഷയങ്ങൾ വരെ രജിസ്റ്റർ ചെയ്യുന്നു. 2025-ൽ 1,726 വിദ്യാർത്ഥികൾ (901 പെൺകുട്ടികളും 825 ആൺകുട്ടികളും) 10 വിഷയങ്ങളിൽ പരീക്ഷ എഴുതി. 2024-ൽ ഇത് 1,383 ആയിരുന്നു. 832 പേർ ഒമ്പത് വിഷയങ്ങൾക്കും, 175 ആൺകുട്ടികളും 353 പെൺകുട്ടികളും 11 അല്ലെങ്കിൽ അതിൽ കൂടുതലായ വിഷയങ്ങൾക്കും രജിസ്റ്റർ ചെയ്തു. നാല് വിദ്യാർത്ഥികൾ 15 വിഷയങ്ങളിൽ വരെ പരീക്ഷ എഴുതി.
വിഷയങ്ങളുടെ എണ്ണം വർധിച്ചതിന് പ്രധാന കാരണം എംഎടിഎസ്ഇസി പോർട്ടലിലെ മെച്ചപ്പെട്ട സൗകര്യങ്ങളും, മൊത്തം മാർക്കിന്റെ 30% വരെയുള്ള എസ്.ബി.എ ഉൾപ്പെടുത്തലുമാണ്. എസ്.ബി.എയിൽ മികച്ച പ്രകടനം കാഴ്ചവെക്കുന്ന വിദ്യാർത്ഥികളെ കൂടുതൽ വിഷയങ്ങളിൽ ഔദ്യോഗിക പരീക്ഷ എഴുതാൻ പ്രോത്സാഹിപ്പിക്കുന്നതും ഇതിന് കാരണമാകുന്നു. പുതുക്കിയ എസ്.ഇസി ഘടനയിൽ 46 വിഷയങ്ങൾ ഉൾപ്പെടുത്തിയതും രജിസ്ട്രേഷനുകളുടെ വ്യാപനത്തിൽ പ്രതിഫലിക്കുന്നു.
മൂന്ന് സയൻസ് വിഷയങ്ങളും തിരഞ്ഞെടുക്കുന്നതിൽ പെൺകുട്ടികൾ മുൻപിൽ
റിപ്പോർട്ട് പ്രകാരം വിഷയ തിരഞ്ഞെടുപ്പിൽ ലിംഗ വ്യത്യാസം തുടരുന്നു. 336 പെൺകുട്ടികൾ ബയോളജി, കെമിസ്ട്രി, ഫിസിക്സ് എന്നീ മൂന്ന് സയൻസ് വിഷയങ്ങളും എടുത്തപ്പോൾ, ആൺകുട്ടികൾ 229 പേരാണ് ഈ മൂന്ന് വിഷയങ്ങളും എടുത്തത്.
മൊത്തത്തിൽ 13.9% വിദ്യാർത്ഥികൾ മാത്രമാണ് മൂന്ന് സയൻസ് വിഷയങ്ങൾക്കും രജിസ്റ്റർ ചെയ്തത്. ഭാഷകൾ ഏറെ ജനപ്രിയമാണ്; 81.2% വിദ്യാർത്ഥികൾ കുറഞ്ഞത് ഒരു വിദേശ ഭാഷയെങ്കിലും എടുത്തിട്ടുണ്ട്. ഫ്രഞ്ച്, ഇറ്റാലിയൻ വിഷയങ്ങളിൽ പെൺകുട്ടികൾ കൂടുതലാണ്. എന്നാൽ 10.9% പേർ മാത്രമാണ് ഒന്നിലധികം വിദേശ ഭാഷകൾ എടുത്തത്.
സ്കൂൾ മേഖലയിലെ വ്യത്യാസങ്ങൾ
സ്കൂൾ മേഖലകളിൽ പ്രകടന വ്യത്യാസം വ്യക്തമാണ്. ഭൂരിഭാഗം വിഷയങ്ങളിലും ഏറ്റവും ഉയർന്ന നേട്ടനിലയായ ലെവൽ 3-ൽ പെൺകുട്ടികൾ മുൻപിലാണ്. സ്റ്റേറ്റ് സ്കൂളുകളിലെ 24.9% വിദ്യാർത്ഥികൾ മാത്രമാണ് ഏറ്റവും ഉയർന്ന ലെവൽ 3 ഗണിത പരീക്ഷ തിരഞ്ഞെടുക്കിയത്. ഇത് ചർച്ച് സ്കൂളുകളിൽ 54.6%യും സ്വതന്ത്ര സ്കൂളുകളിൽ 66.7%യുമാണ്. ഈ വ്യത്യാസം വിദ്യാഭ്യാസ സംവിധാനത്തിലെ ഘടനാപരമായ അസമത്വങ്ങളെ പ്രതിഫലിപ്പിക്കുന്നു.
അഡ്വാൻസ്ഡ് ലെവലിൽ മാർക്കറ്റിംഗ് ഉയരത്തിൽ
അഡ്വാൻസ്ഡ് ലെവലിൽ മാർക്കറ്റിംഗ് വിഷയത്തിന് റെക്കോർഡ് രജിസ്ട്രേഷനാണ് ഉണ്ടായത്. 583 പേർ അഡ്വാൻസ്ഡ് മാർക്കറ്റിംഗും 496 പേർ ഇന്റർമീഡിയറ്റ് മാർക്കറ്റിംഗും എടുത്തു. അതേസമയം, റിലീജിയസ് നോളജ് ഏറ്റവും കുറഞ്ഞ ജനപ്രിയതയുള്ള വിഷയങ്ങളിൽ ഒന്നായി തുടരുന്നു — അഡ്വാൻസ്ഡ് ലെവലിൽ 37 പേരും ഇന്റർമീഡിയറ്റിൽ 99 പേരുമാണ് എടുത്തത്.
സൈക്കോളജി ഇന്റർമീഡിയറ്റ് ലെവലിൽ 826 പേർ തിരഞ്ഞെടുക്കുകയും, സോസിയോളജി അഡ്വാൻസ്ഡ് ലെവലിൽ 236 പേരും ഇന്റർമീഡിയറ്റിൽ 347 പേരും തിരഞ്ഞെടുക്കുകയും ചെയ്തു.
മൊത്തത്തിൽ, ഇംഗ്ലീഷ് അഡ്വാൻസ്ഡ് (696)യും ഇന്റർമീഡിയറ്റ് (1,036) ലെവലുകളിലും ഏറ്റവും ജനപ്രിയമായ വിഷയമായി തുടരുന്നു. മാൾട്ടീസ് അഡ്വാൻസ്ഡ് ലെവലിൽ 453 പേരും ഇന്റർമീഡിയറ്റിൽ 201 പേരും എടുത്തു. പ്യൂർ മാത്തമാറ്റിക്സ്, ഫിസിക്സ് എന്നിവയുടെ എൻട്രികൾ 2016-ലെ ഇടിവിന് ശേഷം സ്ഥിരത കൈവരിച്ചതായി റിപ്പോർട്ട് സൂചിപ്പിക്കുന്നു. അഡ്വാൻസ്ഡ് അപ്ലൈഡ് മാത്തമാറ്റിക്സ് സയൻസ് ഗ്രൂപ്പിൽ ഏറ്റവും കുറഞ്ഞ ജനപ്രിയതയുള്ള വിഷയമായി തുടരുന്നു.
