യുഎസിൻറെ ചുവടുപിടിച്ച് ഏഷ്യൻ രാജ്യങ്ങക്ക് 50% താരിഫ് ചുമത്താൻ തീരുമാനിച്ച് മെക്സിക്കോ
മെക്സിക്കോ സിറ്റി : ഇന്ത്യ, ചൈന ഉൾപ്പെടെയുള്ള ഏഷ്യൻ രാജ്യങ്ങളിൽ നിന്നുള്ള സാധനങ്ങൾക്ക് 50% താരിഫ് ചുമത്താൻ തീരുമാനിച്ച് മെക്സിക്കോ. സെനറ്റ് ഈ നിർദ്ദേശം അംഗീകരിച്ചു, മെക്സിക്കോയുമായി വ്യാപാര കരാർ ഇല്ലാത്ത രാജ്യങ്ങൾക്ക് ഇത് ഒരു വലിയ തിരിച്ചടിയായിരിക്കും. റിപ്പോർട്ട് അനുസരിച്ച്, മെക്സിക്കോ വർദ്ധിപ്പിച്ച താരിഫ് അടുത്ത വർഷം, 2026 മുതൽ പ്രാബല്യത്തിൽ വരും. ഈ തീരുമാനം ഏറ്റവും കൂടുതൽ ബാധിക്കുക ചൈന, ഇന്ത്യ, ദക്ഷിണ കൊറിയ, തായ്ലൻഡ്, ഇന്തോനേഷ്യ എന്നീ രാജ്യങ്ങളെയാണ്.
അടുത്ത വർഷം മുതൽ, ഈ രാജ്യങ്ങളിൽ നിന്ന് ഇറക്കുമതി ചെയ്യുന്ന ഓട്ടോ പാർട്സ്, തുണിത്തരങ്ങൾ, സ്റ്റീൽ, മറ്റ് വസ്തുക്കൾ എന്നിവയ്ക്ക് മെക്സിക്കോ 50% വരെ തീരുവ ചുമത്തും. കൂടാതെ, സെനറ്റ് പാസാക്കിയ നിർദ്ദേശം അനുസരിച്ച് മറ്റ് നിരവധി സാധനങ്ങളുടെ താരിഫ് 35% ആയും വർദ്ധിപ്പിക്കും.
യുഎസ് മാതൃക പിന്തുടർന്ന് മെക്സിക്കോയും തങ്ങളുടെ പ്രാദേശിക വ്യവസായങ്ങളെ പ്രോത്സാഹിപ്പിക്കുന്നതിനായി താരിഫ് വർദ്ധിപ്പിക്കുന്ന നടപടി സ്വീകരിച്ചത്ത്. മെക്സിക്കോ തങ്ങളുടെ ധനക്കമ്മി പരിഹരിക്കാൻ ശ്രമിക്കുമ്പോൾ, അടുത്ത വർഷം അമേരിക്കയെ പ്രീണിപ്പിക്കാനും 3.76 ബില്യൺ ഡോളർ അധിക വരുമാനം നേടാനുമാണ് മെക്സിക്കോ താരിഫ് വർധനവ് നടപ്പിലാക്കിയതെന്ന് വിശകലന വിദഗ്ധരും സ്വകാര്യ മേഖലയും വാദിച്ചതായും ഈ താരിഫ് വർദ്ധനവിനെ ബിസിനസ്സ് ഗ്രൂപ്പുകൾ ശക്തമായി എതിർത്തതായും റിപ്പോർട്ട് പറയുന്നു.
മെക്സിക്കൻ സെനറ്റ് അംഗീകരിച്ച പുതുക്കിയ ബില്ലിൽ ആദ്യ നിർദ്ദേശത്തേക്കാൾ കുറച്ച് ഉൽപ്പന്ന വിഭാഗങ്ങൾ മാത്രമേ ഉൾപ്പെടുത്തിയിട്ടുള്ളൂ. ഏകദേശം 1,400 ഇറക്കുമതി ചെയ്യുന്ന ഉൽപ്പന്നങ്ങൾക്ക് തീരുവ ചുമത്തുന്ന ബില്ല്, മുമ്പ് നിർത്തിവച്ചിരുന്ന പതിപ്പിൽ നിന്ന് മയപ്പെടുത്തി, ഈ ഉൽപ്പന്നങ്ങളിൽ പലതിനും 50% ൽ താഴെയാണ് താരിഫ് നിരക്കുകൾ നിശ്ചയിച്ചിരിക്കുന്നത്. എന്നിരുന്നാലും, അമേരിക്കയെ പ്രീണിപ്പിക്കാൻ മെക്സിക്കോ മുമ്പ് ചൈനീസ് ഉൽപ്പന്നങ്ങൾക്ക് താരിഫ് വർദ്ധനവ് പ്രഖ്യാപിച്ചിരുന്നു, എന്നാൽ ഇത് വലിയ സ്വാധീനം ചെലുത്തിയില്ല.
